08/02/2024
Gjuha e urrejtjes dhe shprehjet raciste janë të papranueshme. Të gjithë duhet t’a dënojmë atë gjuhë e ato shprehje në mënyrë që të mos përhapen e kultivohen me një hov edhe më të lartë nga ajo që tashmë kemi parë nëpër rrjete sociale dhe studio televizive. Organizatat që merren me lirinë e medias, shprehjen dhe fjalën e lirë, gazetarët, intelektualët duhet të reagojmë e të udhëheqin me shembuj të qartë për atë se si duhet respektuar dhe promovuar diversiteti në vendin tonë.
Ministrat e Republikës së Kosovës tash e tre vjet kanë treguar shumëçka nga vetja e tyre, e para së gjithash kanë treguar që të gjithë bashkë i shërbejnë drejtë dhe mirë të gjithë qytetarëve pa dallim. Puna e tyre trevjeçare mund të shihet ose jo, të përflitet ose jo, të kritikohet ose jo, e çka tjetër, por është e papranueshme që njerëzit e medias me tituj analistësh të përdorin gjuhë të urrejtjes dhe shprehje raciste për të bërë një koment të ligë mbi ta në publik.
Ministri i Pushtetit Lokal, Elbert Krasniqi, ka treguar angazhim dhe profesionalizëm të lartë në shërbim të Republikës dhe të gjitha komuniteteve që jetojnë brenda saj. Urojmë që ai ta vazhdojë punën e tij të mirë dhe të përfaqësojë vlerat e përbashkëta të përkushtimit ndaj paqes, tolerancës dhe drejtësisë për të gjithë qytetarët e Kosovës.
