28/10/2026
កាកបាទក្រហមកម្ពុជា និងក្រសួងព័ត៌មាន រៀបចំសិក្ខាសាលាស្តីពី ការប្រើប្រាស់បដិរូបកាកបាទក្រហម និងអឌ្ឍចន្ទក្រហម ការប្រើប្រាស់ និងការការពារបដិរូប ព្រមទាំងច្បាប់មនុស្សធម៌អន្តរជាតិ ក្នុងបរិការណ៍សកលលោកបច្ចុប្បន្ន ជូនដល់អ្នកសារព័ត៌មាន អ្នកផលិតមាតិកាតាមបណ្ដាញសង្គម
នៅរសៀលថ្ងៃទី២៨ ខែតុលា ឆ្នាំ២០២៦នេះ កាកបាទក្រហមកម្ពុជា សហការជាមួយក្រសួងព័ត៌មាន បានរៀបចំសិក្ខាសាលាផ្សព្វផ្សាយស្ដីពីគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម ការប្រើប្រាស់ និងការការពារបដិរូប ព្រមទាំងច្បាប់មនុស្សធម៌អន្តរជាតិ ក្នុងបរិការណ៍សកលលោកបច្ចុប្បន្ន ជូនដល់អ្នកសារព័ត៌មាន អ្នកផលិតមាតិកាតាមបណ្ដាញសង្គម និងមន្ត្រីរាជការក្រសួងព័ត៌មាន ក្រោមអធិបតីភាព លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និង ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ព្រមទាំងវត្តមានអញ្ជើញចូលរួមពី ឯកឧត្តម លោកជំទាវ លោក លោកស្រី អ្នកសារព័ត៌មាន អ្នកផលិតមាតិកាតាមបណ្តាញព័ត៌មានសង្គម និងមន្ត្រីរាជការក្រសួងព័ត៌មាន សរុបប្រមាណ ៣០០នាក់ នៅសាលចតុមុខមង្គល ទីស្តីការក្រសួងព័ត៌មាន។
ថ្លែងក្នុងឱកាសនោះ ឯកឧត្តម នេត្រ ភក្ត្រា បានគូសបញ្ជាក់ពីសារៈសំខាន់នៃការប្រើប្រាស់បដិរូបកាកបាទក្រហម និងអឌ្ឍចន្ទក្រហមឱ្យបានត្រឹមត្រូវ ស្របតាមច្បាប់ជាតិ និងច្បាប់អន្តរជាតិ ព្រមទាំងជំរុញឱ្យអ្នកសារព័ត៌មាន និងអ្នកផលិតមាតិកា ផ្ទៀងផ្ទាត់ព័ត៌មាន និងរូបភាពមុនពេលផ្សព្វផ្សាយ ដើម្បីជៀសវាងការភ័ន្តច្រឡំអំពីបេសកកម្មមនុស្សធម៌របស់កាកបាទក្រហមកម្ពុជា។ ឯកឧត្តម ក៏បានគូសបញ្ជាក់ថា ការយល់ដឹងពីក្របខណ្ឌច្បាប់ និងគោលការណ៍គ្រឹះទាំង៧ នឹងជួយឱ្យអ្នកសារព័ត៌មាន និងអ្នកផលិតមាតិកា ជៀសផុតពីការបំពានច្បាប់ដោយអចេតនា ព្រមទាំងលើកកម្ពស់សីលធម៌វិជ្ជាជីវៈសារព័ត៌មាន និងគួរឱ្យទុកចិត្តក្នុងនាមជាពលរដ្ឋឌីជីថលគំរូ។ ជាមួយគ្នានេះ ឯកឧត្តមក៏បានជម្រាបជូនដែរថា ក្រសួងព័ត៌មាននឹងបន្តរួមដំណើរជាមួយកាកបាទក្រហមកម្ពុជា ដើម្បីផ្សព្វផ្សាយឱ្យបានកាន់តែលំទូលាយដល់អ្នកសារព័ត៌មាន អ្នកផលិតមាតិកាតាមបណ្តាញព័ត៌មានសង្គម និងមន្ត្រីរាជការក្រសួងព័ត៌មានបន្ថែមទៀត។
មានប្រសាសន៍បើកអង្គសិក្ខាសាលានាពេលនោះ លោកជំទាវ ពុំ ចន្ទីនី បានថ្លែងអំណរគុណចំពោះក្រសួងព័ត៌មាន ដែលបានសហការគាំទ្រដល់ការផ្សព្វផ្សាយសកម្មភាពមនុស្សធម៌របស់កាកបាទក្រហមកម្ពុជា។ លោកជំទាវ បានលើកឡើងពីអនុសាសន៍ដ៏ខ្ពង់ខ្ពស់របស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា ដែលបានចង្អុលបង្ហាញថា ច្បាប់មនុស្សធម៌អន្តរជាតិ និងអនុសញ្ញាក្រុងហ្សឺណែវ មិនមែនជារឿងឆ្ងាយខ្លួន ឬសម្រាប់តែអ្នកច្បាប់នោះទេ ប៉ុន្តែវាពាក់ព័ន្ធនឹងការគោរពជីវិតមនុស្ស ការគាំពារជនស៊ីវិល និងការរក្សាអព្យាក្រឹតភាព ដែលស្របពេលដែលរាជរដ្ឋាភិបាលកម្ពុជាកំពុងប្រឹងប្រែងដោះស្រាយបញ្ហាដោយសន្តិវិធី និងគោលការណ៍ច្បាប់អន្តរជាតិ។ លោកជំទាវ បន្តគូសបញ្ជាក់ថា បដិរូបកាកបាទក្រហម និងអឌ្ឍចន្ទក្រហម គឺជានិមិត្តសញ្ញាដែលទទួលបានការការពារដោយច្បាប់ មិនមែនជានិមិត្តសញ្ញាធម្មតាដែលអាចយកទៅប្រើប្រាស់ជាទូទៅបាននោះទេ។ ជាមួយគ្នានេះ លោកជំទាវក៏បានអំពាវនាវឱ្យអ្នកសារព័ត៌មាន និងអ្នកផលិតមាតិកា ចូលរួមផ្សព្វផ្សាយគោលការណ៍មនុស្សធម៌ ការការពារជនស៊ីវិល និងអ្នករងរបួសក្នុងស្ថានភាពជម្លោះប្រដាប់អាវុធ ព្រមទាំងប្រើប្រាស់បច្ចេកវិទ្យាឌីជីថលដោយមានការទទួលខុសត្រូវ។
