15/09/2026
بوریوالا: گھروں اور ڈیروں سے واٹر پمپ چوری کرنے والا دو رکنی گروہ گرفتار، 7 چوری شدہ واٹر پمپ برآمد
وہاڑی (عابد حسین کھوکھر، ڈسٹرکٹ رپورٹر وہاڑی)
ڈی پی او وہاڑی تصور اقبال کی ہدایات پر پولیس تھانہ شیخ فاضل نے کارروائی کرتے ہوئے شہریوں کے گھروں اور ڈیروں سے واٹر پمپ چوری کرنے والے دو رکنی گروہ کو گرفتار کرلیا۔ پولیس نے گرفتار ملزمان کے قبضہ سے لاکھوں روپے مالیتی 7 عدد چوری شدہ واٹر پمپ بھی برآمد کرلیے۔
پولیس کے مطابق گرفتار ملزمان میں محمد نعیم سکنہ چک نمبر 417 ای بی اور محبوب احمد سکنہ چک نمبر 413 ای بی شامل ہیں۔ ملزمان گھروں اور ڈیروں سے واٹر پمپ چوری کرکے انہیں دور دراز علاقوں میں فروخت کرنے میں ملوث تھے۔
پولیس نے شب و روز کی محنت اور جدید ٹیکنالوجی کا استعمال کرتے ہوئے ملزمان کو گرفتار کیا۔ کارروائی ایس ڈی پی او سرکل بوریوالا رانا محمد عمران ٹیپو کی زیر نگرانی ایس ایچ او تھانہ شیخ فاضل چوہدری محمد آصف اور ان کی ٹیم نے انجام دی۔
ڈی پی او وہاڑی تصور اقبال نے کہا کہ منظم اور متحرک گینگز کے خلاف کریک ڈاؤن میں مزید تیزی لائی جا رہی ہے، جبکہ شہریوں کے جان و مال کی حفاظت پولیس کی اولین ترجیح ہے اور اسے ہر صورت یقینی بنایا جا رہا ہے۔
#بورےوالا #وہاڑی #پولیس #چوری #گرفتاری
