12/08/2026
Waxaa farxad iyo sharaf weyn ii ah inaan maanta qayb galo munaasabaddan ballaaran ee lagu xusayo Maalinta Dhallinyarada Adduunka.
Ugu horreyn, waxaan si gaar ah ugu mahadcelinayaa Wasaaradda Dhallinyarada, Ciyaaraha iyo Dalxiiska ee Dowladda Puntland iyo Dalladda Ururrada Dhallinyarada Puntland (PYAN) oo soo qabanqaabiyey munaasabaddan qiimaha iyo muhiimadda weyn leh.
Waxaan hambalyo iyo bogaadin u dirayaa dhammaan dhallinyarada adduunka, meel kasta oo ay joogaan, anigoo ugu hambalyeynaya munaasabadda weyn ee Maalinta Dhallinyarada Adduunka.
Dhallinyaradu waa awoodda, laf-dhabarta iyo mustaqbalka bulsho kasta. Waa iftiinka maanta iyo rajada berri. Horumarka iyo mustaqbalka wanaagsan ee bulsho kasta waxay si weyn ugu xiran yihiin sida ay dhallinyaradu u fekeraan, u diyaargaroobaan, masuuliyad u qaataan, ugana qaybqaataan dhismaha dalkooda.
Haddii aad aragto waddan ay ka jiraan horumar la’aan, amni-darro iyo caqabado bulsho, waxaa hubaal ah in loo baahan yahay dhallinyaro baraarugsan, aqoon leh, mas'uuliyad qaadata, kana shaqaysa sidii ay xaaladdaas wax uga beddeli lahaayeen.
Dhallinyaradu waa inaysan noqon oo keliya kuwa sugaya mustaqbalka, balse waa inay noqdaan kuwa maanta dhisaya mustaqbalka. Waa inay ka qaybqaataan nabadaynta, horumarinta waxbarashada, hal-abuurka, shaqo-abuurka, ilaalinta deegaanka iyo dhismaha hay’adaha dowladeed iyo kuwa bulshada.
Haddii aynu dib ugu noqonno taariikhda ummadda Soomaaliyeed, dalkeennu wuxuu caan ku ahaa in dhallinyaradu door muuqda ka qaataan halganka, difaaca iyo dhismaha qarannimada Soomaaliyeed. Dhallinyaradii Soomaaliyeed waxay marar badan ka dhiidhiyeen wax kasta oo wax u dhimaya sharafta, midnimada iyo qarannimada Soomaaliya.
Maanta, waxaa loo baahan yahay jiil cusub oo aqoon, karti, hal-abuur iyo mas'uuliyad leh; jiil fahamsan in mustaqbalka dalku uu ku xiran yahay dadaalkooda iyo go'aannada ay maanta qaataan.
Sidaas darteed, waxaan ugu baaqayaa dhallinyarada Puntland iyo guud ahaan dhallinyarada Soomaaliyeed inay ka faa’iidaystaan fursadaha jira, ay helaan aqoon iyo xirfado, ayna noqdaan hormuudka nabadda, horumarka iyo dowlad-dhiska.
Ugu dambayn, waxaan hambalyo iyo bogaadin u dirayaa dhammaan dhallinyarada Soomaaliyeed meel kasta oo ay joogaan, waxaana leeyahay:
Hambalyo Maalinta Dhallinyarada Adduunka!
Dhallinyaro waa awoodda maanta, rajada berri iyo hoggaanka mustaqbalka.
Mahadsanidiin.
