Agjencia e Menaxhimit Emergjent, Rr. Dëshmorët e Gollakut pn. Hajvali, Pristina (2026)

Q: What is the address?

Rr. Dëshmorët E Gollakut Pn. Hajvali

28/08/2026

Agjencia e Menaxhimit Emergjent me aktor relevant, organizon punëtori me temë „ Të kuptuarit e rrezikut dhe parashikimi bazuar në ndikim“

Prishtinë,
28.08.2026

Me mbështetje nga komisioni evropian, i lehtësuar nga banka botërore, Agjencia e Menaxhimit Emergjent me Drejtori të Mbrojtjes dhe Shpëtimit, Kryqin i Kuq të Kosovës dhe pjesëmarrës relevant, u takuan në punëtori dy ditore, ku fokus ishte tema“ Të kuptuarit e rrezikut dhe parashikimit bazuar ne ndikim“ , kërkesë e dalë nga niveli Komunal përgjatë zbatimit te projektit TAFF 2024.

Ngjarjen me një fjalë rasti dhe prezencën e tije e përshëndeti U.D Drejtor Ekzekutiv z. Shefki Abdullahu, i cili ndër tjerash nxori në pah, bashkëpunimin dhe koordinimin ndërinstitucional dhe në relacion nga niveli Komunal me nivelin Qendrorë, gjegjësisht Agjencinë e Menaxhimit Emergjent.

Të pranishmit nga të gjitha Komunat e Kosovës dhe Kryqi i Kuq i Kosovës, diskutuan dhe këmbyen përvojat në situata emergjente nga e kaluara, me fokus kërkesat të specifikuara në Procedurat Standarde Operative ekzistuese dhe ato që duhet iniciuar për t'i përpiluar, përmes të cilave do bëhej përpjekja për shkurtimin e kohës së intervenimit në raste kur kërkohet ndihma dhe mbështetja nga organet qendrore.

Punëtoria me përfaqësim nga drejtuesit e Agjencisë, prezantoi fushat e përgjegjësisë para te pranishmëve, si dhe rekomandoi dhe inkurajoi nivelin lokal të vazhdojë me Vlerësimin e Rrezikut nga Fatkeqësitë Natyrore dhe Fatkeqësitë tjera, si dhe bazuar ne këtë të përgatis dhe testoj përmes ushtrimeve Planin Operativ Emergjent Lokal, detyrim ligjor i secilës Komunë. Përpjekje e koordinuar për të avancuar sistemin e mbrojtjes dhe shpëtimit në raste te fatkeqësive nga natyra dhe faktori njeri.

04/08/2026

Zëvendësministri i Punëve të Brendshme, z. Enver Dugolli, zhvilloi vizitë pune në Agjencinë e Menaxhimit Emergjent

Prishtinë, 4 gusht 2026

Në kuadër të ciklit të vizitave në institucionet e sigurisë në përbërje të Ministrisë së Punëve të Brendshme, Ushtruesi i Detyrës së Drejtorit Ekzekutiv të Agjencisë për Menaxhimin e Emergjencave, z. Shefki Abdullahu, priti sot në një vizitë pune Zëvendësministrin e Punëve të Brendshme, z. Enver Dugolli.

Gjatë takimit, z. Abdullahu, i shoqëruar nga zyrtarë të Agjencisë, e njoftoi Zëvendësministrin Dugolli me të arriturat kryesore të Agjencisë, zhvillimet institucionale, si dhe sfidat me të cilat përballet sistemi i menaxhimit emergjent në Republikën e Kosovës.

Nga ana e tij, Zëvendësministri Dugolli u interesua për çështjet prioritare në fushën e menaxhimit emergjent, me theks të veçantë mbi situatën aktuale të menaxhimit të zjarreve në Kosovë, gatishmërinë operacionale të institucioneve përgjegjëse, si dhe prioritetet për forcimin e kapaciteteve të Agjencisë.

Bashkëbiseduesit vlerësuan se menaxhimi emergjent përbën një shtyllë me rëndësi jetike për mbrojtjen e jetës së qytetarëve, pronës, mjedisit dhe infrastrukturës kritike nga fatkeqësitë natyrore dhe fatkeqësitë e tjera. Në këtë drejtim, u ritheksua nevoja për forcimin e mëtejshëm të koordinimit institucional, ngritjen e kapaciteteve profesionale dhe zhvillimin e vazhdueshëm të sistemit të mbrojtjes civile dhe menaxhimit emergjent në Republikën e Kosovës.

Ministria e Punëve të Brendshme edhe një herë shprehu zotimin se mbetet e përkushtuar në përkrahjen e vazhdueshme ngritjes dhe zhvillimit te kapaciteteve të Agjencisë, ndërsa Agjencia e Menaxhimit Emergjent me kapacitetin në dispozicion zbaton mandatin e saj ligjor për të mbrojtur jetën dhe të mirat materiale të qytetarëve të Kosovës, pa dallim.

03/08/2026

AGJENCIA E MENAXHIMIT EMERGJENT
KOMUNIKATË ZYRTARE PËR MEDIA

Prishtinë, 3 Gusht 2026

Pas paralajmërimeve të Institutit Hidrometeorologjik të Kosovës për periudhën me temperaturat e larta, Agjencia e Menaxhimit Emergjent (AME) lëshon këtë apel urgjent për rritjen e vigjilencës dhe kujdesit të shtuar nga të gjithë qytetarët, me theks të veçantë tek fermerët dhe bujqit.
Në këto kushte klimatike, rreziku nga shpërthimi dhe përhapja e shpejtë e zjarreve në fusha dhe pyje vleresohet e lartë, me potencial në rritje të rrezikut.

Përtej masava të ndërmarra me kapacitete në dispozicion, dhe koordinim me të gjitha institucionet e shtetit,
AME-ja kërkon zbatimin e rreptë të masave parandaluese, si në vijim:

Për Fermerët, Bujqit dhe Blegëtorët:

Ndalohen rreptësisht zjarrvëniet në ara pas të korrave, ndalohet rreptësisht djegia e kashtës, mbetjeve korrëse dhe vegjetacionit nëpër ara për arsye të "ashtuquajturës pastrimi për të mbjellat e radhës".
Ministria e Bujqësisë dhe pylltarisë dhe zhvillimit rural, është në gatishmëri për situatë dhe po përcjellë paralajmërimin me vigjilencën e shtuar.

Kujdes me makineritë:
Kontrolloni sistemet e shkarkimit të gazrave (mbyllësit e shkëndijave) te kombajnat dhe traktorët gjatë korrje-shirjeve.

Pajisjet për shuarjen e zjarrit fillestarë-Bombolat per fikjen e zjarrit mbani të servisuara si dhe rezervuarë me ujë të gatshëm në fushat ku jeni duke punuar.

Mbrojtja e kafshëve:
Siguroni ventilim të mjaftueshëm, hije dhe ujë të bollshëm për bagëtinë nëpër ferma.

Zbatoni orarin e punës sipas rekomandimeve nga Instituti Kombëtar i Shëndetit Publik- IKSHPK:

Shmangni punët e rënda fizike në fusha të hapura, rrugë dhe ndërtimtari gjatë orëve me temperaturat më të larta, për periudhën nga ora 11:00 - deri në ora 17:00

Masat e përgjithshme për qytetarët:
Mos ndizni zjarre në hapësira gjatë qëndrimeve për piknik, ndeja rasti në natyrë! Secila shkëndijë në kushtet aktuale të motit, mund të jetë e kobshme për zjarre të pa kontrolluara.

Kujdes me mbeturinat:
Mos hidhni bishta cigaresh të ndezur apo ambalazhe qelqi në natyrë, pasi ato mund të shkaktojnë zjarre pa dashje.

Kujdesi shëndetësor:
Kufizoni lëvizjet në diell dhe qëndroni të hidratuar.

Raportimi i menjëhershëm (Pa pagesë) kur vërehet tymi ose zjarri fillestar.
Në rast të vërejtjes së ndonjë vatre zjarri ose tymi, bëni përpjekje për shuarjen e zjarrit në mënyrë të sigurte, njëherish lajmëroni menjëherë autoritetet në numrta 24/7 pa pagesë:

112 – Numri Unik Emergjent
192 – Policia e Kosovës
193 –Zjarrfikësit shpëtues

Agjencia e Menaxhimit Emergjent mbetet e përkushtuar me gatishmëri të lartë, dhe rikujton se shkaktimi i qëllimshëm i zjarreve apo nga pakujdesia, përbën vepër penale dhe do të ndiqet nga organet e zbatimit të ligjit.

Vetëdija dhe kujdesi i secilit prej nesh mbron jetën, pronën dhe pasurinë tonë kombëtare.

27/07/2026

Agjencia e Menaxhimit Emergjent/MPB raporton mbi situatën e krijuar nga reshjet atmosferike në Republikën e Kosovës

Prishtinë, 27 korrik 2026

Agjencia e Menaxhimit Emergjent/MPB, përmes Qendrës Operative, njofton se pas reshjeve atmosferike të ditës së sotme, situata në nivel vendi është stabile, e qetë dhe plotësisht e menaxhueshme.

Sipas raportimeve nga Qendrat Operative Emergjente (QOE 112), Drejtoritë për Mbrojtje dhe Shpëtim dhe Njësitë Profesionale të Zjarrfikjes dhe Shpëtimit (NJPZSH), intervenimet janë realizuar me shpejtësi dhe efikasitet në të gjitha zonat e prekura.

• Gjakovë–Rahovec: Niveli i ujërave është në rënie. Janë sanuar rastet e raportuara në objekte banimi dhe shtretër lumenjsh, përfshirë fshatin Pataqan i Ulët. Situata është nën kontroll drejtë stabilizimit.

• Prizren–Suharekë: Janë trajtuar me sukses disa raste të depërtimit të ujit në podrume, objekte banimi dhe lokale afariste. Gjendja është stabilizuar.

• Prishtinë: Është evidentuar grumbullim uji në Shkabaj dhe në autostradën Prishtinë–Shkup (afër Marigona Residence), ku ekipet kanë ndërhyrë për normalizimin e qarkullimit.

Strukturat e AME-së, në koordinim me Qendrën Operative të MPB-së, Policinë e Kosovës dhe autoritetet komunale, mbeten në angazhim të vazhdueshëm 24/7 dhe vijojnë koordinimin në terren.

Sipas parashikimeve nga Instituti Hidrometorologjik i Kosovës si burim i vetëm zyrtar në dispozicion, i cili dërgoi parashikimin për ditën e sotme dhe ditëve ne vijim, e cila parashikon stabilizim të motit, përtej kësaj Agjencia e Menaxhimit Emergjent mbetet në gatishmëri të plotë për t'iu përgjigjur çdo zhvillimi apo përkeqësimi të mundshëm të situatës.

Apel për qytetarët: Për çdo emergjencë ose kërkesë për ndihmë, telefononi pa pagesë në numrin 112.

26/07/2026

Agjencia e Menaxhimit Emergjent /MPB, merr pjesë në Ditën Memoriale të Zyrtarëve Policorë të Rënë në Detyrë

Prishtinë, 26 korrik 2026

Në kuadër të shënimit të kësaj dite memoriale, përfaqësues nga Agjencia e Menaxhimit Emergjent, të udhëhequr nga u.d. Drejtori Ekzekutiv i AME-së, z. Shefki Abdullahu dhe zyrtarë të Ame-së,si dhe pjestarë nga Njësia Profesionale e Zjarrfikjes dhe Shpëtimit Prishtinë, nderuan me homazhe dhe buqeta me lule përmendoren e policëve të rënë në krye të detyrës.

Në këto nderime morën pjesë edhe krerët më të lartë shtetërorë e institucionalë, përfshirë ushtruesen e detyrës së Presidentes së Republikës së Kosovës, Albulena Haxhiu, Kryeministrin në detyrë, Albin Kurti, Ministrin e Punëve të Brendshme, Xhelal Sveçla, si dhe Drejtorin e Përgjithshëm të Policisë së Kosovës, Kolonel Gazmend Hoxha.

Sakrifica, profesionalizmi dhe përkushtimi i zyrtarëve policorë janë themel i forcimit të shtetit të së drejtës dhe frymëzim i vazhdueshëm për çdo zyrtar që i shërben me nder dhe përgjegjësi Republikës së Kosovës dhe qytetarëve të saj.

Lavdi e përjetshme heronjve dhe zyrtarëve policorë të rënë në krye të detyrës!

22/07/2026

APEL URGJENT PËR KUJDES DHE GATISHMËRI TË SHTUAR

Prishtinë 22 Korrik 2026

Të nderuar qytetarë,

Mbështetur në paralajmërimin e hershëm të Institutit Hidrometeorologjik të Kosovës (IHMK) dhe udhëzimeve nga Agjencia për Menaxhimin e Emergjent (AME), sot priten zhvillime të fuqishme konvektive, të cilat do të sjellin stuhi lokale me bubullima, reshje intensive shiu, breshër dhe erëra të forta.

Rreziqet kryesore dhe ndikimet e mundshme:
• Përmbytje të shpejta lokale në zonat me reshje intensive;
• Dëmtime në objekte, automjete, infrastrukturë dhe kultura bujqësore, veçanërisht nga breshëri dhe erërat e forta;
• Rritje e rrezikut për ndezjen e zjarreve si pasojë e shkarkimeve atmosferike.
• Pengesa në sistemet e telekomunikacionit.
• Dëmtime në rrjetin elektroenergjetik dhe ndërprerje të furnizimit me energji elektrike.
• Rrezik i lartë nga goditjet e rrufesë, me pasoja të mundshme për njerëzit dhe kafshët.

Udhëzime sigurie për qytetarët:
• Qëndroni në ambiente të sigurta gjatë stuhisë dhe shmangni lëvizjet e panevojshme;
• Mos u strehoni nën pemë të larta apo pranë objekteve metalike dhe shtyllave elektrike;
• Kujdes në komunikacion: Përshtatni shpejtësinë dhe shmangni rrugët apo nënkalimet e mbuluara nga uji;
• Siguroni pronën: Largoni ose siguroni pajisjet dhe sendet në ballkone e oborre që mund të dëmtohen nga era apo breshëri. Njësitë e Zjarrfikjes dhe Shpëtimit, së bashku me Qendrat Operative Emergjente, janë në gatishmëri të plotë reaguese në të gjithë territorin e vendit.

Për çdo rast emergjent, kontaktoni pa pagesë:
• Qendra Operative Emergjente: 112
• Policia e Kosovës: 192
• Zjarrëfikësit: 193
• Ndihma e Shpejtë: 194

21/07/2026

Komandanti i KFOR-it vizitoi Agjencinë e Menaxhimit të Emergjencave

Prishtinë, 21 Korrik 2026

Në Agjencinë e Menaxhimit të Emergjencave (AME), sot qëndroi për vizitë zyrtare Komandanti i KFOR-it, Gjeneral Major Özkan Ulutaş, i shoqëruar nga Drejtori i NALT-it, Gjeneral Brigade Thomas Schulte-Borgelhoff.

Delegacioni u prit nga Drejtori Ekzekutiv i AME-së, z. Shefki Abdullahu, së bashku me Zëvendësministrin e Ministrisë së Punëve të Brendshme, z. Enver Dugolli.

Gjatë takimit u diskutua për bashkëpunimin në fushën e menaxhimit të emergjencave, me theks të veçantë në koordinimin dhe mbështetjen e ndërsjellë gjatë situatave emergjente. Palët riafirmuan përkushtimin për vazhdimin dhe forcimin e bashkëpunimit, me qëllim të rritjes së kapaciteteve për reagim të shpejtë dhe menaxhim sa më efektiv të emergjencave.

Me këtë rast, Komandanti i KFOR-it u njoh nga afër me mandatin, misionin dhe rolin e Agjencisë së Menaxhimit të Emergjencave, si dhe me përgjegjësitë dhe angazhimet e saj në mbrojtjen e jetës, pronës dhe mjedisit.

Në përmbyllje të takimit, Drejtori Ekzekutiv i AME-së, z. Shefki Abdullahu, e falënderoi Komandantin e KFOR-it për vizitën dhe mbështetjen e vazhdueshme, duke vlerësuar lart bashkëpunimin ndërinstitucional dhe kontributin e KFOR-it në forcimin e kapaciteteve për menaxhimin e emergjencave në Republikën e Kosovës.

Ai theksoi se partneriteti i deritanishëm ka dhënë rezultate të frytshme dhe se ky bashkëpunim do të vazhdojë të thellohet edhe në të ardhmen, në funksion të rritjes së sigurisë, gatishmërisë institucionale dhe mbrojtjes së qytetarëve.

18/07/2026

TELEGRAM NGUSHËLLIMI

Të nderuar familjarë të të ndjerit Abedin,(Jonuz) Ademaj,
Të nderuar kolegë dhe bashkëpunëtorë të NJPZSH- Prizren dhe komunitetit të Zjarrfikjes dhe Shpëtimit në mbarë vendin,

Me pikëllim të thellë dhe dhimbje të madhe pranuam lajmin për ndarjen nga jeta të zyrtarit tonë të respektuar, zjarrfikësit Abedin (Jonuz) Ademaj, si pasojë e një sëmundjeje të rëndë.
I lindur më 12.04.1965 në Prizren, Abedin (Jonuz )Ademaj ndërroi jetë më 17.07.2026. Humbja e tij lë një zbrazëti të madhe,jo vetëm në familjen tuaj, por edhe në radhët e Agjencisë së Menaxhimit Emergjent dhe të gjithë komunitetit të zjarrfikësve në Prizren e mbarë vendin.

Si zjarrfikës që nga viti 2001, Abedini shërbeu me nderë, profesionalizëm dhe përkushtim të lartë gjatë gjithë karrierës së tij, duke qenë gjithmonë i gatshëm për t'u dalë në ndihmë qytetarëve në momentet e tyre më të vështira. Abedini me vetëmohimin e pashoq, duke vënë edhe jetën në rrezik, nuk hezitoi të shpëtojë dhe ndihmojë qytetarët e rrezikuar nga zjarret dhe fatkeqësitë tjera.

Në emër të Agjencisë së Menaxhimit Emergjent, i shprehim ngushëllimet më të sinqerta familjes Ademaj, miqve, kolegëve dhe të gjithë atyre që patën nderin të punojnë me të.
Kujtimi për profesionalizmin dhe shpirtin e tij human do të mbetet gjithmonë i gjallë në institucionin tonë.
U prehtë në paqe!

U.d Drejtori Ekzekutiv i Agjencisë së Menaxhimit Emergjent z.Shefki Abdullahu

14/07/2026

Mbështetur nga GIZ, kampanjë vetëdijësuese për rreziqet nga fatkeqësitë- me tematikë vërshimet. Bashkëpunim i koordinuar me IHMK në cilësinë e partnerit të paralajmërimit të hershëm.

08/07/2026

Drejtori Ekzekutiv i AME-së priti në takim Drejtorin e Departamentit për Siguri Publike të Misionit të OSBE-së në Kosovë

Prishtinë, 8 Korrik 2026

U. d. Drejtori Ekzekutiv i Agjencisë për Menaxhimin e Emergjencave z. Shefki Abdullahu, së bashku me stafin e Agjencisë, mirëpriti në një takim zyrtar Drejtorin e Departamentit për Siguri Publike të Misionit të OSBE-së në Kosovë z.Bertman Welsing.

Takimi u zhvillua në një atmosferë konstruktive, ku u diskutua për bashkëpunimin e deritanishëm ndërmjet AME-së dhe OSBE-së, si dhe për mundësitë konkrete të thellimit të partneritetit në fusha me interes të përbashkët. Vëmendje e veçantë i’u kushtua forcimit të kapaciteteve institucionale, zhvillimit të trajnimeve profesionale, shkëmbimit të përvojave dhe avancimit të praktikave më të mira në menaxhimin e emergjencave dhe sigurinë publike.

Drejtori Ekzekutiv i AME-së z.Shefki Abdullahu falënderoi përfaqësuesit e OSBE-së për mbështetjen e vazhdueshme që i kanë dhënë Agjencisë ndër vite, duke theksuar se partneriteti me OSBE-në ka qenë një faktor i rëndësishëm në ngritjen e kapaciteteve profesionale dhe operacionale të institucionit.

Nga ana e tij, Drejtori i Departamentit për Siguri Publike të OSBE-së vlerësoi angazhimin dhe profesionalizmin e AME-së në përmbushjen e misionit të saj, duke shprehur gatishmërinë për të vazhduar bashkëpunimin përmes projekteve të përbashkëta që kontribuojnë në rritjen e gatishmërisë institucionale, përmirësimin e koordinimit ndërinstitucional dhe forcimin e sigurisë publike.

Takimi shërbeu si një mundësi e mirë për shkëmbimin e ideve dhe identifikimin e fushave të reja të bashkëpunimit, me synimin e ndërtimit të një sistemi edhe më të fuqishëm dhe më efikas të menaxhimit të emergjencave në shërbim të qytetarëve.

AME-ja mbetet e përkushtuar në kultivimin dhe fuqizimin e partneriteteve strategjike me organizatat vendore dhe ndërkombëtare, duke vlerësuar se bashkëpunimi dhe koordinimi janë elemente kyçe për rritjen e sigurisë, gatishmërisë dhe reagimit efektiv ndaj çdo situate emergjente nga Fatkeqësitë Natyrore dhe Fatkeqësitë Tjera në nivel vendi.

Agjencia e Menaxhimit Emergjent

28/08/2026

04/08/2026

03/08/2026

27/07/2026

26/07/2026

22/07/2026

21/07/2026

18/07/2026

14/07/2026

08/07/2026

Address

Website

Alerts

Shortcuts

Share

Category

Listing takedown request