22/08/2025
Lowo okhulumela iNdlunkulu kaZulu uMntwana uThulani Zulu waseZibindini uthi kuliphutha ukuthi isakhiwo esisaqhugwane esisesigodlweni eNyokeni kwaNongoma besakhelwe izintombi zoMkhosi woMhlanga.
Lesakhiwo esidle uhulumeni welikaMthaniya imali engu R140 Million uMntwana Thulani uthi besizokuba indawo yokudlela yezicukuthwane ezihambele uMkhosi woMhlanga njengoba ethi simumatha kuphela abantu ababalelwa ezinkulungwaneni ezimbili okuyisibalo ongasiphinda kaningi ukuze senele izintombi zoMhlanga,
uMageba ukugcizelele ukuthi lesisakhiwo sisazosetshenziselwa izinto ezahlukene ukubamba imihlangano,imibukiso neminye imicimbi enhlobonhlobo kungamampunge ukuthi sebesishaye ngencithakalo basilahlisa okwenyongo yenyathi .UMageba uthi akakholwa ukuthi uhulumeni ubengakha lesakhiwo enzela uMkhosi woMhlanga nje kuphela oba kanye onyakeni ebese sihlala senzani emva kwalapho.
Uqhube ngelokuthi isizathu sokuthuthwa kwalomkhosi usiwe eMashobeni oPhongolo yingoba iNdlulamithi ibingeke ikwazi ukuphahla yenze nezinjula zasesithe eziqondene nalomkhosi emsamo owodwa waseNyokeni obusetshenziswa nguMdlokombane ngakho bekubalulekile ukuba akwenze esigodlweni sakhe.
