06/04/2022
ناري على المرشي
المرشي و ماادراك من المرشي لؤلوة قفصة ومفخرته امام باقي الولايات في الستينيات بناته البلدية سنة 1963 و قت الي كان الهادي كامرجي في البلدية و المقاول عبدالله حتيرة .وقت كانت الرجال الصحاح يحبوا ينهضوا بقفصة المرشي كان برجاله و كانت الناس تخدم على روحه و كان التقسيم متاعه روعة , الخضارة كانوا النصبة بجنب النصبة و كل واحد و حرفائه و شيخ الخضارة المرحوم عبدالقادر بالحولة من الاوائل متاع المرشي و عزالدين دليقة بنكس , علي بن زيد محمد بوعشرة , قليعي منصورة , ابراهيم النفزاوي , علي القطاري , احمد قناص , مطفى النفزاوي , لخضر قطاري , عبدالله الوصيف , الحسني العوني و جماعة الدقلة علي الصماط و الناصر الجريدي و ماننسوش" ورقة بريك ملسوقة " سامي و عادل ناصري موجودين على طوال العام و قدام الخضارة نلقوا الطارمة متاع الحوت اولاد بالعبسي و ابراهيم كراولي المعروف بقولته المشهورة " الرخيص يتبع الرخيص و الغالي يتبع الغالي " خاصة كي يشري واحد من حرفائه من عند مختار بالعبسي . نمشوا القدام شوي نلقوا الجزارة الهادي الدريدي , حسين الكلاحشي و خوه حمزة , بلقاسم بالطيفة , عبد الطيف بن يحي , محمد دحباش , و الكل "ينادي علوش حليب علوش صغير" و كل واحد و حرفائه والناس الكل تخدم فرحانة و قبل ما نتحولوا الي الضفة الاخرى من المرشي يلزمنا نتعدوا على شركة حراث و الصادق الشيحي للخضر و الغلال بالجملة و الي بلصتها ولات تو المغازة العامة و كان الخير و البركة والناس الكل متعشية و لباس .
كي ندخوا الي المرشي من قدام نلقوا قهوة حسناوي و الطواول منشرة في الهول جماعة تتحدث و جماعة يلعبوا في الشكبة و اخرين في الديمينو. و فرماسي حبيب مبارك و كمال و حميدة ناس طيبين و سمحين و بعد نلقوا حانوت محمد بن ضو قمرق متاع دخان و خبز و جرائد و ملتقى الاحبة ناس تجي تشرب قهوتها قبل ما تمشي تخدم ابراهيم الزيدي , الشيخ محمد عرب , صغير فجرة , عمار بيوضي و غيرهم و الحاج ملايل حانوت تقول فرماسي اعشاب طبية و علايق العرس و الحاج يعبي في العلاقة و الكلمة المعروفة متاعه " مصلي على النبي مصلي على النبي " بجنبه عبدالقادر تيتو متاع الضو و هذا حانوت الضحك و الزها و الطرب خاصة كي يجي المرحوم الزين بالليل و حانوت منجي زعيش لبيع الموالح ترشي و زيتون و فلفل مالح و قوتة عربي ومقابلهم التعاضدية سي الناصر و منجي و لزهر و العيد و كانت ديما معبية و الناس الكل تخدم و لباس و عمار بدر حانوت مذخم كي مولاه و كان درع بدرة عنده شهرة عالمية و محمدالطاهر الوصيف المناقلي و الحانوت متاعه ديما معبي بجماعة الكشافة ومحي الدين بن ضو متاع المرطبات و ماكينة السيتروناد قدام الحانوت اشرب وحدك و تعدى خلص و بجنبه نجيب كرو حانوت عطرية كبير و كل ما يطلبه الفم و السان موجود عنده ورشيد بوترعة و الطعمة و القابسي و عمر بن ضو متاع السعف و العلايق و المضلات وكان امين السوق عبدالرحمان قروي يعمل دورة كل صباح يتفقد الناس الكل ويحرص على نظافة المرشي و الناس الكل خايفة منه و تسمع كان رحومة جاء رحومة جاء , وكانت احلى ايامات المرشي في رمضان قفصة الكل تتلم غادي و تنجم تعدي فيه 4 و الا 5 سوايع من غير ما تفيق بهم ويكثر الهرج و جو الصحيح متاع رمضان و الناس الكل تنادي على سلعتها و ما تسمع كان هاهو الخبز المبسس و ورقة بريك ملسوقة و الرايب والدقلة في وقتها و الناس تخدم على روحها و الناس الكل لباس و ما تروح كان قبل المغرب بشوي و كان المرشي الوجهة الرسمية للناس الكل في رمضان .
