22/08/2021
Farmaajo oo la dhaliilihiisa wata, marka loo bar-bardhigo hormuudka siyaasadeed ee Soomaaliya waxaa jira dhawr dabeeco oo uu kaga duwan-yahay:
1. Xagga madaxtinimada, waa ninka kaliya ee inta aan arkay aan mucaaradka la yooyootamin, kuna mashquulin u jawaabistooda, — xitaa haddii ay boqolaal jeer ku been abuurtaan.
2. Nooca mucaarad-nimadiisu way ka duwanayd tan siyaasiyiinta Soomaalidu caanka ku yihiin ee inta madaxtooyada la ag'dago maalin iyo habeen la qayliyo ee madaxda markaa joogta lugaha lagu dhagganaado.
Markii uu xilka R/Wasaaraha Soomaaliya ku waayay sida aadka u foosha xun, siyaasadda kuma dhex walicin oo guri Villa Soomaaliya ku xiga ma kiraysan, mana caayi jirin madaxdii dalka. Inta uu qurbaha isaga laabtay ayuu iibin jiray afkaartiisa siyaasadeed oo jaaliyadaha Soomaaliyeed la kulmi jiray. Dalkana waxa uu olole doorasho u iman jiray oo kaliya marka uu hannaanka doorasho bislaado ee tii Madaxwayne dhacayso.
3. Waa nin aan afkaaraha hoose ee Soomaalida dhex yaalla dhex ordin (sida qabyaaladda iyo kooxaysiya), waxa uuna iibiyaa had iyo jeer afkaar waddaniyadeed.
Ma waddani dhab ahbaa mise waa uu ku shaqaystaa? Waa su'aal la iswaydiin karo. Laakiin xitaa haddii uuna waddani ahayn, waxa uu sheegayaa waxay ka wanaagsan yihiin waxa ay sheegaan ragga dhiggiisa ah, waxa uuna fahamsan-yahay nooca dhawaaqa ay shacabka Soomaaliyeed dhagahoodu rabaan.
Bal sawiro, shir beeleed oo ay fadhiyaan laba Madaxwayne, R/Wasaare, raxan wasiiro iyo xildhibaanno ah oo war-murtijeedkii kasoo baxay laga akhrinayo magacyada taliyayaasha ciidanka ee aan ku beesha ahayn oo loo han-jabayo
Muqdishay ka dhacday! Alla maxaa sanadka ceeb la dhex fadhiistay!
