Ministria për Punë, Familje dhe Vlerat e Luftës Çlirimtare

11/09/2026

Përmbyllet punëtoria për finalizimin e Projekt-Rregullores për Masat Aktive të Tregut të Punës

Më 10 dhe 11 shtator 2026 u zhvillua punëtoria për hartimin dhe finalizimin e Projekt-Rregullores për Masat Aktive të Tregut të Punës.

Përmes Projekt-Rregullores synohet krijimi i një qasjeje më të efektshme dhe më të targetuar ndaj personave të papunë dhe punëkërkuesve, duke mundësuar përfshirjen e tyre më të madhe dhe më të qëndrueshme në tregun e punës.

Përmes diskutimit të propozimeve dhe përcaktimit të përmbajtjes përfundimtare, punëtoria kontribuoi në finalizimin dhe harmonizimin e mëtejshëm të Projekt-Rregullores.

I pranishëm ishte edhe Ministri për Punë, Familje dhe Vlera të Luftës Çlirimtare, z. Andin Hoti, i cili theksoi nevojën për avancimin e politikave aktive të punësimit dhe krijimin e mekanizmave më efikasë për mbështetjen e punëkërkuesve dhe integrimin e tyre në tregun e punës.

Finalizimi i Projekt-Rregullores për Masat Aktive të Tregut të Punës krijon bazën për një qasje më të strukturuar në zbatimin e masave të punësimit dhe për rritjen e mundësive të përfshirjes së punëkërkuesve në tregun e punës.

11/09/2026

07/09/2026

Lansohet Udhëzuesi për Profilizimin, Vlerësimin e Nevojave dhe Fuqizimin e Vazhdueshëm të Familjeve në Skemën e Ndihmës Sociale

Qëllimi i Udhëzuesit është të standardizojë mënyrën e punës, të sigurojë trajtim të barabartë, të qartësojë përgjegjësitë dhe të krijojë lidhje funksionale ndërmjet Skemës së Ndihmës Sociale, Qendrave për Punë Sociale, Agjencisë së Punësimit, komunave dhe ofruesve të tjerë të shërbimeve.

Hartimi është iniciuar nga Ministria për Punë, Familje dhe Vlerat e Luftës Çlirimtare, përkatësisht nga Departamenti i Skemave Sociale, në kuadër të procesit të profilizimit të familjeve përfituese të Skemës së Ndihmës Sociale dhe vlerësimit të nevojave të tyre.

Udhëzuesi është hartuar në kuadër të projektit “Drejtësia sociale për Romët, Ashkalinjtë dhe Egjiptianët në Kosovë”, i implementuar nga Terre des hommes Lausanne në Kosovë, në partneritet me Zërin e Romëve, Ashkalinjve dhe Egjiptianëve (VoRAE) dhe Swiss Church Aid (HEKS/EPER), me mbështetjen e Agjencisë Zvicerane për Zhvillim dhe Bashkëpunim (SDC).

26/08/2026

📢 Aftësim Profesional FALAS në Qendrën për Aftësim Profesional në Gjilan

Të rinjtë, të rejat dhe të gjithë qytetarët e Rajonit të Gjilanit që dëshirojnë të fitojnë aftësi të reja profesionale dhe të pajisen me certifikatë, kanë mundësi të përfshihen në grupet e reja të trajnimeve në Qendrën për Aftësim Profesional (QAP) në Gjilan.

📅 Nga 1 shtatori 2026, QAP Gjilan fillon trajnime të reja në këto profile:

📊 Kontabilitet
🎨 Dizajn Grafik
👨‍🍳 Kuzhinieri
🧵 Rrobaqepësi
🔧 Metalpunues & Saldues
🪵 Zdrukthëtari

🎓 Trajnimet janë pa pagesë, profesionale dhe të përshtatura me nivelin dhe nevojat e tregut të punës.

Pjesëmarrësit që përfundojnë me sukses trajnimin dhe plotësojnë kriteret e vlerësimit pajisen me certifikatë, duke dëshmuar aftësimin e tyre në profesionin përkatës.

Referimi dhe Aplikimi bëhet përmes Zyrave të Punësimit në komuna tjera dhe ato rajonale në:

Zyra e Punësimit në Gjilan
Tel: +383280440057

Zyra e Punësimit në Kamenicë
Tel: +383280372383

Zyra e punësimit në Viti
Tel: +383280381084

Për më shumë informacione:

Qendra e Aftësimit Profesional - Gjilan

+383 280 310 230
📍 Adresa: Rr. “Vjosa” 108, Gjilan

Aftësitë e fituara u krijojnë pjesëmarrësve mundësi për punësim, zhvillim profesional dhe integrim në tregun e punës.

25/08/2026

📢 Ekzekutohen pagesat për Masat Aktive të Tregut të Punës dhe Pushimin e Lehonisë

Ministria për Punë, Familje dhe Vlerat e Luftës Çlirimtare njofton se janë ekzekutuar pagesat për përfituesit e Masave Aktive të Tregut të Punës, si dhe pagesat për Pushimin e Lehonisë.

12/08/2026

Ministri Hoti priti në takim Ministrin e Administrimit të Pushtetit Lokal, z. Elbert Krasniqi

Njoftimi i plotë i Ministrit:

Me Ministrin e Administrimit të Pushtetit Lokal, kolegun Elbert Krasniqi, zhvilluam sot një takim koordinues për të konkretizuar bashkëpunimin ndërmjet nivelit qendror dhe atij lokal në fushën e punësimit dhe aftësimit profesional.

Diskutuam për mënyrën se si, në bashkëpunim me komunat, mund t’i afrojmë edhe më shumë te qytetarët shërbimet dhe mundësitë që ofron Agjencia e Punësimit e Republikës së Kosovës, nga ndërmjetësimi në punësim dhe orientimi në karrierë, deri te programet e aftësimit profesional dhe masat aktive të tregut të punës.

Një vëmendje të veçantë i kushtuam rritjes së përfshirjes së pjesëtarëve të komuniteteve në tregun e punës dhe koordinimit me komunat për identifikimin dhe adresimin e nevojave konkrete për punësim dhe aftësim.

Qëllimi ynë është i qartë: mundësitë që krijojmë në nivel qendror t’i bëjmë sa më të qasshme për qytetarët në secilën komunë të Kosovës.

21/07/2026

33 zyrtarë të punësimit certifikohen për ofrimin e shërbimeve më cilësore për qytetarët

Sot, në Universitetin e Prishtinës u mbajt ceremonia e ndarjes së certifikatave për pjesëmarrësit e programit "Job Placement Counselling", në kuadër të së cilës 33 zyrtarë të Agjencisë së Punësimit të Republikës së Kosovës (APRK) përfunduan me sukses trajnimin profesional të avancuar për këshillim dhe ndërmjetësim në punësim.

Programi u realizua në bashkëpunim ndërmjet Ministrisë për Punë, Familje dhe Vlerat e Luftës Çlirimtare, Agjencisë së Punësimit të Republikës së Kosovës, Universitetit të Prishtinës, GIZ Kosovo dhe Institutit të Shkencave të Aplikuara të Agjencisë Federale të Punësimit të Gjermanisë (INfaBW).

Trajnimi u zhvillua nga 20 prilli deri më 3 korrik 2026 dhe përfshiu 300 orë pune (12 ECTS), duke kombinuar ligjëratat, ushtrimet praktike, vetëstudimin dhe praktikën profesionale.

Përmes këtij programi, zyrtarët e punësimit kanë avancuar njohuritë dhe kompetencat e tyre në këshillimin e punë kërkuesve dhe ndërmjetësimin në punësim, me qëllim ofrimin e shërbimeve më profesionale dhe më efikase për qytetarët dhe bizneset.

Investimi në zhvillimin profesional të zyrtarëve të punësimit është investim në cilësinë e shërbimeve publike. Përmes ngritjes së kapaciteteve të stafit të APRK-së, qytetarët do të kenë qasje në këshillim më cilësor, orientim më të mirë profesional dhe mbështetje më efektive në gjetjen e një vendi pune, ndërsa bizneset do të kenë shërbime më efikase në identifikimin e fuqisë punëtore.