14/07/2024
14 /07/ 1991- 14/07/2024,
imyaka 33 irashize.
PL ibaye ubukombe!
1. Kuri uyu munsi w’isabukuru y’imyaka 33, Ishyaka riharanira Ukwishyira Ukizana kwa buri Muntu PL rimaze rishinzwe, ririfuriza abayoboke baryo bose isabukuru nziza, bishimira ibyiza rimaze kugeraho muri iyi myaka.
2. PL irazirikana kandi igashimira abayoboke bayishinze ubutwari bukomeye bagaragaje bahangana n'ubutegetsi bw'igitugu bwayoboraga u Rwanda, bakitangira guharanira ubumwe bw'Abanyarwanda no kwimakaza amahame ya demokarasi, ukwishyira ukizana n'ubutabera.
3. Muri iyi myaka 33, PL yakomeje kugira uruhare mu gushaka ibisubizo by'ibibazo by'Abanyarwanda, no guharanira iterambere ry'Igihugu rishingiye kuri buri Munyarwanda binyuze mu miyoborere myiza, ubukungu n'imibereho myiza by'abaturage, hagamijwe kubaka u Rwanda rubereye buri wese.
4. PL irasaba abayoboke bayo gukomeza kurangwa n’ubutwari, gukomera ku ndangagaciro zo gukunda Igihugu, ubupfura n’ubunyamugayo, kubungabunga ubumwe bw'Abanyarwanda, umutekano n'ubusugire bw'u Rwanda, gukora umurimo unoze no guharanira icyateza imbere imibereho y'Abanyarwanda no kudatatira igihango PL yagiranye n'u Rwanda.
