07/04/2026
أكتر مشهد مؤثر فى قصة ندى اللى غابت عن أهلها 12 سنه هو منظر أم ندى وهما بيبلغوها إن بنتها عايشه وبيفرجوها على صورتها.. الأم بدون لحظة تفكير دموعها نزلت وفضلت تحضن فى الصوره وتقول أيوه هى دى بنتى نفس الملامح ونفس صورتها اللى رسمتهالها فى خيالى لما كنت اسأل نفسى ياترى شكلها بقى ازاى بعد السنين دى كلها
أبو ندى لما شاف صورة بنته وهما بيبلغوه الخبر جرى بسرعه ودخل البيت جابلهم صورتها وهى صغير وقالهم أيوه هى بنتى أنا كل سنه بكبر حجم الصوره علشان اتخيل شكل بنتى هيبقى ازاى لما تكبر.. أيوه هى دى بنتى هى فين مجبتوهاش معاكم ليه
أما جدة ندى فأخدت الموبايل وفضلت تحضن فى صورة ندى ومافيش على لسانها غير حبيبتى يا بنتى انا كنت عارفه إنى هشوفك قبل ما أموت
المشهد دا أثناء إبلاغهم بإن ندى عايشه هو كان أكتر مشهد أثر فيا وخلى دموعى نزلت.. ألف مبكروك يا ندى عودتك لحضن أمك وأبوكى وأهلك.. وألف مبروك لأهل ندى عودة بنتهم يارب يقدروا يعوضوها عن سنين الغدر اللى فاتت وهى تعوضهم عن حرمانهم منها.. ندى اختفت وهى طفله 7 سنوات ورجعت وهى عروسه 19 سنه.. إدعولهم يا جماعه ربنا يحققلهم السعادة إن شاء الله وتكون لمتهم من جديد كلها خير وموده.
وفى النهاية لازم نشكر كل من كان سبب فى عودة ندى لأهلها وللى ميعرفش قصة ندى فملخصها كالتالى:
في أبريل 2014، ندى كانت نازلة تشتري حاجات للبيت في منطقة الظاهر، وحصلت خـ.ناقة كبيرة في الشارع. وسط الزحمة والدربكة.. واحده عاملة النظافة خطـ ـفتها وغابت عن الأنظار. الخاطـ ـفة مكنتش بس بتخبيها، دي زورت أوراق ونسبتها لجوزها، وعيشتها في ذل وحبستها 3 سنين، وبعدها نزلتها تشحت بيها في الشوارع.
في رمضان اللي فات، مسلسل حكاية نرجس كان بيعرض قضايا خطـ ـف الأطـ.فال. "أحمد" جوز بنت الخاطـ ـفة شاف المسلسل وشك في الحكاية كلها، خصوصاً لما اكتشف إن أوراق البنت مزورة. الراجل مكدبش خبر وتواصل مع صفحة "أطفال مفقودة" وحكى كل التفاصيل اللي كانت متطابقة تماماً مع مواصفات ندى.
تم إبلاغ الداخلية اللى كثفت التحريات وقبضت على المتهمة اللي اعترفت بكل حاجة. وبعد عمل تحليل الـ DNA، تم التأكيد جه إن ندى هي بنت أسرة الظاهر فعلاً. المشهد كان يقطع القلب.. دموع وفرحة ولقاء بعد سنين طويلة من الوجـ ـع والدعاء.
