Autoriteti Kosovar i Konkurrencës

09/09/2026

AKRK dhe KRPP thellojnë bashkëpunimin për mbikëqyrjen e konkurrencës në prokurimin publik

Sot, Kryetarja e Autoritetit të Konkurrencës së Republikës së Kosovës (AKRK), znj. Neime Binaku Isufi, priti në takim Kryetarin e Komisionit Rregullativ të Prokurimit Publik (KRPP), z. Osman Vishaj.

Në takim u diskutua për rëndësinë e bashkëpunimit institucional në mbikëqyrjen e proceseve të prokurimit publik nga aspekti i respektimit të rregullave të konkurrencës.

Vëmendje e veçantë iu kushtua identifikimit dhe parandalimit të praktikave antikonkurruese, përfshirë koordinimin e ofertave (bid rigging), si një nga format më serioze të cenimit të konkurrencës në procedurat e tenderimit.

U theksua nevoja për shkëmbim të informacionit dhe ekspertizës ndërmjet dy institucioneve, me qëllim të identifikimit të hershëm të indikatorëve të mundshëm të koordinimit ndërmjet operatorëve ekonomikë.

AKRK dhe KRPP shprehën gatishmërinë për forcimin e bashkëpunimit institucional dhe zhvillimin e mekanizmave të përbashkët që të kontribuojnë në një proces prokurimi më konkurrues, transparent dhe efikas.

Ky bashkëpunim synon të kontribuojë në mbrojtjen e konkurrencës, rritjen e efikasitetit të shpenzimit të parasë publike dhe mbrojtjen e interesit të përgjithshëm.

07/09/2026

AKRK dhe Departamenti Qendror për Partneritet Publiko-Privat nga Ministria e Financave forcojnë bashkëpunimin institucional për një treg konkurrues dhe transparent.

Në kuadër të aktiviteteve për forcimin dhe avancimin e bashkëpunimit ndërinstitucional, përfaqësues të Autoritetit të Konkurrencës të Republikës së Kosovës (AKRK) zhvilluan një takim pune me përfaqësues të Departamentit Qendror për Partneritet Publiko-Privat (PPP), në kuadër të Ministrisë së Financave

Në takim morën pjesë Drejtori i Departamentit të Mbikëqyrjes së Tregut në AKRK, z. Besar Gashi, dhe eksperti i konkurrencës, z. Egzon Berisha, të cilët u pritën nga Drejtori i Departamentit Qendror për Partneritet Publiko-Privat z. Petrit Pantina dhe Udhëheqësi i Divizionit për Monitorimin e Partneriteteve Publiko-Private, z. Kushtrim Osjeku.

Takimi kishte për qëllim forcimin e bashkëpunimit dhe koordinimit ndërmjet institucioneve, veçanërisht në çështjet që ndërlidhen me funksionimin e tregjeve, zbatimin dhe monitorimin e partneriteteve publiko-private, si dhe promovimin e konkurrencës së lirë dhe efektive.

Gjatë takimit u diskutua për zhvillimet në fushën e partneriteteve publiko-private, mekanizmat e monitorimit dhe mbikëqyrjes, si dhe mundësitë për avancimin e bashkëpunimit institucional përmes shkëmbimit të informacionit, ekspertizës dhe praktikave profesionale.

Në fokus të diskutimeve ishin çështjet që lidhen me konkurrencën në procedurat dhe tregjet përkatëse, transparencën dhe kushtet e konkurrimit ndërmjet operatorëve ekonomikë, mundësitë për pjesëmarrjen e operatorëve të rinj në treg, si dhe identifikimi i barrierave apo praktikave që mund të ndikojnë në konkurrencën efektive.

Palët vlerësuan rëndësinë e bashkëpunimit të vazhdueshëm ndërinstitucional dhe shprehën gatishmërinë për ndërmarrjen e hapave konkretë në identifikimin dhe adresimin e çështjeve me interes të përbashkët, duke respektuar kompetencat dhe përgjegjësitë ligjore të secilit institucion.

Bashkëpunimi ndërmjet institucioneve synon të kontribuojë në rritjen e transparencës, promovimin e konkurrencës së lirë dhe efektive, përmirësimin e mekanizmave të monitorimit dhe krijimin e kushteve të barabarta për operatorët ekonomikë, në funksion të një tregu më funksional dhe zhvillimit të qëndrueshëm ekonomik në Republikën e Kosovës.

03/09/2026

AKRK dhe AAC forcojnë bashkëpunimin institucional për një treg konkurrues të aviacionit civil

Në kuadër të aktiviteteve për forcimin dhe avancimin e bashkëpunimit ndërinstitucional, përfaqësues të Autoritetit të Konkurrencës të Republikës së Kosovës (AKRK) zhvilluan një takim pune me përfaqësues të Autoritetit të Aviacionit Civil të Kosovës (AAC).

Në takim morën pjesë Drejtori i Departamentit të Mbikëqyrjes së Tregut në AKRK, z. Besar Gashi, dhe eksperti i konkurrencës, z. Egzon Berisha, të cilët u pritën nga Drejtoresha e Departamentit për Bashkëpunim Ndërkombëtar dhe Rregullim Ekonomik të Aviacionit, znj. Besnike Ukmata, si dhe u.d. Drejtori i Departamentit të Aerodromeve, z. Emir Hiseni.

Takimi kishte për qëllim forcimin e bashkëpunimit dhe koordinimit ndërmjet institucioneve, veçanërisht në çështjet që ndërlidhen me funksionimin dhe zhvillimin e tregut të aviacionit civil në Republikën e Kosovës.

Gjatë takimit u diskutua për zhvillimet në tregun e aviacionit civil, si dhe për mundësitë e avancimit të bashkëpunimit përmes shkëmbimit të informacionit, ekspertizës dhe praktikave profesionale.

Në fokus të diskutimeve ishin çështjet që lidhen me konkurrencën në treg, dinamikën e çmimeve dhe tarifave të shërbimeve, kushtet e konkurrimit ndërmjet operatorëve ajrorë, si dhe mundësitë dhe sfidat që lidhen me hyrjen e operatorëve të rinj në treg.

Palët vlerësuan rëndësinë e bashkëpunimit të vazhdueshëm ndërinstitucional dhe shprehën gatishmërinë për ndërmarrjen e hapave konkretë në identifikimin dhe adresimin e çështjeve me interes të përbashkët, duke respektuar kompetencat dhe përgjegjësitë ligjore të secilit institucion.

Bashkëpunimi ndërmjet institucioneve synon të kontribuojë në forcimin e konkurrencës së lirë dhe efektive, rritjen e transparencës dhe krijimin e një tregu funksional të aviacionit civil, në interes të konsumatorëve dhe zhvillimit të qëndrueshëm të tregut në Republikën e Kosovës.

01/09/2026

24/07/2026

Reagim zyrtar

Autoriteti i Konkurrencës i Republikës së Kosovës shpreh keqardhje për deklaratat e znj. Janina Ymeri, të cilat përmbajnë pretendime të pavërteta dhe krijojnë një perceptim të gabuar në opinionin publik lidhur me punën dhe kompetencat e institucionit.

Për hir të informimit të drejtë dhe objektiv të qytetarëve, sqarojmë se gjatë gjithë javës inspektorët e Autoritetit kanë qenë të angazhuar në terren në kuadër të aktiviteteve mbikëqyrëse dhe mbledhjen e të dhënave në sektorin e grumbullimit të qumështit dhe grurit, në përputhje me planin e punës dhe kompetencat ligjore të institucionit.

Në asnjë rast Autoriteti i Konkurrencës nuk ka autorizuar apo angazhuar inspektorët e tij për të ndërmarrë veprime ndaj sh*tësve ambulantë përgjatë rrugëve të Prevallës apo në ndonjë zonë tjetër të Kosovës. Pretendimet se Autoriteti është marrë me aktivitetin e sh*tësve të flijave janë tërësisht të pavërteta dhe nuk mbështeten në asnjë fakt.

Po ashtu, insinuatat se Autoriteti nuk vepron ndaj rasteve të mundshme të kufizimit të konkurrencës apo se brenda institucionit zhvillohen veprime të paligjshme janë deklarata të pavërteta. Autoriteti ushtron mandatin e tij në mënyrë të pavarur, në përputhje me legjislacionin në fuqi, dhe çdo procedurë zhvillohet mbi bazën e fakteve, analizave dhe standardeve ligjore.

Institucionet publike dhe "përfaqësuesit e zgjedhur" kanë përgjegjësi të veçantë që deklaratat e tyre të jenë të sakta, të verifikuara dhe të mos dezinformojnë opinionin publik. Debati politik është legjitim, por ai nuk duhet të ndërtohet mbi pretendime të pasakta që cenojnë besimin e qytetarëve në institucionet publike.

Autoriteti i Konkurrencës mbetet i përkushtuar në zbatimin e ligjit, mbrojtjen e konkurrencës së lirë dhe të ndershme, si dhe në informimin transparent të publikut mbi aktivitetin e tij. Njëkohësisht, rezervon të drejtën të ndërmarrë hapat e nevojshëm ligjor ndaj çdo pretendimi të pavërtetë që dëmton reputacionin dhe integritetin e institucionit.

Me respekt.

30/06/2026

Kryetarja e Autoritetit të Konkurrencës raporton para Komitetit për Stabilizim-Asociim të Bashkimit Evropian

Kryetarja e Autoritetit të Konkurrencës së Republikës së Kosovës, znj. Neime Emi Binaku Isufi, sot ka raportuar para përfaqësuesve të Komisionit Evropian në kuadër të takimit të Komitetit për Stabilizim-Asociim, lidhur me zhvillimet, progresin dhe sfidat në fushën e konkurrencës në Republikën e Kosovës.

Gjatë prezantimit, znj. Binaku-Isufi paraqiti aktivitetet kryesore të Autoritetit gjatë viteve 2024–2025, duke theksuar përkushtimin institucional për përafrimin e vazhdueshëm të legjislacionit dhe praktikave vendimmarrëse me acquis-in e Bashkimit Evropian në fushën e konkurrencës.

Në fokus të raportimit ishin rezultatet konkrete në zbatimin e Ligjit për Mbrojtjen e Konkurrencës, përfshirë aktivitetet në fushën e hetimeve antitrust, kontrollit të përqendrimeve, mbrojtjes nga abuzimi me pozitën dominuese, si dhe masat për parandalimin e marrëveshjeve të ndaluara dhe kurdisjes së ofertave në prokurimin publik.

Gjatë periudhës raportuese, Autoriteti ka forcuar kornizën institucionale përmes miratimit të akteve nënligjore, udhëzimeve dhe udhëzuesve, si dhe përmes bashkëpunimit të zgjeruar me institucione vendore dhe ndërkombëtare. Gjithashtu, janë prezantuar rezultatet e punës në kontrollin e përqendrimeve, ku gjatë vitit 2025 është shënuar aktivitet rekord në trajtimin e njoftimeve për përqendrime.

Kryetarja e Autoritetit theksoi rëndësinë e aktiviteteve të avokimit dhe ndërgjegjësimit për kulturën e konkurrencës, përfshirë bashkëpunimin me institucionet e prokurimit publik, trajnimin e zyrtarëve publikë për identifikimin e praktikave antikonkurruese dhe promovimin e mekanizmave ligjorë për luftimin e karteleve.

Një pjesë e rëndësishme e raportimit iu kushtua edhe bashkëpunimit institucional me Komisionin Rregullativ të Prokurimit Publik (KRPP), Organin Shqyrtues të Prokurimit (OShP), Komisionin e Pavarur të Mediave (KPM), si dhe institucione të tjera relevante, me qëllim forcimin e mekanizmave për mbrojtjen e konkurrencës në tregjet e Kosovës.

Në këtë takim u prezantuan edhe sfidat me të cilat është përballur Autoriteti gjatë periudhës së fundit, përfshirë kufizimet institucionale të shkaktuara nga mungesa e kuorumit në Komisionin e Konkurrencës, si dhe ndikimin e këtyre rrethanave në proceset vendimmarrëse.

Pavarësisht sfidave, Autoriteti i Konkurrencës vazhdon të mbetet i përkushtuar në përmbushjen e mandatit të tij ligjor, në garantimin e një tregu konkurrues, transparent dhe në përputhje me standardet evropiane.

Raportimi në kuadër të Komitetit për Stabilizim-Asociim paraqet një mundësi të rëndësishme për të reflektuar mbi progresin e arritur dhe për të vazhduar bashkëpunimin me institucionet e Bashkimit Evropian në procesin e integrimit evropian të Republikës së Kosovës.

19/06/2026

Me rastin e Ditës Ndërkombëtare të Shërbimit Publik, e cila shënohet më 23 qershor, Ministria e Administratës Publike dhe Digjitalizimit ka ndarë mirënjohje për shërbyesit civilë të dalluar, ku është përfshirë edhe zyrtarja e Autoritetit të Konkurrencës së Republikës së Kosovës, znj. Iliriana Hysa Bela.

Ky vlerësim reflekton përkushtimin, profesionalizmin dhe integritetin e dëshmuar gjatë ushtrimit të detyrave në shërbimin publik, si dhe kontributin në përmbushjen e misionit institucional të Autoritetit të Konkurrencës.

Autoriteti i Konkurrencës vlerëson rëndësinë e angazhimit të vazhdueshëm të zyrtarëve publikë në ndërtimin e një administrate profesionale, të përgjegjshme dhe të orientuar drejt interesit publik.

Ky vlerësim përbën një shembull të rëndësisë së meritokracisë dhe standardeve profesionale në shërbimin civil.

22/05/2026

Kryetarja e Autoritetit të Konkurrencës së Republikës së Kosovës znj. Neime Emi Binaku Isufi mori pjesë në konferencën për lansimin e procesit të Vlerësimit të Rrezikut të Korrupsionit në fushën e prokurimit publik, organizuar nga Agjencioni Kundër Korrupsion.

Në këtë aktivitet, Autoriteti i Konkurrencës u përfaqësua edhe nga eksperti i Konkurrencës z. Egzon Berisha.

Konferenca kishte për qëllim diskutimin e rreziqeve kryesore të korrupsionit në prokurimin publik, me fokus në forcimin e transparencës, integritetit institucional dhe mbrojtjen e konkurrencës së ndershme në administrimin e fondeve publike.

Gjatë diskutimeve u theksua rëndësia e rolit të Autoritetit të Konkurrencës në parandalimin dhe trajtimin e praktikave anti-konkurruese, siç janë marrëveshjet e fshehta ndërmjet operatorëve ekonomikë, manipulimi i tenderëve dhe abuzimi me pozitën dominuese, të cilat ndikojnë drejtpërdrejt në shtrembërimin e tregut dhe dëmtimin e interesit publik.

Po ashtu, u diskutuan sfidat dhe rreziqet në të gjitha fazat e ciklit të prokurimit publik, duke filluar nga planifikimi i prokurimit dhe hartimi i specifikimeve teknike, deri te vlerësimi i ofertave, dhënia dhe monitorimi i kontratave.

Në kuadër të konferencës u theksua nevoja për:

- forcimin e kapaciteteve institucionale për hetim dhe mbikëqyrje;

- avancimin e transparencës përmes platformave digjitale;

- bashkëpunim më të ngushtë ndërinstitucional;

- si dhe rritjen e ndërgjegjësimit për rëndësinë e konkurrencës së ndershme dhe integritetit në prokurimin publik.

I tërë procesi i Vlerësimit të Rrezikut të Korrupsionit në fushën e prokurimit publik do të mbështetet nga Zyra e UNDP-së në Kosovë, përmes Projektit për Luftimin e Korrupsionit dhe Krimeve Financiare.

06/05/2026

Autoriteti i Konkurrencës në workshop ndërkombëtar në Stamboll - 28-29 prill 2026.

Kryetarja e Autoritetit të Konkurrencës së Republikës së Kosovës znj. Neime Emi Binaku Isufi së bashku me ekspertin e konkurrencës z. Albion N. Rexhepi, kanë marrë pjesë në një workshop dyditor në Stamboll, të organizuar nga Autoriteti i Konkurrencës së Turqisë, me temën e praktikave dhe abuzimeve të pozitës dominuese.

Ky aktivitet mblodhi përfaqësues të autoriteteve të konkurrencës nga vende të ndryshme të rajonit, duke krijuar një platformë të rëndësishme për shkëmbimin e përvojave profesionale dhe diskutimin e praktikave më të mira në zbatimin e legjislacionit të konkurrencës. Gjatë sesioneve të punës janë trajtuar raste konkrete nga juridiksione të ndryshme, me fokus në identifikimin, hetimin dhe sanksionimin e sjelljeve që përbëjnë abuzim me pozitën dominuese në treg.

Në kuadër të këtij workshop-i, përfaqësuesi i Autoritetit të Konkurrencës z. Albion Rexhepi ka prezantuar rastin e trajtimit të abuzimit të pozitës dominuese nga ndërmarrja Iber-Lepenc, lidhur me një tender për sh*tjen e energjisë elektrike të prodhuar nga burime alternative. Ky rast u vlerësua si i veçantë, pasi adreson një perceptim të përhapur se ndërmarrjet publike nuk mund t’i shmangen zbatimit të legjislacionit të konkurrencës. Prezantimi theksoi qartë se edhe ndërmarrjet publike, kur bëjnë veprimtari ekonomike në treg, i nënshtrohen rregullave të konkurrencës dhe mbikëqyrjes nga autoritetet përkatëse sikurse edhe ndërmarrjet private.

Pjesëmarrësit patën mundësinë të diskutojnë qasje të ndryshme rregullatore, sfidat në zbatim, si dhe mekanizmat efektivë për mbrojtjen e konkurrencës së lirë dhe funksionale në treg. Në këtë kontekst, janë prezantuar edhe modele të avancuara të analizës ekonomike dhe juridike që përdoren në trajtimin e rasteve komplekse.

Gjatë qëndrimit në Stamboll, Kryetarja ka zhvilluar gjithashtu një takim me Kryetarin e Autoritetit të Konkurrencës së Turqisë, z. Birol Küle, i cili ka shprehur gatishmërinë për të ofruar mbështetje profesionale për Autoritetin e Konkurrencës së Republikës së Kosovës, me qëllim forcimin e mëtejmë të kapaciteteve institucionale dhe bashkëpunimit ndërinstitucional.

Përmes pjesëmarrjes në këtë workshop, Autoriteti i Konkurrencës i Republikës së Kosovës ka përfituar njohuri dhe përvoja të vlefshme, të cilat do të kontribuojnë drejtpërdrejt në forcimin e kapaciteteve institucionale dhe në avancimin e praktikave të hetimit dhe vendimmarrjes në fushën e konkurrencës, veçanërisht në trajtimin e rasteve që lidhen me abuzimin e pozitës dominuese.

24/04/2026

Me rastin e pensionimit të z. Ahmet Hertica, Autoriteti i Konkurrencës i Republikës së Kosovës shpreh mirënjohjen dhe respektin më të sinqertë për kontributin e tij të gjatë dhe të çmuar në shërbim të institucionit.

Gjatë viteve të angazhimit të tij, z. Hertica u dallua për profesionalizëm, përkushtim dhe integritet, duke lënë gjurmë të rëndësishme në zhvillimin dhe forcimin e Autoritetit, si dhe në avancimin e politikave të konkurrencës në vend.

Ky moment shënon një përmbyllje të denjë të një kapitulli të rëndësishëm profesional, por njëkohësisht edhe fillimin e një etape të re në jetën e tij.

Në këtë ngjarje, i urojmë shëndet të mirë, qetësi dhe shumë suksese në vitet që vijnë.