22/08/2026
💧 A auga é un recurso esencial e temos que protexela
Desde o BNG de Gondomar reclamamos ao Goberno local que incremente xa as restricións ao consumo de auga da rede municipal e que se limite aos usos esenciais.
Non podemos pedir á veciñanza que aforre auga mentres o Concello mantén usos non prioritarios como o rego de xardíns e campos deportivos ou o baldeo de rúas. E, neste contexto, tampouco consideramos axeitado celebrar hoxe unha festa da auga infantil utilizando auga potable da rede municipal.
Non é unha cuestión de estar en contra das actividades para a cativada. O debate é se, nun momento de escaseza, é responsable destinar auga de beber a usos recreativos mentres se pide á veciñanza que reduza o seu consumo.
🌱 Os meses de setembro e outubro poden ser especialmente críticos pola menor recuperación dos mananciais. Por iso, as medidas deben adoptarse antes de chegar á situación de pre-alerta, cando aínda temos marxe para actuar e manter as reservas.
A auga potable debe reservarse para o consumo humano, a hixiene e os servizos básicos. Para os usos non esenciais deberían empregarse recursos alternativos, como auga depurada ou almacenada.
Para o BNG compre, pois, actuar xa. E a escusa non pode ser, como di Ferreira, que Gondomar non estea aínda entre os concellos que a Augas de Galicia declarou en pre-alerta. “As medidas hai que establecelas antes de que esa situación se produza, mentres hai marxe para prepararse”, enfatiza Rodríguez, e engade que “se non se chega a ese extremo, moito mellor, mais teremos gañado en conciención veciñal e en resiliencia para presente e futuro”. 💧
