01/06/2026
ملا لعب ذرّ!! الراجل يغيب يغيب ويغطس فرد غطسة، حتى نهار العيد ما يبانش، ويخلي الناس الكل تسأل وتلوّج "وينو؟" "زعمة مات؟ ولاّ مريض؟". وفجأة، يطلّ علينا ينفخ في صدره ويهدّد، تقولش عليه حرّر القدس ولا "جاب الصيد من وذنو"!
هو الصّحيح والأكيد إنه كان يداوي في علّة ما تخفى على حد؛ لأن أعراض المرض باينة وواضحة للعموم، وما تستحقش بروفيسور ولا تحليل طبي باش يفيق بيها! اللهم لا شماتة.
أما إنك تعمل منها "بوز" باش في بالك تمركي "بونتو" على معارضيك! فهذي تبيّن إنك بالحق مريض بمرض يصعب شفاؤه، وما تصلحش حتى باش تدير عطرية... حاسيلو تفاهة ومسخرة فاتت كل الحدود.
لا يزي مسيّب البلاد غارقة للعنكوش، والمواطن راسه شاب وهو يجري وراء باكو حليب ومغرفة زيت، وإنت جاي تفلّم علينا بفيلم محروق ديما تعاود فيه، وبخطاب خشبي وحكاية حولة كي هذي. بالرسمي، كائن "فاضي شغل" ردّ الدولة حانوت نصبة وخلاّنا ضحكة ومسخرة بين الأمم!
