04/08/2024
Envitasyon
Bonjou / Bonswa frèm ak sèm.
Jounen jodi a nou koube nou byen ba pou nou salye ou. Nou pwofite moman sa a pou nou fon ti pale sou konjonkti peyi cheri nou an.
Tout moun konnen byen, apre lanmò defen prezidan nou, se yon veritab goumen ki genyen pou jere kesyon pouvwa a. anpil moun pran pòz yo renmen nou epi se lajan yap fè sou non nou. Pandan ke gen anpil lòt frè nou ak sè nou ki gen kapasite ak volonte ki te kapab sèvi peyi a, moun sa yo mete yo sou kote oubyen kreye kondisyon pou yo rete lwen.
Peyi a ap viv yon moman difisil kote tout pitit li ki konsekan konnen se sèl yon pote kole nan nivo lokal ki ka retire nou kote nou ye a. Lòt nasyon pap pwopoze nou anyen ki nan enterè nou. Pou sa, nou vle fè yon apèl ak tout ayisyen ki pa deside vann nanm nou pou n pote kole pou n reklame pitit peyi a pou dirije nou.
Pou sa n ap ba ou randevou sou plas piblik Grangwav la jou kap vandredi 12 Avril 2024 la pou n al voye yon mesaj kle bay kominote entènasyonal la pou n di non ak enjerans. Nou pral rele viv Guy Philippe, yon pitit konsekan ke nou wè nan li yon vrè lide patriyòt ki gen gwo vizyon pou yon demen miyò.
Nou nan yon kriz ki malouk, solisyon an paka soti lòt kote ke anndan peyi nou e nou tout konnen peyi a son peyi ki granmoun tèt li. Lè ou granmoun lakay ou epi gon pwoblèm ki prezante, ou twouse kanson ou nan tay ou pou pote solisyon. Ou pa dwe kite ni vwazen ni moun kap pase deside sou lakay ou. Sitou si ou gen vwazen ògeye ak jalou, sa k ap bon pou yo a se li yap egzije ou pandan ke ou menm ou dèyè yon solisyon yo menm yo ka anpire l nan menw.
Pèp ayisyen, je nou kale, nou pap pran zannana pou Sizàn. An nou pran desten nou an men. Ann kreye bon jan kondisyon pou nou viv tankou moun. An nou mete tèt nou ansanm pou n jere lakay nou. Se tras sa Zansèt yo te kite pou nou swiv…
Viv yon Ayiti Souvren!
Viv Guy Philippe!
Viv tout Ayisyen konsekan!
