05/05/2026
Xog-hayaha Guddiga Madaxa-bannaan ee Doorashooyinka Qaranka iyo Soohdimaha Soomaaliya Mudane Hussein Nuunow Ali ayaa si rasmi ah u daahfuray kulanka tababarka iyo warbixin-siinta wakiilada ururrada siyaasadeedka.
Kulankan ayaa qayb ka ah dadaallada Guddiga ee lagu xoojinayo hufnaanta, daahfurnaanta, iyo kalsoonida geeddi-socodka doorashooyinka. Waxaa diiradda lagu saarayaa kor u qaadidda fahamka ka qaybgalayaasha ee habraacyada doorashada, waajibaadka saaran, iyo doorka muhiimka ah ee ay ku leeyihiin hubinta doorasho xor iyo xalaal ah.
Mudane Hussein Nuunow Ali ayaa khudbaddiisii furitaanka ku adkeeyay muhiimadda ay leedahay wada-shaqeyn dhow oo dhexmarta dhammaan dhinacyada ay khusayso doorashadu, isaga oo xusay in tababarradan ay door weyn ka qaadanayaan sugidda nidaam doorasho oo lagu kalsoonaan karo.
Guddiga Madaxa-bannaan ee Doorashooyinka Qaranka iyo Soohdimaha Soomaaliya waxa uu mar kale caddeynayaa sida ay uga go’an tahay hirgelinta doorashooyin waafaqsan shuruucda dalka, kana tarjumaya rabitaanka shacabka Soomaaliyeed.