02/09/2026
Acollemos e sumámonos a declaración institucional impulsada polo Fondo Galego de Cooperación e Solidariedade.
O Fondo Galego de Cooperación e Solidariedade, entidade que representa a 125 administracións locais de Galicia, amosa a súa fonda preocupación polos acontecementos vividos en Ceuta nos últimos días e aposta por actitudes pacíficas, polo diálogo, polo respecto aos valores democráticos e, ineludiblemente, polo cumprimento dos dereitos humanos e o dereito internacional.
Ceuta está a atravesar unha grave crise humanitaria, migratoria e social tras a chegada de máis de 70.000 persoas migrantes o pasado 30 de xullo a través da fronteira con Marrocos. Cando menos 96 vidas truncáronse na travesía, unha auténtica traxedia que non podemos contemplar con indiferenza.
A magnitude do número de persoas recibidas desbordou a capacidade de acollida, xerando situacións de risco e unha gran tensión social na cidade española. Pero cada cifra agocha un nome, unha historia, un rostro. Son persoas que foxen da pobreza, dos conflitos, da falta de oportunidades ou da vulneración dos seus dereitos. Persoas que procuran unha vida mellor e que merecen ser tratadas con dignidade, humanidade e respecto.
Somos conscientes da complexidade da situación e de que a entrada extraordinaria en Ceuta se produciu á marxe da normativa fronteiriza e migratoria. Vimos tamén como ese fluxo, procedente de varios puntos do continente africano, pretende ser utilizado como arma de desestabilización do Estado Español e de radicalización social. Pero nada disto pode facernos esquecer o esencial: ningunha circunstancia xustifica que se cuestione a dignidade e os dereitos fundamentais dunha persoa.
Neste contexto, o Fondo Galego de Cooperación e Solidariedade,
CONDENA
A utilización da pobreza, da vulnerabilidade e da migración como ferramentas de presión política e a súa instrumentalización segundo intereses xeopolíticos.
Calquera acto de violencia, veña de onde veña, tanto contra a poboación civil como contra as forzas e corpos de seguridade.
A incitación ao odio, o racismo e a xenofobia, así como a criminalización das persoas migrantes.
Os impedimentos para proceder á entrega de axuda humanitaria ás persoas migrantes, así como a queima dos seus asentamentos e escasas pertenzas.
O acoso que traballadoras e traballadores de ONGD que atenden ás e aos migrantes están a sufrir por parte dun grupo de poboación.
ESIXE
Que se respecte o dereito de toda persoa a migrar para mellorar a súa calidade de vida, fuxir de situacións de conflito ou da privación de liberdades e dereitos esenciais, co fin de desenvolver unha vida plena.
Que se cumpran os dereitos básicos das persoas migrantes: non discriminación, non criminalización e protección en calquera circunstancia, con especial atención ás e aos menores.
Que se garanta o dereito á asistencia humanitaria das persoas que se atopan nunha situación de risco e que se protexa tamén a quen se encarga desta tarefa.
Que, máis alá da resposta inmediata, se traballe para construír vías seguras e legais para migrar, así como políticas que permitan ás persoas non verse obrigadas a poñer a súa vida en perigo para buscar un futuro mellor.
O Fondo Galego de Cooperación e Solidariedade abraza ao pobo de Ceuta, que sempre demostrou ter sido pacífico, xeneroso e solidario. Nestes momentos difíciles, nos que é doado que o medo e a crispación abran a fenda do odio e a división, instamos á veciñanza a seguir sendo un exemplo de tolerancia, convivencia e axuda mutua.
Desde Galicia, con 563.303 galegas e galegos residentes en diferentes países do estranxeiro (INE 2026), pulamos tamén para que os seus dereitos non se vexan vulnerados.
Hoxe, máis que nunca, poñémonos no lugar de quen marcha e defendemos a súa dignidade, aquí e en calquera parte do mundo.
Comisión Executiva do Fondo Galego de Cooperación e Solidariedade
