Bng-VIMIANZO

06/09/2026

Onte tivemos a satisfacción de participar na andaina organizada polo ANPA do CEIP San Vicenzo polos Penedos de Pasarela e Traba. Unha iniciativa que merece todo o noso recoñecemento.

Queremos felicitar ao ANPA por promover actividades que fan comunidade e que permiten ás crianzas e ás súas familias descubrir, coñecer e valorar un dos maiores tesouros naturais de Vimianzo. Educar tamén é saír das aulas e aprender da nosa contorna.

Ao mesmo tempo, esta xornada volve poñer de manifesto o enorme potencial dos Penedos de Pasarela e Traba para dinamizar a parroquia e todo Vimianzo. Desde o BNG levamos anos demandando unha aposta decidida, propoñendo actuacións como un centro de interpretación, a posta en marcha dun albergue e a formación de guías locais, iniciativas que crearían emprego e novas oportunidades para a zona.

Parabéns ao ANPA por esta magnífica iniciativa e grazas por facer que cada vez máis persoas descubran e se sintan orgullosas dun patrimonio que é de todos e todas!

05/09/2026

Hai voces que son difíciles de confundir. Alberto Lema ten unha delas.

Hoxe, temos unha cita moi especial no Castelo de Vimianzo. Alberto Lema, veciño de Bamiro, estará no Castelo de Vimianzo para compartir as Conversas a Pé de Páxina con Rosalía Fernández Rial.

Alberto leva anos construíndo unha obra literaria fondamente persoal, cunha maneira de escribir propia, valente e afastada de lugares comúns. Narrativa e poesía conforman unha traxectoria na que atopamos títulos como Sidecar, Da Máquina, Pazo de inverno —Premio García Barros— ou Río Grande.

Este ano chegou, ademais, un recoñecemento que nos alegra especialmente: o Premio Xerais de Novela 2026 por A boca do río. Un galardón que recoñece o talento dun escritor que nunca perdeu o vínculo coa súa comarca, coa súa terra e co país.

Acompañarao Rosalía Fernández Rial, poeta, narradora e unha voz consolidada da literatura galega contemporánea. Dúas maneiras de entender a creación que mañá teremos a oportunidade de escoitar e compartir en Vimianzo.

Para o BNG de Vimianzo é unha honra contar entre os nosos veciños cun creador do talento de Alberto Lema. E tamén unha satisfacción velo volver á casa coa forza dunha traxectoria que non deixou de medrar.

Sábado 5 de setembro, ás 20:00 horas, no Castelo de Vimianzo (Acto integrado dentro de Vimianzo MOLA. Festival financiado pola Area de cultura da deputación dependente do BNG)

Achegádevos. Paga a pena escoitar a quen ten algo propio que dicir e sabe atopar as palabras para contalo.

04/09/2026

Literatura, cultura e compromiso coa nosa contorna 📚

Hoxe, ás 19:00 horas, no Castelo de Vimianzo, Xulio Romero, escritor nado en Camelle e estreitamente vinculado desde hai anos á vida social e ao movemento asociativo vimiancés, presentaranos A primeira dama, a súa nova obra, publicada este ano por Toxosoutos. Unha historia cargada de retranca na que Michelle Obama percorre parte do Camiño de Santiago.
Na súa traxectoria atopamos tamén Aldonza de Compostela, publicada en 2024, un álbum ilustrado no que as palabras de Xulio se acompañan das fermosas ilustracións de Alba Romero. Unha colaboración que queremos lembrar especialmente e que amosa como a creación literaria e artística pode sumar voces e sensibilidades.

Desde o BNG de Vimianzo queremos recoñecer o traballo das persoas que, como Xulio, participan activamente do noso tecido cultural e asociativo e contribúen a manter viva a cultura desde o territorio.

E celebramos que o faga no Vimianzo M.O.L.A., unha iniciativa que conta cun importante financiamento da Área de Cultura da Deputación da Coruña, xestionada polo BNG, reafirmando así o noso compromiso cunha cultura viva, próxima e accesible.

Parabéns, Xulio, e parabéns tamén a Alba polo seu traballo en Aldonza de Compostela. Que sigan chegando novas historias! 📖

04/09/2026

🏫 Defendemos o futuro do CEIP de Baíñas.

O BNG levou ao Parlamento de Galiza a necesidade de recuperar as dúas prazas docentes que perde o centro neste curso e de poñer en marcha un comedor escolar.

Queremos unha escola con recursos suficientes e con servizos que faciliten a conciliación das familias e fagan do colexio de Baíñas unha opción máis atractiva para escolarizar os seus fillos e fillas.

Máis profesorado, máis servizos, máis futuro para Baíñas. 💙

03/09/2026

Desde o BNG de Vimianzo, queremos felicitar o noso veciño Alberto Mancebo pola publicación de Os tres nomes da Sartegua, a súa terceira novela.

É un orgullo contar con creadoras e creadores que levan o nome de Vimianzo máis alá.

Esta fin de semana participará no Vimianzo M.O.L.A, un festival financiado maioritariamente a través da Área de Cultura da Deputación da Coruña, xestionada polo BNG.

Parabéns, Alberto, e moitos éxitos!

27/08/2026

26/08/2026

https://costadamorte.bng.gal/articulo/politica/bng-vimianzo-mostra-sua-preocupacion-polo-recorte-profesorado-unidades-ceip-bainas/20260826153131001380.html

Para o curso 2026-2027, o centro pasará a ter unicamente tres unidades, e reducirá de seis a catro os postos docentes, o que obrigará a concentrar o alumnado...

26/08/2026

Para o curso 2026-2027, o número de grupos reducirase a só tres unidades, e de seis a catro postos docentes, unha redución que obrigará a concentrar o alumnado de Infantil e Primaria nun menor número de grupos.