03/01/2026
Farriin Waddaniyadeed | Baaq Midnimo Qaran
Muwaadin soo jeedow,
Dalkaagu ma aha qabiil, mana aha gobol, mana aha dano gaara.
Dalkaagu waa adiga, waa carruurtaada, waa mustaqbalka jiilasha imanaya.
Maanta cadowga ugu weyn ee ina hortaagan ma aha mid bannaanka ka yimid,
balse waa kala-qaybsanaan, jahawareer, iyo aamusnaan.
Marka dadka wax garadka ahi aamuso, kuwa danahooda gaarka ah wata ayaa fursad hela.
Qof kasta oo dalkiisa jecel:
Waa inuu si cad u diidaa kala-qaybin kasta, magac kasta ha lagu qariyee
Waa inuu runta ku hadlaa, xitaa marka ay adkaato
Waa inuu ka shaqeeyaa mideynta bulshada, halkii uu sii kala fogeyn lahaa
Midnimadu hadal keliya kuma timaado.
Waxay ku timaadaa ficil, dulqaad, iyo wacyigelin joogto ah.
Dhalinyarooy,
Adinku waxaad tihiin awoodda iyo rajada dalka.
Ha noqonina qalab lagu burburiyo mustaqbalkiinna.
Noqda kuwo wax dhisa, wax mideeya, oo aragti fog leh.
Haweenow,
Adinku waxaad tihiin tiirka bulshada.
Ka-qaybqaadashadiinnu waa lama huraan si loo helo bulsho isku duuban oo horumar leh.
Odayaal iyo aqoonyahanno,
Mas’uuliyaddu idinkaa saaran.
Taariikhdu way qori doontaa: ma aamusteen mise waad istaagteen?
Aan wada istaagno.
Aan ka shaqeyno midnimo, cadaalad, iyo dowladnimo dhab ah.
Aan ka hormarino danta guud tan gaarka ah.
Dalka waa la badbaadin karaa—haddii dadka soo jeeda ay mid noqdaan.
—
hon farah abdi dini
