15/11/2021
Qytetarë të dashur,
Faleminderit nga zemra për mbështetjen e madhe në këto zgjedhje. Fitorja e kandidatëve tanë është një fitore qytetare, për të rikthyer e ruajtur qeverisjet e mira, transparente, të kompetencës e të projekteve madhore në qytetet tona.
Faleminderit secilit aktivist të Partisë Demokratike të Kosovës për punën e jashtëzakonshme dhe ekipore, që e ktheu PDK-në të parën në nivel vendi. Ne jemi shumë krenarë me vlerat që përfaqësojmë, me kontributin madhor në liri e shtetndërtim, e me vizionin e qartë e të pastër për të ardhmen e Kosovës.
Mirënjohja më e madhe i takon qytetarëve të Kosovës, për shansin e ri që na dhanë për ta dëshmuar veten, si dhe për kulturën e lartë demokratike që votuesit treguan edhe gjatë këtij procesi zgjedhor. Këtë mbështetje që na u dha, ne nuk do ta konsiderojmë vetëm nder e privilegj, por edhe përgjegjësi e obligim për të punuar me përulësi, dedikim e këmbëngulje në përmbushjen e premtimeve elektorale.
Na presin edhe shumë punë. Por do të punojmë bashkë, me respekt e kulturë të lartë qytetare e politike. Sepse vetëm kështu, të bashkuar, mund ta shohim Kosovën ashtu si e meriton të jetë, e zhvilluar e demokratike. PDK me krenari do t’i prijë këtij vizioni.
Na priftë e mbara!
