19/05/2026
സ്കൂൾ തുറക്കും മുമ്പ് കുട്ടികളുടെ കൈയിൽ പാഠപുസ്തകം എത്തുമെന്ന എൽഡിഎഫ് സർക്കാരിന്റെ ഉറപ്പ് ഇത്തവണയും പാലിച്ചു. സ്കൂൾ പാഠപുസ്തകങ്ങളുടെ അച്ചടി പൂർത്തിയായി. വിതരണം അവസാനഘട്ടത്തിൽ. ഒന്ന് മുതൽ 10 വരെ ക്ലാസുകളിലേക്ക് 2026-27 അധ്യയനവർഷം രണ്ട് ഘട്ടങ്ങളിലായി 5,59,00,000 പുസ്തകങ്ങളാണ് അച്ചടിക്കേണ്ടത്. ഇതിൽ ആദ്യ വോള്യമായി വിതരണം ചെയ്യേണ്ടത് 3,57,00,000 പുസ്തകങ്ങളാണ്.
തമിഴ്, കന്നഡ ഭാഷകളിൽ അടക്കമുള്ള 2,86,00,000 പുസ്തകങ്ങളുടെ അച്ചടിയാണ് പൂർത്തീകരിച്ചത്. ഒരാഴ്ചയ്ക്കകം വിതരണം പൂർത്തിയാകും വിധമാണ് ക്രമീകരണം. ജില്ലാ കേന്ദ്രങ്ങളിൽ നിന്ന് സ്കൂൾ സൊസൈറ്റികൾക്കുള്ള വിതരണം കുടുംബശ്രീ മുഖേനയാണ് നടക്കുന്നത്. പ്രവൃത്തിപരിചയ പുസ്തകങ്ങളുടെയും അച്ചടി പുരോഗമിക്കുകയാണ്. ഇത് പൂർത്തിയായാൽ ഒക്ടോബർ മുതൽ കുട്ടികൾക്ക് ആവശ്യമായ രണ്ടാം വോള്യം പുസ്തക അച്ചടിയാരംഭിക്കും. അവധി ദിവസങ്ങളിലും വാരാന്ത്യങ്ങളിലും ഉൾപ്പെടെ ജീവനക്കാർ ജോലി ചെയ്താണ് നേട്ടം കൈവരിച്ചത്.
പുസ്തക അച്ചടിയിൽ പ്രതിസന്ധിയുണ്ടാകാതിരിക്കാൻ വേണ്ട നടപടികൾ എൽഡിഎഫ് സർക്കാർ സമയബന്ധിതമായി സ്വീകരിച്ചിരുന്നു. 2025 ഡിസംബർ മൂന്നാം വാരത്തോടെയാണ് അച്ചടി ജോലികൾ ആരംഭിച്ചത്. തുടർന്ന് ഫെബ്രുവരി 13-ന് മുൻമുഖ്യമന്ത്രി സ. പിണറായി വിജയൻ പാഠപുസ്തക വിതരണത്തിന്റെ സംസ്ഥാനതല ഉദ്ഘാടനം നിർവഹിച്ചിരുന്നു.
