23/05/2026
Laascaanood, Soomaaliya – 23 May 2026:
Wasaaradda Qorsheynta, Maalgashiga iyo Horumarinta Dhaqaalaha ee Dowladda Federaalka Soomaaliya oo kaashaneysa Wasaaradda Qorsheynta Dowlad-Goboleedka Waqooyi Bari ayaa maanta magaalada Laascaanood ka furtay aqoon-is-weydaarsi saddex maalmood soconaya oo lagu xoojinayo isku-dubbaridka iyo hirgelinta Qorshaha Isbeddelka Qaranka ( ), iyadoo ay ka qeybgalayaan masuuliyiin iyo khubaro ka kala socota Dowladda Federaalka iyo Dowlad-Goboleedka Waqooyi Bari Soomaaliya.
Kulanka ayaa diiradda lagu saarayaa mideynta mudnaanta horumarineed, xoojinta wada-shaqeynta qorsheynta, iyo dardargelinta hirgelinta tiirarka Qorshaha Isbeddelka Qaranka, kuwaas oo kala ah dowlad-wanaagga, koboca dhaqaalaha, horumarinta adeegyada bulshada iyo karaanka aadanaha, iyo u-adkeysiga isbeddelka cimilada.
Agaasimaha Guud ee Wasaaradda Qorsheynta XFS, Mudane Cabdifataax Cabdulqaadir Faarax (Abdifatah Hared), oo si rasmi ah u furay aqoon-is-weydaarsiga, ayaa sheegay in guusha hirgelinta qorshahan ay ku xirnaan doonto iskaashi dhow iyo wada-shaqeyn wax-ku-ool ah oo dhex marta Dowladda Federaalka iyo Dowlad-Goboleedyada.
“Qorshaha Isbeddelka Qaranka wuxuu u baahan yahay lahaansho wadajir ah iyo isku-duwid dhab ah si loo xaqiijiyo horumar loo dhan yahay iyo natiijooyin muuqda oo gaara shacabka Soomaaliyeed,” ayuu yiri Agaasimaha Guud.
Waxaa sidoo kale khudbad furitaan ah ka jeediyay Wasiir Ku-xigeenka Wasaaradda Qorsheynta ee Dowlad-Goboleedka Waqooyi Bari Soomaaliya, Mudane Axmed Aadan Saciid (Ayuub), halka Agaasimaha Guud ee Wasaaradda Qorsheynta ee Dowlad-Goboleedka, Mudane Cismaan Aadan Xuseen, uu goob-joog ka ahaa shirka.
Inta ay socdaan shirarkan wadatashiga ah, waxaa laga wada hadli doonaa mudnaanta dowlad-goboleedka, caqabadaha hortaagan hirgelinta qorshaha, baahiyaha taageero ee jira, iyo tallaabooyinka lagu xoojinayo qorsheynta, kormeerka, iyo isla xisaabtanka, si loo xaqiijiyo fulin wax-ku-ool ah oo la taaban karo.
