Delina Consulting AB

29/10/2026

ኤሊሳቤት ታንድ ሪንግክቪስት ንመዝነት ቀዳማይ ሚኒስተር !

ኣቦ መንበር ባይቶ ሽወደን ኣንድርያስ ኖርለን (Andreas Norlén)፡ ኣብ ሓሙስ (Andreas Norlén) ፡ ዝሃቦ ጋዜጣዊ መግለጺ፡ መራሒት ሰልፊ ማእከል (Centerpartiet) ኤሊሳቤት ታንድ ሪንግክቪስት (Elisabeth Thand Ringqvist) ንመዝነት ቀዳማይ ሚኒስተር ኣብ ባይቶ ንድምጺ ክትቀርብ ምዃና ኣፍሊጡ።

ኣንድርያስ ኖርለን ኣብ መግለጺኡ፡ ኣብቲ ዝካየድ ናይ ቀዳማይ ሚኒስተር ድምጺ ምሃብ፡ ኤሊሳቤት ታንድ ሪንግክቪስት ከም ሕጽይቲ ክትቀርብ ወሲነ ኣለኹ።" ክብል ሓቢሩ ኣሎ።
ኣብዚ ቀረባ መዓልታት፡ መንግስቲ ንምምስራት ዘሎ ዕድል ክትድህስስ ሓላፍነት ዝተዋህባ መራሒት ሰልፊ Centerpartiet ኤሊሳቤት ታንድ ሪንግክቪስት፡ ነቲ ዝተዋህባ ሓልፍነት ከም ዘይሰለጣ ዝፍለጥ ኮይኑ፡ ሕጂ ባዕላ ቀዳመይቲ ሚኒስተር ሽወደን ንኽትከዉን ብኣፈጉባኤ Andreas Norlén ተሓጽያ ኣላ።

ንሳ ኣብ ዝሓለፈ ሰኑይ፡ ኣብ ማእከል ዝተመስረተ መንግስቲ (Mittenregering) ንምቛም ኣብ ባይቶ እኹል ደገፍ ከምዘየለ ኣፍሊጣ ነይራ። ካብቲ ግዜ እቲ ጀሚሩ፡ ኣቦ መንበር ባይቶ ብዛዕባ መስርሕ ምምስራት መንግስቲ ሓድሽ መግለጺ ኣይሃበን ጸኒሑ።

እዚ ኸምዚ ኢሉ እንከሎ፡ኣብ ልዕሊ ፖለቲካዊ ሰልፍታት ዝግበር ዘሎ ጸቕጢ እናወሰኸ ይመጽእ ኣሎ። ኣንድርያስ ኖርለን ኣብ መግለጺኡ ከምዚ ክብል ተዛሪቡ፦

"ኣብ ልዕሊ ፖለቲካዊ ሰልፍታት ዘሎ ጸቕጢ በብቑሩብ ንምውሳኽ፡ ብዙሓት ሰባት ኣብ መንጎ ሰልፍታት ምንቅስቓስን ምቅርራብን ቅድሚ ምፍጣሩ፡ ገለ ናይ ቀዳማይ ሚኒስተር ድምጺ ምሃብ መስርሓት ክፈሽሉ ከም ዝጸንሑ ዝፍለጥ እዩ።

ነዚ ኩሉ ኣብ ግምት ብምእታው፡ ኤሊሳቤት ታንድ ሪንግክቪስት ከም ሕጽይቲ ቀዳማይ ሚኒስተር ኮይና ኣብ ባይቶ ንድምጺ ክትቀርብ ወሲነ ኣለኹ።"ክብል ተዛሪቡ። ኤሊሳቤት እንተዘይተመሪጻ፡ ኡልፍ ክሪስተርሶን ዕድል ክወሃቦ እዩ።

እቲ ኣብ ባይቶ ንኤሊሳቤት ታንድ ሪንግክቪስት ንምምራጽ ዝካየድ ድምጺ ምሃብ እንተፈሺሉ፡ መራሒ ሰልፊ ሞደራተርና (Moderaterna) ኡልፍ ክሪስተርሶን (Ulf Kristersson) መንግስቲ ንምምስራት ዘሎ ዕድል ክድህስስ ሓላፍነት ክወሃቦ እዩ።

ኣንድርያስ ኖርለን ነዚ ኣመልኪቱ ከምዚ ኢሉ፦

"ኡልፍ ክሪስተርሶን መንግስቲ ንምምስራት ዘሎ ዕድል ክድህስስ ሓላፍነት ክወሃቦ ኣለዎ ኢሎም ንዝገለጹ ወገናት እውን ኣብ ግምት ብምእታው፡ ካብ ሕጂ ጀሚረ ክሕብር ክብል፡ እዚ ፈተነ እንተፈሺሉ ኣብ መጻኢ ንሽወደን ነዘን ዝሓለፋ 4 ዓመታት ከም ቀዳማይ ሚኒስተር ሽወደን ኮይኑ ዝመርሓ፡ ኡልፍ ክሪስተርሶን መንግስቲ ናይ ምምስራት ሓላፍነት ክህቦ ሙዃኑ ኣፍሊጡ።

ዝመጽእ ሰሉስ 3 ሕዳር 2026 ዝካየድ ናይ ቀዳማይ ሚኒስተር ድምጺ ምሃብ፡ ቀዳማይ ሚኒስተር ንምምራጽ ኤሊሳቤት እንተዘይተዓዊታ፡ ኡልፍ ክሪስተርሶን ባይቶ ሽወደን ክቕበሎ ዝኽእል መንግስቲ ንምምስራት ዘሎ ተኽእሎ ክድህስስ ሓላፍነት ክዋሃቦ እየ።

እዚ ከምዚ ኢሉ እንከሎ፡ እታ ብተደጋጋሚ ፈተነታት ናይ ቀዳምይቲ ምኒስተር ምዃን ዝፈሸላ ማግዳለና ኣንደርሶን፡ ነዚ ዉሳነ ናይ ኣፈጉባኤ ብትሪ ተቛዊማቶ ኣላ። ንዛ ከምዚ ክትብል ትምጉት፤

ኣቦ መንበር ባይቶ ሽወደን (Talmannen) ሎሚ፡ መራሒት ሰልፊ ማእከል (Centerpartiet) ኤሊሳቤት ታንድ ሪንግክቪስት (Elisabeth Thand Ringqvist) ንመዝነት ቀዳማይ ሚኒስተር ኣብ ባይቶ ሽወደን (Riksdagen) ንድምጺ ከቕርባ መደብ ከምዘለዎ ኣፍሊጡ።

ኤሊሳቤት ታንድ ሪንግክቪስት ባዕላ ቀዳመይቲ ሚኒስተር ንምዃን ዘሎ ዕድል ከይደህሰሰት፡ ከምኡ እውን ሓያሎ ፖለቲካዊ ሰልፍታት ክሳተፉሉ ዘይደልዩ ናይ መንግስቲ ምትሕብባር መሰረት እናሃለወ፡ ኣቦ መንበር ባይቶ ንዓኣ ንድምጺ ከቕርባ ምውሳኑ ዘገርም እዩ።

ኣብዚ እዋን እዚ ዝያዳ ርትዓዊ ዝነበረ፡ መራሒ ሰልፊ ሞደራተርና (Moderaterna) ኡልፍ ክሪስተርሶን (Ulf Kristersson) ፡ ብናይ የማን ፖለቲካዊ ሰልፍታት ዝድገፍ መንግስቲ ንምምስራት ዘሎ ዕድል ክድህስስ ሓላፍነት ምሃብ ዝሓሸ ምርጫ ነይሩ። ሕጂ ዘድሊ ዘሎ፡ ኩሎም ፖለቲካዊ ሰልፍታት ብሓባር ሓላፍነት ክወስዱን፡ ንምምስራት መንግስቲ ዕንቅፋት ዝኾኑ ጽኑዓት መርገጺታትን ፖለቲካዊ ፍልልያትን ክንክዩን እዩ። ክትብል ተቛዉሞኣ ገሊጻ ኣላ።

ነዚ ኣርእስቲ ዝምልከት ምዕባለታት እንተኸታተልኩ ከስዕበሉም እየ።ሰላም ወሰናይ !

ተኽለወይኒ ኣስመላሽ
29 ጥቅምቲ 2026

28/10/2026

ፖሊስ ሽወደን ንሽወደናዊ ዜግነት ዘይብሎም ሰባት ሓድሽ መንነት ካርድ ምሕታም ክጅምር እዩ!

ፖሊስ ሽወደን ንኹሎም ናይ ሽወደን ዜግነት ዘይብሎምን ኣብ ሽወደን ብወግዒ ዝተመዝገቡ ሰባት ካብ 1 ታሕሳስ 2026 ጀሚሩ ተግባራዊ ዝኸውን ሓድሽ ኣገልግሎት መንነት ካርድ (ID-kort) ከዕድል ክጅምር እዩ። እዚ ካርድ እዚ ሓዱሽ መንነት ካርድ ንመገሻ ዝፍቀድ ሰነድ ኣይኮነን።

ነዚ ሓድሽ መንነት ካርድ ከመልክት ዝኽእል መን እዩ?

ነዚ ሓድሽ መንነት ካርድ ንምርካብ ዝስዕቡ ቅድመ ኩነታት ክማልኡ ኣለዎም።

1. ሽወደናዊ ዜግነት ዘይብልካ ክትከውን ኣለካ።

2. ኣብ ሽወደን ብወግዒ ዝተመዝገብካ (Folkbokförd) ክትከውን ኣለካ።

3. መንነትካ ብተቐባልነት ዘለዎ መንገዲ ከተረጋግጽ ክትክእል ኣለካ።

4. ዕድሜኻ 9 ዓመት ወይ ልዕሊኡ ክኸውን ኣለዎ። ኣብቲ ዘለናዮ ዓመት 9 ዓመት ዝመልእ ቆልዓ እውን ከመልክት ይኽእል።

ነዚ ሓዱሽ መንነት ካርድ ንምዉጻእ ካብ 1 ሕዳር 2026 ጀሚርካ ቆጸራ ክትሕዝ ትኽእል። ቆጸራ ብተሌፎን ጥራሕ እዩ ዝተሓዝ። በዚ ቁጽሪ ናይ ፖሊስ 114 14 ደዊልካ ቆጸራ ምሓዝ ይከኣል።

ካብ 1 ታሕሳስ 2026 ከኣ ኣብ መደበር ፖሊስ ብኣካል ቀሪብካ ነዚ ሓዱሽ መንነት ካርድ ክተመልክት ትጅምር። እንተኾነ ግን ኣብ ዝኾነ መደበር ፖሊስ ምልክታ ምቕራብ ኣይከኣልን። እዚ ኣገልግሎት ኣብ ዉሱናት መደበራት ፖሊስ ጥራይ እዩ ዝወሃብ።

• ነበርቲ ከባቢ ስቶክሆም ኣብ FarstJärva (Rinkeby),Norrtälje, Skärholmen, Södertälje och Visby ጥራሕ ከመልክቱ ይኽእሉ።

• ነበርቲ ሰሜን ሽወደን ከኣ ኣብ Boden,Gällivare, Lycksele, Sundsvall, Umeå och Östersund ከመልክቱ ይኽእሉ።

• ነበርቲ ማእከላይ ሽወደን (Mitt) ኣብ Fagersta, Gävle, Sala, Tierp, Bergslagen, Borlänge, Karlstad, Örebro ከመልክቱ ይኽእሉ።

• ነበርቲ ደቡብ ሽወደን (Syd) ኣብ Helsingborg, Kalmar, Karlskrona, Kristianstad, Malmö Drottninggatan och Växjö ከመልክቱ ይኽእሉ።

• ምዕራብ ሽወደን (Väst) ኣብ Borås, Falkenberg, Göteborg Passcentralen, Skövden och Trollhättan ከመልክቱ ይኽእሉ።

• ምብራቕ ሽወደን (Öst) ኣብ Jönköping, Katrineholm och Norrköping
እዚ ሓድሽ ID-kort ንምንታይ የገልግል?

እዚ ሓድሽ መንነት ካርድ ክልተ ኣገደስቲ ኣገልግሎታት ኣለዎ። እቲ ፋልማይ ጥቕሙ መንነትካ ንምርግጋጽ ሓጋዚ ይኸዉን። ኩሎም እቶም ሽወደናዊ ዜግነት ዘይብሎም፡ ኣብዚ እዋን እዚ ካብ Skatteverket ዝተዋህቦም ID-kort ዝጥቀሙ ሰባት፡ ነዚ ሓድሽ ካርድ ከመልክቱ ይኽእሉ ሽወደናዊ ዜግነት ዘለካ እንተኾይንካ፡ ነዚ ንዜግነት ዘይብሎም ዝተዳለወ ID-kort ኣይምልከተካን። ኣብ ክንድኡ፡ ንሃገራዊ መንነት ካርድ (Nationellt ID-kort) ክትምልክት ኣለካ።

እዚ ንሽወደናዊ ዜግነት ዘይብሎም ዝወሃብ ሓድሽ ID-kort ንመገሻ ኣይፍቀድን እዩ። ንፓስፖርት ወይ ካልእ ቅቡል ሰነድ መገሻ ኣይትክእን።

እዚ ከምዚ ኢሉ እንከሎ ሓዱሽ ኤሌክትሮኒካዊ መንነት (SverigeID) ኣብ እንዳ ፖሊስ ካብ 1 ታሕሳስ 2026 ጀሚሩ ዉን ምምልካት ክጅመር እዩ። እዚ ሓዱሽ ኤሌክትሮኒካዊ መንነት (SverigeID) እንታይ እዩ?

(SverigeID) ንዜግነት ናይ ሽወደን ንዘለዎም ሰባት ጥራሕ ዝምልከት ሓዱሽ ኤሌክትሮኒካዊ መንነት እዩ። ኣብ መደበር ፖሊስ ኣብ እትምልክተሉ እዋን፡ ኣብ ሃገራዊ መንነት ካርድኻ SverigeID እውን ክህልወካ ከም እትደሊ ክትሕብር ኣለካ።ዜግነት ናይ ሽወደን ዘለካ እንተኾይኑ ናብ መደበር ፖሊስ ከይድካ ንSverigeID ክተመልክተ ከለኻ፡ ንSverigeID ዝምልከቱ ናይ ኣጠቓቕማ ቅጥዕታት (Användarvillkor) ክትቅበል ኣለካ።

ንዝያዳ ሓበሬታ፡ ኣብ ወግዓዊ ድሕረ ገጽ ፖሊስ ሽወደን ዝወጸ ሓበሬታ ኣብ ናይ comment ቦታ ኣለኩም ኣንብብዎ።

ተኽለወይኒ ኣስመላሽ
28 ጥቅምቲ 2026

24/10/2026

ሎሚ ለይቲ ሓደ ሰዓት ንድሕሪት ክምለስ እዩ !

ናብ ሎሚ ለይቲ 25 ጥቅምቲ ዘዉግሕ ለይቲ ሓደ ሰዓት ንድሕሪት ክምለስ ስለ ዝኾነ: እቶም ስማርት ሰዓት ዘይትቀሙ ( ብፍላይ ናይ መንደቕ ሰዓት ትጥቀሙ) ሰዓትኩም ኣስተኽኽሉ።

ካብ ሰዓት ናይ ሓጋይ ናብ ሰዓት ናይ ክረምቲ ዝግበር ለውጢ፡ ናብ ሎሚ ሰንበት ዘዉግሕ ሓደ ሰዓት ንድሕሪት ክምለስ እዩ።

ሰዓት 03፡00 ናብ 02፡00 ክምለስ እዩ። በዚ መሰረት ሓደ ተወሳኺ ሰዓት ክንድቅስ ኢና ማለት እዩ።

ሽወደን ክሳብ ሕጂ ኣብ ዓመት ክልተ ግዜ ሰዓት እትቕይረሉ ቀንዲ ምኽንያት፡ ኣብ እዋን ሓጋይ ካብ ብርሃን ጸሓይ ዝያዳ ንምጥቃምን፡ ምስ ካልኦት ሃገራት ኤውሮጳ ዘሎ ናይ ሰዓት ስርዓት ንምውህሃድን እዩ።


ስለምንታይ ሰዓት ይቕየር?

ኣብ ጽድያ፦ ኣብ መወዳእታ መጋቢት፡ ሰዓት ሓደ ሰዓት ንቕድሚት ይኸይድ። እዚ ማለት ኣብ ምሸት ዝያዳ ብርሃን ጸሓይ ይህሉ ማለት እዩ።

ኣብ ቀውዒ፦ ኣብ መወዳእታ ጥቅምቲ፡ ሰዓት ሓደ ሰዓት ንድሕሪት ይምለስ። እዚ ናብ ንቡር ሰዓት ምምላስ ማለት እዩ።

ተኽለወይኒ ኣስመላሽ
24 ጥቅምቲ 2026

24/10/2026

ናብ ሎሚ ለይቲ ዘዉግሕ ናይ Swish ኣገልግልት ደው ክብል አዩ!

ናብ ሎሚ 25 ጥቅምቲ ኣብ ዘዉግሕ ለይቲ ናይ ብዙሓት ሰባት ደሞዝ ዝኽፈልሉ ኣጋጣሚ ናይ Swish ኣብ 3 ባንክታት ሽወደን ግዝያዊ ምቁራጽ ኣገልግልት ከጋጥም ምዃኑ ኣገልግልት ዜና NYHETER 24 ሓቢሩ።

እዚ ናይ ግዝያዊ ምቁራጽ ናይ Swish ብምኽንያት ተመዲቡ ዘሎ ናይ ጽገና ኣገልግሎት ምዃኑ ተፈሊጡ ኣሎ።

እዘን ሰለስተ ባንክታት ሎሚ ለይቲ ብሰንኪ ምጽጋን ኣገልግሎት ዘቛርጻ እዘን ዝሰዕባ እየን።

Skandiabanken: ካብ ሰዓት 01፡30 ክሳብ 05፡00

Sparbanken Syd: ካብ ሰዓት 02፡00 ክሳብ 04፡30

Nordea: ካብ ሰዓት 02፡00 ክሳብ 04፡00

ተኽለወይኒ ኣስመላሽ
24 ጥቅምቲ 2026

22/10/2026

ልዕሊ 80% ተፈተንቲ samhällskunskap ሓሊፎም!

ውጽኢት ናይቲ ንመጀመርታ ግዜ ኣብ ሽወደን ዝተዋህበ ፈተና ዜግነት ብዛዕባ ፍልጠት ሕብረተሰብ (Samhällskunskap) ዕላዊ ኮይኑ። ካብቶም ፈተና ዝወሰዱ 875 ሰባት፡ ኣስታት 80 ሚእታዊት ዝኾኑ ተፈተንቲ ዉን ተዓዊቶም።

ካብ 6 ሰነ 2026 ንደሓር፡ ንዜግነት ሽወደን ንምርካብ ዝሕተቱ መዐቀኒታት ከም ዝተረርይ ዝፍለጥ ኮይኑ፡ ብመሰረት እቶም ሓደስቲ ረቛሒታት፡ ዜግነት ሽወደን ዝሓትት ሰብ፡ ብዛዕባ ቋንቋ ሽወደንን ኣፍልጦ ብዛዕባ ሕብረተሰብ ሽወደንን ዝተወሰነ ፍልጠት ከምዘለዎ ከረጋግጽ ይግባእ።

ሎሚ 22 ጥቅምቲ 2026 ከኣ፡ ድሕሪ ናይ ልዕሊ ክልተ ወርሒ ትጽቢት ውጽኢት ናይቲ ፈተና ዕላዊ ኮይኑ ኣሎ። ኩሎም ተፈተንቲ ኣብ ናይ ሓሙስ ንግሆ፡ ውጽኢት ፈተናኦም ክበጽሖም ተመዲቡ መደብ ተታሒዙ ምጽንሑን ዉን ተፈሊጡ።

ኣብ ቤት ጽሕፈት ዩኒቨርሲቲታትን ላዕለዋይ ትምህርትን (UHR)፡ ሓላፊ መደብ ፈተና ዜግነት ዝኾነ ኣንድርያስ ሳንድበሪ (Andreas Sandberg)፡ ከምዚ ኢሉ፦ «ነቲ ናይ መጀመርታ ፈተና ብጥንቃቐ ገምጋምን ትንተናን ተኻይዱሉ እዩ። እቲ ውጽኢት ቅኑዕን ፍትሓውን ምዃኑ ንምርግጋጽ፡ እኹል ግዜ ምውሳድ ኣገዳሲ እዩ።»

ብመሰረት UHR፡ እቲ ንፈተነ ዝተዳለወ ፈተና (utprövningsprov)፡ ከም ናይ መጀመርታ ወግዓዊ ፈተና ፍልጠት ሕብረተሰብ ንምጥቃም ዘኽእል ናይ ጽሬት ደረጃ ከምዘማልአ ተረጋጊጹ።

ንምሕላፍ ክንደይ ነጥቢ የድሊ?

እቲ ፈተና ብድምር 40 ነጥቢ ዘለዎ ኮይኑ፡ ንምሕላፍ እንተወሓደ 28 ነጥቢ ክትረብ ኣለካ ። እዚ መሕለፊ ነጥቢ ብዩኒቨርሲቲ ዮተቦሪ (Göteborgs universitet) ዝቐረበ ሓሳብ እዩ። እቲ ዩኒቨርሲቲ ንናይ ኣፍልጦ ብዛዕባ ሕብረተሰብ ሽወደንን ፈተና ሓላፍነት ዝወሰደ እዩ።

ውጽኢት ፈተና ብቁጽሪ

• ጠቕላላ ተፈተንቲ፦ 875 ሰባት

• ዝሓለፉ፦ ኣስታት 700 ሰባት (80%)

• ዘይሓለፉ፦ ኣስታት 175 ሰባት (20%)

• ጠቕላላ ነጥቢ፦ 40

• ንምሕላፍ ዘድሊ ነጥቢ፦ 28 ካብ 40 (70%)

እዚ ማለት፡ ካብ 10 ተፈተንቲ እቶም 8 ነቲ ናይ መጀመርታ ፈተና ዜግነት ሽወደን ብዓወት ሓሊፎም ማለት እዩ።

ተኽለወይኒ ኣስመላሽ
22 ጥቅምቲ 2026

22/10/2026

ሽወደን ኣብዚ ሰሙን አዚ !

1. ሓበሬታ ስነ ስርዓት ቀብሪ ሳባ ጸሃየ ኣብራሃም

2. መጠንቀቕታ ካብ ፖሊስ ሽወደን

3. ሓደሽቲ ሕግታት ሚግረሽን

4. ምምስራት መንግስቲ ሽወደን …..ወዘተ

ምሉእ ትሕዝቶ ኣብ ቦታ comment ኣለኩም
ስምዕዎ

22/10/2026

ሽወደን ኣብዚ ሰሙን አዚ !

1. ሓበሬታ ስነ ስርዓት ቀብሪ ሳባ ጸሃየ ኣብራሃም

2. መጠንቀቕታ ካብ ፖሊስ ሽወደን

3. ሓደሽቲ ሕግታት ሚግረሽን

4. ምምስራት መንግስቲ ሽወደን …..ወዘተ

7 እዋናዉያን ሓበሬታ ኣብ ሽወደን🎙️ New to streaming or looking to level up? ...

19/10/2026

መራሒት ሰልፊ Centerpartiet (Elisabeth Thand Ringqvist) መንግስቲ ንምምስራት ሓላፍነት ተዋሂብዋ!

ኣፈ-ጉባኤ ባይቶ ሽወደን ኣንድርያስ ኖርለን (Andreas Norlén) ፡ ንመራሒት ሰልፊ ሰንተር (Centerpartiet) ኤሊሳቤት ታንድ ሪንግክቪስት፡ ሓድሽ መንግስቲ ንምምስራት ሓላፍነት ከም ዝሃባ፡ ሎሚ ሰኑይ 19 ጥቅምቲ 2026 ኣብ ዝገበሮ ኣብ ጋዜጣዊ መግለጺ ኣፍሊጡ።

ኣብ ዝሓለፈ ሰሙን፡ መራሒት ሰልፊ ሶሻል ዲሞክራተርና ማግዳሌና ኣንደርሾን (Magdalena፡ ኣብ ባይቶ ሽወደን ብዝተኻየደ ናይ ቀዳማይ ሚኒስተር ድምጺ ኣወሃህባ ኣድላዪ ደገፍ ክትረክብ ብዘይምኽኣላ ተሳዒራ። እዚ ድምጺ ኣወሃህባ፡ ቅድሚ ልዕሊ ሓደ ወርሒ ዝተኻየደ ሓፈሻዊ ምርጫ ሽወደን ካብ ዝዛዘም ንደሓር፡ ክሳብ ሕጂ ዝተኻየደ እንኮ ናይ ቀዳማይ ሚኒስተር ድምጺ ኣወሃህባ እዩ።

ማግዳሌና ኣንደርሶን ድሕሪ እቲ ድምጺ ኣወሃህባ፡ «እዚ ውጽኢት ሙሉእ ብሙሉእ ትጽቢት ዝተገብረሉ እዩ» ክትብል ገሊጻ ምንባራ ዝፍለጥ እዩ።በዚ ምኽንያት፡ ናይ ሓድሽ መንግስቲ ምምስራት መስርሕ ናብ ዝቕጽል ደረጃ ተሰጋጊሩ።

ካብ ዝሓለፈ ሓሙስ ጀሚሩ፡ እቲ መስርሕ ኣብ ኢድ ኣፈ-ጉባኤ ባይቶ ሽወደን ወዲቕ ምጽንሑ ዝዝከር ኮይኑ፡ ንሱ ድሕሪ እቲ ድምጺ ኣወሃህባ፡ ምስ ኩሎም መራሕቲ ፖለቲካዊ ሰልፍታት ብተሌፎን ክዘራረብ ከም ዝቐነየ ዝፍለጥ እዩ ።

ሎሚ ሰኑይ 19 ጥቅምቲ 2026 ድማ፡ ንመራሒት Centerpartiet ኤሊሳቤት ታንድ ሪንግክቪስት ፡መንግስቲ ምምስራት ዕድላት ንኽትጽንዕን ምስ ካልኦት ሰልፍታት ንኽትዘራረብን ሓላፍነት ሂብዋ።

ኤሊሳቤት ታንድ ሪንግክቪስት፡ ድሕሪ ሓደ ሰሙን፡ ማለት ብ26 ጥቅምቲ 2026፡ ውጽኢት ናይቲ ዘካየደቶ ምይይጥን ጻዕርን ንኣፈ-ጉባኤ ባይቶ ከተቕርብ እያ። ብኻልእ ወገን፡ ማግዳሌና ኣንደርሶን፡ መራሒ ሰልፊ Moderaterna ኡልፍ ክሪስተርሾን (Ulf Kristersson) ናይ መንግስቲ ምምስራት ዕድላት ንኽምርምር ሓላፍነት ክወሃቦ ከም ዘለዎ ርእይቶኣ ገሊጻ ኔራ እያ።

ኡልፍ ክሪስተርሶን ብወገኑ፡ ኣብ ባይቶ ዘድሊ ፖለቲካዊ ደገፍ እንተተረኺቡ፡ ዘይሶሻሊስታዊ ብዙሓት ድምጺ ዝድግፍዎ መንግስቲ ንምምስራት ድሉው ምዃኑ ገሊጹ። ይኹን እምበር፡ ኣብዚ እዋን እዚ ከምዚ ዝበለ ብዙሓት ድምጺ ዘለዎ ፖለቲካዊ ደገፍ ከም ዘየለ ንሱ ባዕሉ ኣረጋጊጹ።

ኤሊሳቤት ታንድ ሪንግክቪስት ቀዳመይቲ ሚኒስተር ኮይና ተመሪጻ ማለት ግን ኣይኮነን። ኣብዚ እዋን እዚ ዝተዋህባ ሓላፍነት፡ ሓድሽ መንግስቲ ንምምስራት ዘኽእል ደገፍ ኣብ ባይቶ ክርከብ ይኽእል ድዩ ንምጽናዕ ጥራይ ምዃኑ ምፍላጥ ኣገዳሲ እዩ።

ድሕሪ እዚ ናይ ሎሚዓንቲ ዉሳነ ኣፈጉባኤ ሽወደን መራሕቲ ሰልፍታት ሽወደን እንታይ በሉ?
1. መራሒት ሰልፊ KD ኤባ ቡሽ፡ «ኣፈ-ጉባኤ ባይቶ ጥበብ ዝተሓወሶ ውሳነ ወሲኑ»
መራሒት ሰልፊ ክርስትያን ዲሞክራተርና (Kristdemokraterna – KD) ኤባ ቡሽ (Ebba Busch)፡ ኣፈ-ጉባኤ ባይቶ ሽወደን ኣንድርያስ ኖርለን (Andreas Norlén)፡ ንመራሒት Centerpartiet ኤሊሳቤት ታንድ ሪንግክቪስት (Elisabeth Thand Ringqvist) መንግስቲ ንምምስራት ዘኽእል ፖለቲካዊ ደገፍ ንኽትምርምር ሓላፍነት ምሃቡ፡ ጥበብ ዝተሓወሶ ዉሳነ ምዃኑ ገሊጻ።

ኤባ ቡሽ ኣብ ማሕበራዊ መራኸቢ X ኣብ ዘስፈረቶ ጽሑፍ ከምዚ ኢላ፦

«ሽወደን ክሳብ ሕጂ ሓድሽ መንግስቲ ከይመስረተት ናብ ሻድሻይ ሰሙን ኣቲና ኣለና። ስለዚ፡ መስርሕ ምምስራት መንግስቲ ናብ ቅድሚት ክስጉም ኣገዳሲ እዩ።

ኣፈ-ጉባኤ ባይቶ፡ ንኤሊሳቤት ታንድ ሪንግክቪስት ቀዳማይ ዕድል ሂቡ፡ ማእከላይ ኣንፈት ዘለዎ መንግስቲ ወይ ካልእ ጥምረት ሰልፍታት ዝሓቖፈ መንግስቲ ክምስረት ይኽእል ድዩ ንኽትምርምር ሓላፍነት ምሃቡ፡ ጥበባዊ ውሳነ እዩ ኢለ እኣምን።»

2. ኡልፍ ክሪስተርሾን (M)፡ «ውሳነ ኣፈ-ጉባኤ ባይቶ ርትዓዊ እዩ»

መራሒ ሰልፊ Moderaterna ኡልፍ ክሪስተርሾን (Ulf Kristersson) ብወገኑ፡ ብዛዕባ ውሳነ ኣፈ-ጉባኤ ባይቶ ርእይቶኡ ሂቡ። ንሱ ብተወሳኺ ከምዚ ኢሉ፦ «ውሳነ ኣፈ-ጉባኤ ባይቶ ርትዓውን ምኽንያታውን እዩ። ማግዳሌና ኣንደርሶን (Magdalena Andersson) መንግስቲ ክትምስርት ኣለዋ ዝበሉ ፖለቲካዊ ሰልፍታት፡ ክሳብ ሕጂ 176 መናብር ኣብ ባይቶ ኣለዎም። እዚ ድማ ኣብ ባይቶ ብዙሓት ድምጺ ከም ዘለዎም የመልክት።

ስለዚ፡ እዞም ሰልፍታት ናይ ጸጋም ፖለቲካዊ ወገን መንግስቲ ንምምስራት ዘለዉ ኩሎም ኣማራጺታት ክሳብ መወዳእታ ክፍትኑ ዕድል ምሃብ ርትዓዊ እዩ።» ኢሉ።

3. ሲሞና ሞሃምሾን (L)፡ «ጽቡቕ ውሳነ እዩ»

መራሒት ሰልፊ ሊበራለርና (Liberalerna – L) ሲሞና ሞሃምሾን (Simona Mohamsson) ፡ ንኤሊሳቤት ታንድ ሪንግክቪስት ናይ መንግስቲ ምምስራት ዕድላት ንኽትምርምር ሓላፍነት ምውሃቡ ጽቡቕ ምዃኑ ገሊጻ። ንሳ ኣብ ማሕበራዊ መራኸቢ X ከምዚ ኢላ፦

«ሕጂ ኤሊሳቤት ታንድ ሪንግክቪስት ናይ መንግስቲ ምምስራት ዕድላት ንኽትምርምር ሓላፍነት ተዋሂብዋ ኣሎ። እዚ ጽቡቕ እዩ። ምኽንያቱ፡ ኩሎም ዘይሶሻሊስታዊ ፖለቲካዊ ሰልፍታት ኣብ ዙርያ ኡልፍ ክሪስተርሶን ክጥርነፉን መንግስቲ ንምምስራት ደገፍ ክህቡን ይኽእሉ ድዮም ዝብል ንምፍላጥ ዕድል ይህበና።

ዕላማ ናይዚ መስርሕ፡ ብሰልፊ Socialdemokraterna ዝምራሕ መንግስቲ ንምምስራት ደገፍ ምርካብ እንተኾይኑ ግን፡ ሰልፊ Liberalerna ኣብ ተቓውሞ (Opposition) ኮይኑ ንሽወደን ሓላፍነት ብኸመይ ከም ዝወስድ ከብርህ እየ።» ኢላ።

ብሓጺሩ!

ብዛዕባ ሓድሽ መንግስቲ ሽወደን ምምስራት፡ መራሕቲ KD፣ Mን Lን ነቲ ኣፈ-ጉባኤ ባይቶ ዝወሰኖ ውሳነ ኣወንታዊ ምዃኑ ገሊጾም። ይኹን እምበር፡ ብዛዕባ ኣየኖት ሰልፍታት ብሓባር መንግስቲ ክምስርቱ ከም ዘለዎም፡ ዝተፈላለየ መርገጺ እዩ ዘለዎም። እቲ ቀጻሊ ኣገዳሲ ዕለት 26 ጥቅምቲ 2026 እዩ። ኣብዚ ዕለት እዚ፡ ኤሊሳቤት ታንድ ሪንግክቪስት ውጽኢት ምይይጣ ንኣፈ-ጉባኤ ባይቶ ከተቕርብ እያ።

ተኽለወይኒ ኣስመላሽ
19 ጥቅምቲ 2026

18/10/2026

ካብ 1 ለካቲት 2027 ሓዱሽ ሕጊ ናይ ስራሕ ፍቓድ (Arbetstillstånd) ኣብ ሽወደን!

መንግስቲ ሽወደን፡ ካብ ሃገራት ኤውሮጳዊ ሕብረት ወጻኢ መጺኦም ኣብ ሽወደን ብፍቓድ ስራሕ (Arbetstillstånd) ዝሰርሑ ሰባት፡ ብቐሊሉ ስራሕን ኣስራሕትን ክቕይሩ ዘኽእል ሓድሽ ለውጢ ሕጊ ኣቕሪቡ ኣሎ።

እዚ ሓዱሽ እማመ ብ 8 ሓምለ 2026 ዝቐረበ ኮይኑ፡ ካብ 1 ለካቲት 2027 ኣብ ተግባር ክውዕል ተመዲቡ ኣሎ። እንተኾነ፡ እዚ ገና እማመ እምበር ክሳብ ሕጂ ከም ሕጂ ኣይጸደቐን ዘሎ። ኣብ ተግባር ቅድሚ ምውዓሉ ጌና ሕጋዊ ኮይኑ ክጸድቕ ኣለዎ።

1. ብዘይ ሓድሽ ናይ ስራሕ ፍቓድ ዝፍጸም ምሕታት ኣስራሒ ምቕያር

ብመሰረት እዚ ሕጂ ዘሎ ሕጊ፡ ናይ ስራሕ ፍቓድ ኣብ ገለ ኩነታት ምስ ዝተወሰነ ኣስራሒን ዓይነት ስራሕን ዝተኣሳሰረ እዩ። ስለዚ ኣስራሒ ወይ ዓይነት ስራሕ ክቕይር ዝደሊ ሰብ፡ ሓድሽ ናይ ስራሕ ፍቓድ ከመልክት ይግደድ እዩ።

• ብመሰረት እቲ ሓድሽ ቀሪቡ ዘሎ እማመ ኸኣ፡ ፍቓድ ስራሕ ምስ ሓደ ዝተወሰነ ኣስራሒ ወይ ዓይነት ስራሕ ጥራይ ዝተኣሳሰረ ኣይክኸውንን እዩ። ሕጋዊ ዘይወደቐ ናይ ስራሕ ፍቓድ ዘለዎ ሰብ፡ ሓድሽ ናይ ስራሕ ፍቓድ ከየመልከተ ኣስራሒኡ ክቕይር ክኽእል እዩ። እንተኾነ፡ ሓድሽ ስራሕ ምስ ጀመረ ንበዓል መዚ ኢሚግሬሽን ሽወደን (Migrationsverket) ከፍልጥ ክግደድ እዩ።

2. ስራሕ ዝሰኣኑ ሰባት ሓድሽ ስራሕ ንምድላይ ዝወሃቦም ግዜ ክናዋሕ እዩ

ብመሰረት እቲ ሕጂ ዘሎ ሕጊ፡ ኣብ ሽወደን ናይ ስራሕ ፍቓድ ዘለዎ ሰብ ፡ ስርሑ እንተቋሪጹ ወይ እንተስኢኑ፡ ኣብ ውሽጢ ሰለስተ ወርሒ ሓድሽ ስራሕ ንምርካብ ዕድል ኣለዎ።

ብመሰረት እቲ ሓድሽ ሕጊ ግን፡ ንልዕሊ ክልተ ዓመት ፍቓድ ስራሕ ዝነበሮም ሰባት፡ ስራሕ ብዝኾነ ምኽንያት እንተቋሪጾም፡ ሓድሽ ስራሕ ንምድላይ ክሳብ ሽዱሽተ ወርሒ ግዜ ክወሃቦም ይኽእል። እዚ ናይ 6 ወርሒ ስራሕ ናይ ምድላይ ዕድል ነቶም ኣብ ሽወደን ካብ 2 ዓመት ንላዕሊ ናይ ስራሕ ፍቓድ ዝነብሮም እሞ ክሰርሑ ዝጸንሑ ሰባት ጥራሕ እዩ ዝምልከት።

3. Migrationsverket ሓበሬታ ምሃብ ግዴታ ክኸውን እዩ

ብመሰረት እቲ ሓድሽ ሓሳብ ሕጊ፡ ናይ ስራሕ ፍቓድ ዘለዎ ሰብ ኣብዞም ዝስዕቡ ኩነታት ንMigrationsverket ከፍልጥ ኣለዎ፦

• ስርሑ ምስ ወድአ ወይ ምስ ተቛረጸ።

• ኣብ ሓድሽ ቦታ ስራሕ ምስ ጀመረ።

እዚ ግዴታ ዘይምፍጻም፡ ኣብ ናይ ቀጻሊ ምምልካት ናይ ስራሕ ፍቓድ ወይ ኣብ መጻኢ ናይ ምንዋሕ መመልከቲ ኣሉታዊ ጽልዋ ከሕድር ይኽእል እዩ።

እቲ ሓድሽ ሕጊ ብኣብነት ንርኣዮ
ቀዳማይ ኣብነት፦

ሓደ ሰብ ኣብ ሽወደን ከም ናይ ኽሽነ ሰራሕተኛ (K**k) ይሰርሕ ኣሎ። ዘይወደቐ ናይ ስራሕ ፍቓድ ኣለዎ። ካብ ዝሰርሓሉ ዘሎ ቤት መግቢ ናብ ካልእ ቤት መግቢ ክቕይር ይደሊ።
ብመሰረት እቲ ሓድሽ ሓሳብ ሕጊ፡ ኣስራሒኡ ብምቕያሩ ጥራይ ሓድሽ ፍቓድ ስራሕ ከመልክት ኣየድልዮን። እንተኾነ፡ ሓድሽ ስራሕ ምጅማሩ ን Migrationsverket ከፍልጥ ኣለዎ።

ካልኣይ ኣብነት፦

ሓደ ሰብ ኣብ ሽወደን ንሰለስተ ዓመት ናይ ስራሕ ፍቓድ ተዋሂቡ ክሰርሕ ድሕሪ ምጽናሕ፡ ሃንደበት ካብ ስራሕ ደው ይብል። ብመሰረት እቲ ሓድሽ ሕጊ፡ ዝተወሰኑ ቅድመ ኩነታት እንተማሊኡ፡ ሓድሽ ስራሕ ንምድላይ ክሳብ ሽዱሽተ ወርሒ ግዜ ክህልዎ ይኽእል።

እዚ ሓዱሽ ሕጊ ካብ 1 ለካቲት 2027 ኣብ ተግባር ክውዕል ተስፋ ተነቢርሉ ኣሎ። እዚ ሓዱሽ ሕጊ ብቐንዱ እቶም ካብ ኤውሮጳዊ ሕብረትን EESን ወጻኢ ዝመጹ፡ ብመሰረት ሕጊ ናይ ስራሕ ኢሚግሬሽን ፍቓድ ስራሕ ዝተዋህቦም ሰባት እዩ ዝምልከት።

ተኽለወይኒ ኣስመላሽ
18 ጥቅምቲ 2026

17/10/2026

ኣገዳሲ መጠንቀቕታ ካብ ፖሊስ ሽወደን !

ብዙሓት ሰባት ናይ ሓሶት ክዳን ናይ ፖሊስ ተኸዲኖም፡ ፖሊስ ተመሲሎም ዘረፋን ስርቅን ይፍጽሙ ከም ዘለዉ ፖሊስ ሽወደን ንህዝቢ ኣጠንቂቑ ኣሎ።

ትማሊ ዓርቢ 16 ጥቅምቲ 2026 ኣብቲ ናይ ፖሊስ ወግዓዊ መርበብ ሓበሬታ ዝተጻሕፈ መጠንቀቕታ፡ኣብ ብዙሓት ከበቢታታ ሽወደን፡ ብስም ፖሊስ ተመሲሎም ዝፍጸሙ ናይ ምትላል ገበናትን ፈተነታት ምትላልን እናወሰኹ ይኸዱ ስለ ዘለዉ፡ ህዝቢ ኣድላዪ ዘበለ ጥንቃቐን ምክትታልን ክገብር ከም ዘለዎ ኣጠንቂቑ ኣሎ።

ንኣብነት፡ ኣብ ከባቢ Kungsbacka ዝተፈጸሙ ብዙሓት ፈተነታት ምትላል ፖሊስ ድሮ ክምርምሮ ጀሚሩ ከም ዘሎ ሓቢሩ ኣሎ። ብተመሳሳሊ ኣብ Lysekil ዉን ሓደ ሰብ ፡ በዞም ናይ ፖሊስ ክዳን ተኸዲኖም ዘታልሉ ሰረቕቲ፡ ብዙሓት ክቡራት ስልማታትን ካልኦት ክቡራት ንብረታትን በቶም መታለልቲ ተወሲድዎ ኣሎ።

እቶም ሰረቕቲ ነቲ ምትላል ብኸመይ ይጅምርዎ?

1. መጀመርታ ናይ ሓሶት SMS ይልእኹልካ።

እቲ መልእኽቲ ካብ ኩባንያ ህንጻ፡ ካብ ናይ ጸጥታ ኣላርም ኩባንያ ወይ ካብ ካልእ ትካል ዝተላእከ እዩ ይመስል። ኣብቲ ዝሰደዱልካ መልእኽቲ ከኣ፡ ማዕጾ ገዛኻ ወይ ናይ ጸጥታ ኣላርም ክቕየር ከም ዘለዎ ይገልጹልካ። ኣብ ገለ እዋን እቲ ኩባንያ መፍትሕ ናይ ገዛኻ ስለ ዘለዎ፡ኣብ ገዛኻ ክትጸንሕ ከም ዘየድልየካ ይነግሩኻ።

2. ናይቲ ዝተላእከልካ መልእኽቲ መልሲ ክትህብ ወይ ክትድውል ይገብሩኻ።

ንስኻ ድማ እቲ ኩባንያ ብኸመይ መፍትሕ ናይ ገዛኻ ከም ዘለዎ ክትፈልጥ ትደሊ። ብተወሳኺ ንስኻ ባዕልኻ ዘይኣዘዝካዮ ስራሕ ኣብ ገዛኻ ክፍጸም ኣይትደልን። ነዚ ክትገብር ከኣ ንስኻ፡ ናብቲ ዝተላእኸልካ መልእኽቲ መልሲ ወይ ሓበሬታ ክትረክብ ኢልካ፡ ናብቲ ዝተዋህበካ ቁጽሪ ትድውል።

3. ፖሊስ ክሕግዘካ ከም ዝኽእል ይነግሩኻ።

እቲ ናይ ኩባንያ ወኪል መሲሉ ዝዛረበካ ዘሎ ሰብ፡ ጌጋ ከም ዘጋጠመን ነቲ ጉዳይ ንምፍታሕ ፖሊስ ናብቲ ቦታ መጺኦም ክሕግዙ ከም ዝኾኑ ይነግረካ።

4. እቶም ሰረቕቲ ፖሊስ ተመሲሎም፡ ብስም ፖሊስ ይድውሉልካ።

ድሕሪኡ ሓደ ሰብ ፖሊስ ምዃኑ ብምግላጽ ይድውለልካ። እቲ ሰብ ገበን ክፍጸም ከም ዝኽእልን፡ ኣብ ገዛኻ ዘለዉ ክቡራት ንብረትካ ኣብ ሓደጋ ከም ዘለዉን ይነግረካ። ፖሊስ ድማ እቲ ሓደጋ ክሳብ ዝሓልፍ ክቡራት ንብረታትካ ኣብ ውሑስ ቦታ ከቐምጠልካ ከም ዝኽእል ይገልጸልካ።

5. ክቡራት ንብረታትካ ክወስዱ ናብ ገዛኻ ይመጹ።

ድሕሪ ቁሩብ ግዜ ከኣ፡ ሓደ ሰብ ናይ ፖሊስ ክዳን ተኸዲኑ ነቶም ኣብ ገዛኻ ዘለዉ ክቡራት ንብረትካ ንምውሳድ ናብ ገዛኻ ይመጽእ። እንተኾነ እቲ ሰብ ፖሊስ ኣይኮነን። መታለሊ ሰራቒ ሰብ እዩ።

⚠️ ካብ ምትላል ንምድሓን እንታይ ክትገብር ኣለካ?

• ቅድሚ ስጉምቲ ምውሳድካ ተጠንቀቕ። ተሃዊኽካ ውሳነ ኣይትውሰድ። ከምዚ ዓይነት ናይ ተሌፎን ጻዊዒት ክመጸካ ከሎ ቀልጢፍካ ተሌፎን ዕጸዎን ርክብ ኣቋርጽን።

• ሓበሬታ ኣረጋግጽ። ናይቲ ኩባንያ ወይ ናይ ፖሊስ ወግዓዊ ቁጽሪ ተሌፎን ባዕልኻ ድለ። ኣብቲ SMS ዘሎ ቁጽሪ ኣይትጠቐም።

• ንዝኾነ ሰብ ክቡራት ንብረትካ ኣይትሃብ። ሓደ ሰብ ፖሊስ ተመሲሉ ናብ ገዛኻ መጽዩ ወርቂ፡ ገንዘብ ወይ ካልእ ክቡር ንብረት ክወስድ እንተደልዩ፡ ፈጺምካ ኣይትሃቦ።

• ንፖሊስ ቀልጢፍካ ሓብር። ናይ ምትላል ፈተነ ወይ ገበን እንተጋጢሙካ፡ ንፖሊስ ቀልጢፍካ ሓብር። ናብ ፖሊስ ሽወደን ኣብ ዘይህጹጽ ጉዳይ ብቁሪ ተኤፎን 114 14፡ ኣብ ህጹጽ ሓደጋ ከኣ ናብ 112 ደውል።

ፖሊስ ሽወደን እዚ ሓበሬታ ናብ ኩሉ ህዝቢ ክንዝርግሖ ተማሕጺኑ ስለ ዘሎ፡ ናብ ኩሉ ንኽባጻሕ ኩልና share ንግበሮ። ሙሉእ ሓበሬታ ናይ ፖሊስ ኣብ ቦታ ናይ comment ኣለኩም።

ተኽለወይኒ ኣስመላሽ
17 ጥቅምቲ 2026