06/06/2026
في ناس وجعها كبير ، بس وجودنا معهن وكلمة طيبة، وضحكة صغيرة، ممكن يخففوا شوي من الحمل اللي بقلبهن ، لهيك كان عنا جلسة دعم نفسي بسيطة ودافية لذوي الشهداء، حاولنا فيها نخلق مساحة فيها أمان، مشاركة، ودفا إنساني.
اجتمعنا بحديقة عامة مع 27 سيدة و15 طفل، بجلسة جماعية مليانة تفاعل ومحبة.
شاركوا السيدات بتحضير الفتوش سوا، وكان النشاط أكثر من مجرد طبخة ، كان مساحة للحكي، والضحك، واسترجاع تفاصيل الحياة البسيطة اللي بتعطي شعور بالراحة والطمأنينة
الجو الجماعي ساعد على تعزيز التعاون، وكسر العزلة، وإعطاء إحساس بالقدرة والإنتاجية.
كمان عملنا مسابقات خفيفة وممتعة للكبار والأطفال، مليانة حركة وضحك وطاقة حلوة، والهدف منها كان إنه نخفف شوي من الضغط النفسي ونرجع نخلق لحظات فرح حقيقية.
أما الأطفال، فكان إلهن مساحة خاصة من الاهتمام والفرح، من خلال تقديم هدايا رمزية رسمت البسمة على وجوههن وخففت عنهن ولو جزء صغير من التعب اللي عايشينه .
الحمدلله كانت الأجواء دافية وعفوية، وفيها شعور بالأمان والانتماء، والكل تفاعل بمحبة وبساطة.
ومن أهم الآثار اللي لمسناها خلال الجلسة:
1- تخفيف التوتر والضغط النفسي
2- تعزيز روح الدعم والتكافل بين المشاركين
3- تحسين المزاج من خلال الأنشطة الجماعية
4- دعم الأطفال نفسيًا عبر اللعب والاهتمام
5- استرجاع جزء من الروتين الصحي والحياة الطبيعية
كل الامتنان لكل قلب شارك، ولكل ابتسامة انزرعت بهاليوم ، لأنه الدعم النفسي أحيانًا بيبدأ من جلسة بسيطة، فيها ناس بتحس ببعض بصدق.
Suwayda European Society
الصِّـحة والسَّـلامَة للجَـميع ..💙
#ضمّة
