10/12/2025
Hay’adda Istaatistikada Qaranka iyo Bangiga Adduunka ayaa si wadajir ah u daah-furay Sahanka Ku-hadalka Telefoonada Somalia wareegyada 1aad & 2aad. Waxaa sidoo kale si hoor-dhaac ah loo soo bandhigay hindisaha Cusub ee Xogta Taleefannada Gacanta ee Go’aan-qaadashada (Mobile Phone Data for Policymaking).
Munaasabadda waxaa isugu yimid masuuliyiin sare oo dowladda ka tirsan, madax ka soocotay Bangiga Adduunka iyo bahwadaagta caalamiga ah ee arrimaha istaatistikada, si ay uga wada hadlaan sida xog waqtigeeda la hela ay u dadargeliso una hagto siyaasado qaran oo wax ku ool ah.
Sahanka Ku-hadalka Telefoonada Somalia wuxuu muujiyay awoodda iyo waxtarka hababka casriga ah ee xog-ururinta taleefannada gacanta. Iyadoo gebi ahaan lagu qaaday wareysiyo telefoon, Sahanku wuxuu soo uruuriyey aragtiyo toos ah ah oo ka imanaya qoysas ku kala nool dhammaan gobollada dalka—iyadoo laga maarmay caqabadaha culus iyo kharashaadka weyn ee ku xeeran haddii xog ururinta sidii h**e loo qaban lahaa. Natiijooyinku waxay soo bandhigeen sawir cad oo ku saabsan saboolnimada, cunno-yaraanta, saamaynta masiibooyinka cimilada, adeegyada bulshada iyo himilooyinka qoysaska Soomaaliyeed.
Iyadoo la duulayo guushan, hordhaca hindisaha cusub ee Mobile Phone Data (MPD) ee isla munaasabadda lagu soo bandhigay wuxuu adeegsanayaa xogaha isgaarsiinta ee la qarameeyey lana mideeyey, si loo helo xog joogto ah oo loogu adeego ka jawaabista masiibooyinka, dhaq-dhaqaaqa dadka iyo barnaamijyada ilaalinta bad-qabka bulshada ee u adkaysta masiibooyinka lama filaanka ah (shock-responsive). Wada-shaqayntan waxay xoojinaysaa awoodda Soomaaliya ee adeegsiga hal-abuurka iyo cilmi-xogeedka si loo dejiyo siyaasado difaaca bulshooyinka nugul, sial markaana taageera horumar waara.
Hay’adda Istaatistikada Qaranka waxay u mahadcelinaysaa Bangiga Adduunka iyo dhammaan bahwadaagta sida joogtada ah u garab taagan. Daah-furkan maanta wuxuu hooska ka xarriqayaa go’aankeena ku aaddan go’aan-qaadasho xog-ku-salaysan iyo doorka xogtu ku leedahay dhismaha Soomaaliya adkaysi badan, ammaan & barwaaqo leh.
