16/04/2026
Washington DC:-Wasiirka Maaliyadda Xukuumadda Federaalka Soomaaliya Mudane Biixi Imaan Cige ayaa magaalada Washington DC ka wada kulamo miro-dhal ah oo uu la yeelanayo madax sare oo ka tirsan hay’adaha maaliyadeed ee caalamiga ah iyo dalalka saaxiibka la ah Soomaaliya, xili uu soconayo Shirka xiliga Gu’ga ee Bangiga Adduunka iyo IMF oo maalintii Sadexaad galay.
Hadaba warbixintan hoose waxa aan ku soo koobaynaa kulamadii muhiim ka ahaa ee uu Wasiiru la yeeshay madaxdii uu la kulmay.
Kulanka 1-aad:
Wasiirka ayaa kulan muhiim ah la yeeshay Madaxweynaha Bangiga Adduunka Mudane Ajay Banga intii uu socday shirka guddiga horumarinta. Kulankan ayaa diiradda lagu saaray xoojinta iskaashiga u dhexeeya Soomaaliya iyo Bangiga Adduunka, iyadoo si gaar ah loo bogaadiyay kaalinta muhiimka ah ee Bangiga Adduunka ku leeyahay taageerada horumarinta Soomaaliya xilli ay jiraan isbeddello iyo fursado cusub oo caalami ah.
Kulanka 2-aad:
Wasiirka ayaa sidoo kale kulan miro-dhal ah la qaatay Wasiirka Horumarinta Caalamiga ah ee Norway, Mudane Åsmund Aukrust, iyagoo ka wada hadlay horumarka ay Soomaaliya ka gaartay dib-u-habaynta maaliyadda oo dadaal xoog leh la galiyay iyo fursadaha maalgashi iyo horumarineed.
Kulanka 3-aad:
Wasiirka Maaliyadda XFS ayaa kulan wax-ku-ool ah la yeeshay Mudane Nick Dyer oo ka tirsan Wasaaradda Arrimaha Dibadda ee Boqortooyada Ingiriiska qeybta Horumatinta Caalamiga ah (FCDO), kulanka ayaa lagu lafa-guray horumarka dib-u-habaynta dhaqaalaha, istiraatiijiyadda kobaca dhaqaalaha, caqabadaha juqraafiyeed iyo helitaanka maalgelinta la xiriirta isbeddelka cimilada. Dowladda UK ayaa weli ah saaxiib muhiim ah oo Soomaaliya ka taageera horumarka dhaqaalaha
Kulanka 4-aad:
Wasiirka Maaliyadda ayaa sidoo kale la kulmay Agaasimaha Waaxda Bariga Dhexe iyo Bartamaha Qaaradda Aasiya ee IMF, Mudane Jihad Azour, iyagoo diiradda saaray hirgelinta barnaamijka dib-u-habaynta Dhaqaalaha, la qabsiga saameynta isbeddellada caalamiga ah iyo xoojinta fursadaha maalgelinta horumarineed ee waarta.
Kulanka 5-aad:
Sidoo kale, Wasiirka ayaa la yeeshay kulan Agaasimaha Xafiiska Afrika ee Wasaaradda Maaliyadda Mareykanka, Mudane Alexander Leipziger, iyadoo ka wada hadlay horumarka laga sameeyay dakhliga gudaha, maareynta maaliyadda dadweynaha (PFM), iyo horumarinta nidaamka maaliyadeed.
Kulanka 6-aad:
Ugu dambeyn, Wasiirka ayaa kulan soo dhaweyn ah la qaatay Wakiilka Midowga Yurub u qaabilsan Iskaashiga Caalamiga ah, Mudane Jozef Síkela, oo ka qeyb galay shirka Wasiirrada Maaliyadda Madasha Iskaashiga Geeska Afrika. Midowga Yurub ayaa door muhiim ah ka qaata horumarinta iskaashiga gobolka iyo taageerada Soomaaliya.
