24/10/2026
O CABO FISTERRA, DISTINGUIDO COMO UN DOS LUGARES MÁXICOS DE ESPAÑA.💙
Na mañá de hoxe, o alcalde de Fisterra, Luis Insua Lago, e a tenente de alcalde, Susana Rodríguez Nemiña, asistiron en Padrón ao VI Encontro Nacional de Pueblos Mágicos de España, celebrado baixo o lema «Unha rede que multiplica».
Este recoñecemento é o resultado do traballo previo do goberno municipal, que impulsou e presentou a candidatura do Concello de Fisterra a este galardón, coa convicción de que o Cabo Fisterra reúne méritos excepcionais para recibir esta distinción.
A súa extraordinaria beleza paisaxística, a súa riqueza histórica e patrimonial, a súa estreita vinculación co Camiño de Santiago e o seu profundo significado como Fin da Terra converten este enclave nun lugar singular, cunha identidade propia e unha capacidade única para emocionar a quen o visita. Un espazo emblemático que representa a esencia de Fisterra e proxecta o seu nome máis alá das nosas fronteiras.
Este galardón supón un importante recoñecemento ao valor turístico, cultural e patrimonial do Cabo Fisterra, así como unha oportunidade para seguir dando a coñecer a riqueza da nosa terra e a singularidade dun destino que forma parte da memoria e das emocións de milleiros de persoas.
Fisterra, Fin da Terra e principio de tantos camiños, continúa brillando pola súa historia, pola forza da súa paisaxe e pola maxia dun lugar onde o Atlántico e o horizonte se converten en símbolos da nosa identidade.
💙 Un orgullo para toda a veciñanza e un estímulo para continuar traballando na conservación, promoción e posta en valor do patrimonio que fai de Fisterra un lugar verdadeiramente único.
