24/09/2026
ياجماعه قبل ما تعرفو دينا عزت من فيديوهات وجعها.. ادخلو صفحتها وشوفو البنت دي كانت بتعمل ايه 💔
لفو عندها شويه.. هتلاقو واحده قلبها مبيستحملش يشوف حد تعبان ويسكت. غلبان محتاج مساعده، ست بعيالها نايمين في الشارع، حد عيان، قطه محتاجه تتلحق.. منين ما تمشي تلاقيها بتحاول تعمل خير.
حتى الحيوانات الغلابه اللي ملهاش حد، متطوعه عشان تنقذهم وتساعدهم. وصفحتها مليانه كلام عن فلسطين واخواتنا وعيالنا في غزه.. قلبها واجعها على كل دول. ربنا يباركلها ويجازيها خير على قد نيتها.
ويمكن ده سبب من الاسباب اللي خلت الناس تتوجع عشانها وحكايتها تبقى ترند في مصر كلها، لما طلعت تحكي عن الظابط اللي قالت انه سرق فلوسها ودهبها واللي حصل معاها هي وجوزها. البنت اللي كانت بتسعى عشان تساعد غيرها، ربنا مانسهاش ومش هينساها، وسخرلها ناس كتير تقف جنبها واحنا منهم.
واحنا بقى ليه عملنا الصفحه دي؟
عشان احنا كمان شباب حصل معانا شبه اللي حصل معاها في مشروعنا، بسبب ظباط فاسدين معندهمش ضمير. وعارفين يعني ايه تشوف تعبك بيضيع قدام عينك ومتبقاش عارف تجيب حقك من مين. بس الحق يتقال.. احنا وقتها مكناش بشجاعة دينا ومقدرناش نتكلم زيها.
هي اتكلمت وشجعتنا نتكلم. وعشان كده عملنا صفحة «كلنا دينا عزت».. عشان نقف جنبها لحد ما حقها يرجع وجوزها يرجعلها واللي ظلمها يتحاسب.
وبنقول للحكومه ولرئاسة الجمهوريه.. اتدخلو واسمعو البنت دي وحققو في اللي قالته، ورجّعولها حقها وحاسبو اللي سرق واللي ظلم مهما كانت رتبته. البنت دي ملهاش غير ربنا والناس اللي واقفه جنبها.
ياجدعان اللي قلبها كان بيوجعها على كل غلبان، مينفعش نيجي عندها ونسيبها لوحدها.. احنا معاكي يا دينا ❤️
حق دينا وجوزها يوسف لازم يرجع
