27/11/2022
Sawadee to Happy !!!
ဒီနေ့တော့ ပီတိဖြစ်စရာလေးတစ်ခုကို ကျွန်တော် Sharing လုပ်ပါမယ်။
22 Nov, 2022. (အင်္ဂါနေ့)
ဒီနေ့လေးမှာ ကျွန်တော်တို့ချစ်တဲ့ သူရဲကောင်း ညီအစ်ကိုမောင်နှမတွေအတွက် ထိုင်းဘာသာစကား သင်တန်းလေး စတင်ဖြစ်တဲ့အကြောင်းပေါ့။
ပထမတော့ စိုးရိမ်စိတ်လေး ၀င်မိသေးတယ်။
ကျွန်တော်တို့ Library Team ကနေ စဥ်းစားတွေးတော စီစဥ်မိခဲ့တာမို့ ကိုယ့်ရဲဘော်ညီအစ်ကိုတွေ စာလိုက်နိုင်ပါ့မလား.. အချိန်ကြာကြာထိုင်နိုင်ပါ့မလား.. သင်ယူတဲ့အခါမှာရော စိတ်တိုင်းကျပါ့မလား.. အဆင်ပြေပါ့မလား စသဖြင့် စိတ်ပူပမ်မိတယ်။
တကယ်လည်း သင်တန်းလေးလည်း စ သင်ရော.. တကယ့်ကို ချစ်စရာကောင်းခဲ့တယ်။
ဆရာနဲ့ဆရာမကလည်း ကျွန်တော်တို့သူရဲကောင်းတွေ အချင်းချင်းပိုပြီး ရင်းနှီးအောင် ပျော်ရွှင်အောင် ပျော်စရာဂိမ်းကလေးတွေနဲ့ စတင်ခဲ့တယ်။
အားလုံးဟာ တစ်သွေးတည်း၊ တစ်သားတည်း သင်ယူလိုစိတ်၊ တတ်မြောက်လိုစိတ် ၁၀၀ရာခိုင်နှုန်း အပြည့်ရှိတယ်ဆိုတာကိုလည်း ကျွန်တော်တို့ တွေ့မြင်ခဲ့ရတယ်။
…
ကျွန်တော်တို့ သူရဲကောင်းတွေ ခဏတာနေထိုင်ရတဲ့ နေရာဒေသမှာ ဘာသာစကားရဲ့ အရေးပါပုံကလည်း အဓိက ကျပါတယ်။
တကယ်အရေးကြုံလာတဲ့အခါ ဘာသာစကားတတ်မြောက်ထားတဲ့သူက နယ်ပယ်အတော်များများမှာ အထောက်အကူအများကြီးပေးနိုင်တာကြောင့် အစီအစဥ်လေးကို တွန်းတွန်းတိုက်တိုက်နဲ့ အမြန်စီစဥ်ရတာဖြစ်ပါတယ်။
ဒီသင်တန်းလေးဟာ (ထိုင်း) ဘာသာစကားတစ်ခုပဲ သင်တာမျိုးမဟုတ်ဘဲ ဒီနိုင်ငံရဲ့ ယဥ်ကျေးမှု၊ ဒီနိုင်ငံရဲ့ နေထိုင်မှုပုံစံ၊ ဒီနိုင်ငံရဲ့ ဖြစ်တည်မှုတွေကိုပါ ဆရာ/ဆရာမတို့က တဆက်တည်း သင်ကြားပေးသွားမှာဖြစ်ပါတယ်။
ဘာသာစကားတစ်ခုဟာ အစမှ အစစအရာရာ ခက်ခဲပါတယ်။
ထို့တူပဲ ဘာသာစကားကစတင်လို့ လူမျိုးတစ်ခုရဲ့ ယဥ်ကျေးမှုဟာလည်း အရေးကြီးပါတယ်။
ယဥ်ကျေးမှုအဆင့်အတန်းမြင့်မားလာတာနဲ့အမျှ.. နိုင်ငံတစ်နိင်ငံရဲ့ ဖွံ့ဖြိုးမှု၊ တိုးတက်မှု နဲ့အတူ ပြည်သူတွေရဲ့ နိုင်ငံအပေါ် လေးစားမှု၊ လိုက်နာမှု၊ နားလည်မှု စံနှုန်းတွေဟာ ဒီမိုကရေစီ ဖြစ်တည်မှုအတွက် အခြေခံအကျဆုံးအချက်ဖြစ်လာပါတယ်။
ဆိုတော့.. ကျွန်တော်တို့ဟာ ကိုယ့်နိုင်ငံရဲ့ဒီမိုကရေစီအရသာကို ခံစားဖို့အတွက် အခြားနိုင်ငံတစ်ခုရဲ့ ဘာသာ၊ စာ၊ ယဥ်ကျေးမှုတွေကို လေ့လာခြင်းနဲ့အစပြုလို့ ကိုယ့်နိုင်ငံအတွက်လည်း ဘယ်လို အခြေခံအုတ်မြစ်နဲ့ ပြန်လည်စတင်ရမလဲဆိုတဲ့ အတွေးအခေါ်ကိုပါ မြင်ရလာစေတာမို့ ဒီသင်တန်းလေးဟာ တကယ်ကို အကျိုးရှိစေမှာပါ။
…
အခုလို ဘာသာစကားသင်တန်းလေးဖြစ်မြောက်ဖို့ တဖက်တလမ်းကနေ ပံ့ပိုးကူညီပေးတဲ့ အလင်းရောင်လူငယ်များ - Light Of Youth Myanmar … ကိုလည်း ကျေးဇူးတင်ရှိပါတယ်။
သင်တန်းကို မေတ္တာ၊ စေတနာအရင်းခံပြီး လာရောက်သင်ကြားပေးတဲ့ ဆရာနဲ့ဆရာမကိုလည်း ကျေးဇူးတင်ပါတယ်။
အခုလို ဖြစ်မြောက်အောင် တွန်းအားပေးတဲ့ အစ်မ Anaw Nay Chi Nay Chilinကိုလည်း ကျေးဇူးတင်ပါတယ်။
အထူး ကျေးဇူးတင်မိတာကတော့ ကျွန်တော်တို့ရဲ့သူရဲကောင်းရဲဘော် ညီအစ်ကိုမောင်နှမတွေကိုပါ။
အားလုံးဟာ ပျော်ပျော်ရွှင်ရွှင်နဲ့ လိုလိုလားလား လက်ခံသင်ယူပေးတဲ့အတွက် တကယ့်ကို ပီတိဖြစ်ရပြီး မျက်ရည်တောင်ဝဲရပါတယ်လို့။
ထို့အတူပဲ.. ရှေ့ဆက်ပြီး ကျွန်တော်တို့ Library ကနေ လုပ်ဆောင်သွားမယ့်အရာရာတိုင်းအတွက်လည်း ပံ့ပိုးကူညီဖို့ ဆက်သွယ်လာတဲ့ အစ်ကို၊အစ်မတွေကိုလည်း ကျေးဇူးတင်ပါတယ်လို့။
အခုလို ပျော်ရွှင်စရာ၊ ပီတိဖြစ်စရာလေးကို ဝေငှခွင့်ရတဲ့အတွက်လည်း ကျေးဇူးပါ။ 🌿
