06/02/2025
د ترکیې جمهوریت په انقره کې د افغانستان سفارت خبرتیا!
نېټه: پنجشنبه د ۲۰۲۵ کال د فبروري ۶مه
په ترکیې جمهوریت کې قدرمنو هېوادوالو او درنو مهاجرینو:
د ۲۰۲۱ میلادي کال د اګست ۱۵مې له تحولاتو او د طالبانو د حاکمیت رامنځته کېدو څخه تر دې دمه، په انقره کې د افغانستان سفارت دیپلوماتانو دا ملي او وجداني مسئولیت وګڼو تر څو د کاري خلا د رامنځته کېدو د مخنیوي او همداراز په هغو سختو شرایطو کې د افغانستان خلکو ته د اړینو خدمتونو وړاندې کولو لپاره خپلو دندو ته ادامه ورکړي. سیاسي خلا او د اوسني حاکمیت د کورني او بهرني مشروعیت نشتون او همداراز په ترکیه کې د هېواد د بېلابېلو قشرونو څخه د افغان مهاجرینو د مخ په زیاتېدو شمېر ته په پام سره، دې سفارت د افغانستان اسلامي جمهوریت د پرځېدو له لومړیو ورځو څخه پرته له ځنډه د خلکو د ستونزو د حل لپاره د خدمت رسونې لړۍ ته دوام ورکړ. په دې ترڅ کې هېوادوالو ته د ترکیې په ۱۴ بېلابېلو ولایتونو او د لومړي ځل لپاره د شمالي قبرس ترکي جمهوریت کې، ګرځنده (سیار) قونسلي خدمتونه وړاندې شول.
د قونسلي خدمتونو د چټکتیا سربېره، دې سفارت په ځینو نورو برخو کې هم نه ستړې کېدونکې هلې ځلې وکړې. د دې هڅو له ډلې څخه د بېلګې په توګه په افغانستان کې اړو کسانو ته د بشري مرستو جلبول، د سوداګرۍ هڅول او د خصوصي سکتور پیاوړي کول، د ښوونې او لوړو زده کړو څخه ملاتړ، د افغان محصلینو چارو ته رسېدنه (چې شمېر یې کابو ۷۰۰۰ تنو ته رسېږي)، د کلتوري پروګرامونو ترسره کول او همداراز د بشري حقوقو او مدني فعالانو، ځوانانو او د هېواد د محصلینو او په ځانګړې توګه افغان نجونو او ښځو تقدیر او هڅونه، یادولای شو. افغانستان ته د ترکیې جمهوریت په بشري مرستو کې د پام وړ زیاتوالی راغی چې د نېکۍ د رېل تر نامه لاندې د مرستو لېږل او همداراز په هېواد کې د ۷۰ څخه ډېرو مرستندویه ترکي بنسټونو فعالیتونه په دې کې شامل دي. د لوړو زده کړو په برخه کې د محصلینو چارو د لا ښه انسجام لپاره زمینه برابره شوه او د لومړي ځل لپاره به په ۲۰۲۵ میلادي کال کې د TR-YÖS آزمونیه په ملي ژبو ترسره شي تر څو د هېواد مستعد ځوانان وکولای شي له دې لارې د ترکیې په پوهنتونونو کې د لوړو زده کړو موقع ترلاسه کړي. د دې تر څنګ، د دې سفارت تعمیر او اقامتګاه هم بیا ورغول شوه چې په دې اړه جزئیات او د سفارت د مالي شفافیت څرنګوالي اړوند د ۲۰۲۴ میلادي کال د سپتامبر په ۱۴ مه د دې سفارت د فېسبوک په پاڼه اعلامیه خپره شوې.
د افغانستان کلتوري شتمنۍ ته پام سره دې سفارت، د کلتوري پروګرامونو د تنظیمولو او د ځوانانو په ځانګړې توګه د ښځینه محصلینو د ملاتړ له لارې د هېواد د متنوع کلتور د پیاوړتیا لپاره ډېرې هڅې کړې دي. د هېوادوالو د ستونزو د هوارولو لپاره د کابل د حاکمانو سره د قونسلي او اداري تعامل سربېره، دې سفارت هېڅکله د طالبانو حاکمیت د یوه مشروع حکومت په توګه چې د خلکو د ارادې استازیتوب وکړي، په رسمیت و نه پېژنده. د دې سفارت مشرتابه او دیپلوماتیک کدر تل کوښښ کړی تر څو په انقره کې د افغانستان سفارت له هر راز سیاسي او ډله ییزو کړنو څخه لیرې وساتي. په دې حساس وخت کې چې هېواد د مشروعیت له تشې سره مخ دی، دې ملي ديپلوماتیک بنسټ د هېواد ټولو خلکو ته په بې پرې او صادقانه خدمتونو رسولو تمرکز کړی، چې دا موضوع په واضح توګه د سفارت په ټولو کړنو او خبرتیاوو کې منعکسه شوې ده.
اوسمهال افغانستان، د خپل تاریخ یو تر ټولو سخت پړاو څخه تېرېږي. د کورني او بهرني مشروعیت څخه برخمن یو دولت نشتون د دې لامل شوی چې په بهر کې د افغانستان خلک د لازم درناوي او وقار څخه برخمن نه وي. او تر څو چې په افغانستان کې یو مشروع حاکمیت چې د عدالت او د خلکو واقعي ارادې پر بنسټ وي، رامنځته نشي، په نړیواله ټولنه کې به افغانستان خپل وړ ځای ترلاسه نه کړي. له بده مرغه اوسمهال افغانستان، په ناسم او ناسالم لور روان دی. او هره ورځ د خلکو او په ځانکړې توګه د ښځو حقونه په ظالمانه توکه تر پښو لاندې کېږي. د اوسني افغانستان تصویر د ظلم، جهل او تیارې ښکارندوی دی چې خلک د تعلیم حق غوندې د خپلو بنسټیزو انساني حقوقو څخه محروم شوي چې دا وضعیت د هر ویښ وجدان لپاره د منلو وړ نه دی.
د ۲۰۲۱ میلادي کال د اګست ۱۵مې له تحولاتو څخه وروسته، د سفارت د کنترول د ترلاسه کولو لپاره د طالبانو ناکامو هڅو او د دې سفارت په دیپلوماتانو او کارکوونکو د دوامداره فشارونو او همداراز د ترکیې په حکومت باندې د دوی د فشارونو له امله، په دې وروستیو کې د ترکیې جمهوریت د بهرنیو چارو وزارت پرېکړه کړې تر څو د دې سفارت د جمهوریت دورې سفیر او دیپلوماتانو ماموریت پای ته ورسوي. دا پرېکړه چې د ویانا کنوانسیونونو پر بنسټ د کوربه هېواد د صلاحیتونو له امله شوې، د دې سفارت د دیپلوماتانو په اړه هم د اجرا وړ ده. لدې امله، د روان میلادي کال د فبروري له ۶مې نېټې څخه د دې سفارت د جمهوریت دورې دیپلوماتانو خپل ماموریت ته د پای ټکی کېښود او همداراز د خلکو د ارادې پر بنسټ او مشروع حکومت نشتون له امله دا سفارت نن له غرمې وروسته د ترکیې جمهوریت د بهرنیو چارو وزارت ته تسلیم کړل شو.
د دې سفارت مشرتابه او ديپلوماتیک کدر د ترکیې جمهوریت څخه، په تېرو کلونو او په ځانګړې توګه د ۲۰۲۱ میلادي کال د اګست ۱۵مې له تحولاتو څخه وروسته د دې سفارت د کړنو څخه د دوامداره ملاتړ په پار مننه او قدرداني کوي. ترکیه، سربېره پر دې چې د طالبانو حاکمیت په رسمیت نه پېژني او ټول دوه اړخیز تړونونه یې تعلیق کړي، په دې سختو شرایطو کې د افغانستان د خلکو ترڅنګ ولاړه ده. دا پرېکړه د اړتیا او د افغانستان خلکو ته د خدمت رسلولو لپاره په کابل کې د ترکیې جمهوریت د سفارت او همداراز په مزار شریف او هرات ولایتونو کې د ترکیې جنرال قونسلیو فعاله ساتلو له امله ترسره شوې. هیله ده چې د ترکیې جمهوریت دا انسان پاله سیاست، تر هغه چې په افغانستان کې د خلکو د ارادې پر بنسټ یو مشروع حکومت رامنځته کېږي، ادامه پیدا کړي.
همداراز دا سفارت په ترکیه کې له ټولو ګرانو هېوادوالو، ځوانانو او د هېواد له محصلینو څخه چې په دې کلونو کې یې له سفارت سره همکاری او ملاتړ کړی، مننه او قدرداني کوي او ډاډ ورکوي چې د دې سفارت دیپلوماتان به د خپلو شخصي وړتیاوو له لارې د هېواد په خدمت کې وي او د هېواد د خلکو لپاره د پتمنې راتلونکې تر جوړولو به خپلو کوښښونو ته دوام ورکوي.
د داسې ورځې په هیله چې افغانستان خپلواکه او سرلوړی وي تر څو زمونږ خلک د کور د ننه او بهر د لازم پت او درناوي څخه برخمن وي.
