31/03/2026
0329｜基礎跑酷
佇嘉義，咱較少有機會接觸跑酷（Parkour），
這擺共學團的媽媽提議，
邀請對高雄來的 Frmp摩猴跑酷 台灣摩猴跑酷團隊，
tshuā囡仔做伙拍開身體新的可能。
跑酷（Parkour）
是一種學習按怎予身體安全、閣有效率移動的方式——
對 A 點到 B 點，用走、跳、翻、爬pê抑是peh ，揣著家己的路。
一開始，是利用公園內底原本的設施，
花台的邊仔、欄杆、椅仔，
攏變做囡仔的練習場。
in 用行、走、nǹg、爬、peh，
一邊試、一邊揣平衡，
平常時無注意的所在，變甲真趣味。
紲落來沓沓仔挑戰：
對較低的平台peh懸、移動，到盤過/跳過障礙的練習。
跑酷上重要的學習是——
學會曉「安全」的通過，毋是硬衝。
親像「安全翻越（Safety Vault）」：
用手thènn咧、腳踏、身體hānn過，
避免用跤頭趺硬kīng，予力分散佇手佮跤。
閣有「精準跳躍（Precision Jump）」：
跳到目標面頂，
用跤頭趺微微仔彎落去，來吸收衝擊，
落地了後，穩穩仔站予牢。
後壁的練習嘛親像一場小冒險——
用球仔做定點，練習迒步佮跳躍的節奏、
佇樹根懸低的地形中維持身體的平衡、
上尾挑戰盤過崎仔佮peh 較懸平台。
對真濟台灣的媽媽來講，
這款課程一開始攏會有一點仔「心驚驚」，
毋過自從 Alex 頂擺peh 101 了後，
予較濟人開始認捌這類的極限運動。
看著囡仔一步一步揣著方法、建立信心，
彼種成長，有影足珍貴。
嘛有媽媽發現，
就準算無啥物遊具，
公園本身嘛會當變做囡仔𨑨迌的好所在。
—————
跑酷
#公視台語台 收錄做「跑酷 pháu-khok」，
嘛有人講「跑硞 pháu-kho̍k」（因為會硞來硞去），
#塗豆仁學台語 感覺會使翻做「走躘 cháu-liòng」，
你感覺按怎講較好？
4/12閣有一場，歡迎逐家做伙來~ 報名看留言的所在~
#親子共學行咱土地的路
#嘉義台語囡仔共學團
#嘉有老木工作隊
#嘉義囡仔講台語
#洪雅書房
#臺灣摩猴跑酷團隊
