26/12/2025
Rikthimi i epiqendrës kombëtare: Atdheu dhe Familja si Themel i Kosovës.
Nga Alban Hoti
Kryetar i Ballit Kombëtar Demokrat Shqiptar në Kosovë
Historia nuk është një relike për muze, por një përgjegjësi për të tashmen dhe të ardhmen. Kur kombet humbasin orientimin, nuk u mungon forca, por u zbehet boshti moral dhe kombëtar. Sot, më shumë se kurrë, është e domosdoshme që epiqendra e mendimit dhe veprimit politik shqiptar në Kosovë të rikthehet aty ku ka qenë gjithmonë natyrshëm: te Balli Kombëtar Demokrat Shqiptar, te vlerat e tij dhe te parimet mbi të cilat është ndërtuar ideja e kombit shqiptar.
Balli Kombëtar Demokrat Shqiptar nuk është një projekt i së shkuarës, por një vizion i pandërprerë kombëtar. Ai lindi nga nevoja për liri, për dinjitet dhe për vetëvendosje, duke vendosur në themel të tij interesin e kombit mbi çdo interes personal apo partiak. Në Kosovë, këto parime nuk ishin teori politike, por frymë rezistence dhe mbijetese kombëtare në kohë shtypjeje dhe mohimi.
Atdheu për ne nuk është një fjalë e konsumuar në fjalime, por një detyrim moral. Është toka që na mban, gjuha që na identifikon, historia që na obligon dhe sakrifica e brezave që na kërkon përgjegjësi. Kosova ka qenë dhe mbetet pjesë e pandashme e trungut kombëtar shqiptar, dhe çdo projekt politik që e relativizon këtë të vërtetë është i destinuar të dështojë.
Po aq themelore është familja, shtylla e dytë e një shteti të fortë dhe të drejtë. Familja shqiptare në Kosovë ka qenë institucioni më i qëndrueshëm në kohët kur institucionet shtetërore mungonin. Ajo ruajti gjuhën, traditën, besimin dhe ndërgjegjen kombëtare. Për Ballin Kombëtar Demokrat Shqiptar, familja nuk është objekt eksperimentesh ideologjike, por baza morale mbi të cilën ndërtohet shoqëria.
Sot, Kosova përballet me sfida serioze: krizë identiteti, zbrazje vlerash, emigrim masiv dhe një politikë shpesh të shkëputur nga realiteti i qytetarit dhe rrënjët kombëtare. Përballë kësaj situate, rikthimi i parimeve të Ballit Kombëtar Demokrat Shqiptar nuk është nostalgji, por domosdoshmëri kombëtare dhe shtetformuese.
Ne besojmë se pa atdhe nuk ka liri, dhe pa familje nuk ka shoqëri. Pa këto dy shtylla, çdo shtet mbetet i brishtë, çdo politikë e përkohshme dhe çdo pushtet i zbrazët. Prandaj, rikthimi i epiqendrës politike dhe morale te Balli Kombëtar Demokrat Shqiptar është rikthim te vlerat që e mbajtën Kosovën gjallë dhe që mund ta çojnë përpara.
Ky është një apel për ndërgjegjësim kombëtar, për kthim te parimet dhe për ndërtimin e një Kosove që ecën përpara pa harruar kush është dhe nga vjen.
