Administrator Auqaf, Khyber Pakhtunkhwa

28/08/2026

وزیر اوقاف، مذہبی واقلیتی امور، خیبرپختونخواہ محمد عدنان قادری صاحب کی زیرِ صدارت مورخہ 27 اگست 2026 کو محکمہ اوقاف کے تمام سرکل مینیجرز کا اہم اجلاس منعقد ہوا، جس میں محکمہ کی ریکوری، بقایاجات اور رینٹ اسیسمنٹ سمیت لیزز کے امور کا تفصیلی جائزہ لیا گیا۔

اجلاس میں ایڈیشنل سیکرٹری اوقاف، مذہبی و اقلیتی امور، خِبرپختونخواہ جناب حبیب آفریدی، ڈپٹی سیکرٹری اوقاف جناب برکت خان، ڈپٹی ایڈمنسٹریٹرزاوقاف اور تمام سرکل مینیجرز اوقاف نے شرکت کی۔

وزیر اوقاف نے تمام متعلقہ افسران کو ہدایات جاری کرتے ہوئے کہا کہ:

🔹 ریکوری کے اہداف بروقت مکمل کیے جائیں۔
🔹 بقایاجات (Arrears) کی وصولی پر خصوصی توجہ دی جائے۔
🔹 آئندہ اجلاس تک تمام ممکنہ بقایاجات کی وصولی کو یقینی بنائی جائے۔
🔹 رینٹ اسیسمنٹ کے عمل کو تیز کیا جائے اور متعلقہ ڈپٹی کمشنر/اسسٹنٹ کمشنر ہیڈکوارٹر کے ساتھ اجلاس و ملاقاتیں کرکے پیش رفت کی رپورٹ پیش کی جائے۔
🔹 سرکاری محکموں کے ساتھ بھی موجود لیزز کے حوالے سے رینٹ اسیسمنٹ کا عمل فوری طور پر شروع کیا جائے۔
🔹 محکمہ اوقاف کی آمدن میں اضافے اور ریکوری کے نظام کو مزید مؤثر بنانے کے لیے عملی اقدامات کیے جائیں۔

26/08/2026

وزیراعلیٰ خیبر پختونخوا محمد سہیل آفریدی نے عید میلادالنبیﷺ کے مبارک موقع پر پوری امت مسلمہ، بالخصوص اہل پاکستان کو مبارکباد پیش کرتے ہوئے کہا ہے کہ حضرت محمد رسول اللہ خاتم النبیینﷺ کی ولادت باسعادت نہ صرف عالم اسلام بلکہ پوری انسانیت کے لیے رحمت و سعادت کا باعث ہے۔ آپﷺ کی سیرت طیبہ اور آفاقی تعلیمات پوری انسانیت کے لیے رہنمائی کا کامل سرچشمہ ہیں، جبکہ آپﷺ سے محبت ایمان کا بنیادی تقاضا اور آپﷺ کا اسوہ حسنہ دنیا و آخرت میں کامیابی کی راہ دکھانے والا مشعلِ راہ ہے۔ عید میلادالنبیﷺ کی مناسبت سے اپنے پیغام میں وزیراعلیٰ نے کہا کہ رحمت للعالمینﷺ نے انسانیت کو تکریم، عفو و درگزر، عدل و انصاف، مساوات اور ظلم کے خاتمے کا درس دیا۔ خطبہ حجۃ الوداع انسانی حقوق، مساوات اور تکریمِ انسانیت کا ایسا جامع منشور ہے جو رہتی دنیا تک پوری انسانیت کے لیے رہنمائی کا سرچشمہ رہے گا۔ آپﷺ نے رنگ، نسل، نسب اور حیثیت کے امتیاز کو ختم کرتے ہوئے انسانی وقار اور مساوی حقوق کو معاشرتی زندگی کی بنیاد بنایا۔ آج امت مسلمہ کو درپیش چیلنجز کا مقابلہ اور اپنی عظمتِ رفتہ کی بحالی اسی صورت ممکن ہے جب ہم سیرتِ نبویﷺ کی آفاقی تعلیمات کو محض عقیدت تک محدود رکھنے کے بجائے اپنی انفرادی اور اجتماعی زندگی کا حصہ بنائیں۔ ریاست مدینہ کے سنہرے اصول ہمارے لیے ایک ایسا عملی نمونہ ہیں جن کی روشنی میں ایک مضبوط، پرامن، ترقی یافتہ اور اسلامی فلاحی معاشرے کی بنیاد رکھی جا سکتی ہے۔ سیرتِ طیبہﷺ ہمیں واضح رہنمائی فراہم کرتی ہے کہ اسلامی ریاست کی بنیاد شہریوں کے درمیان مساوات، عدل و انصاف اور تکریمِ انسانیت کے تحفظ پر قائم ہوتی ہے۔ اسلامی ریاست میں ہر شہری کو بلاامتیاز یکساں حقوق حاصل ہوتے ہیں، قانون سب کے لیے برابر ہوتا ہے اور کسی فرد یا طبقے کو محض حیثیت، طاقت یا منصب کی بنیاد پر قانون سے بالاتر نہیں سمجھا جاتا۔ رسول اکرمﷺ نے مدینہ منورہ میں ایسا معاشرہ قائم فرمایا جس میں حقوق و فرائض کی ادائیگی، وسائل کی منصفانہ تقسیم، کمزوروں اور محروموں کا تحفظ اور ظلم و ناانصافی کا خاتمہ ریاستی نظام کے بنیادی اصول قرار پائے۔ اسلامی فلاحی ریاست کا حقیقی مقصد بھی یہی ہے کہ عدل کو معاشرے کی بنیاد بنایا جائے، ہر شہری کو عزت، تحفظ اور مساوی مواقع فراہم کیے جائیں، وسائل پر چند طبقات کی اجارہ داری کا خاتمہ ہو اور کسی فرد پر ظلم نہ ہو۔ سیرتِ نبویﷺ کی روشنی میں ایک مضبوط اور پُرامن ریاست وہی ہے جہاں قانون کی بالادستی، انصاف کی فراہمی اور انسانی حقوق کا تحفظ بلاامتیاز یقینی بنایا جائے۔ عید میلادالنبیﷺ کے اس بابرکت موقع پر بحیثیت مسلمان ہمیں اس عزم کا اعادہ کرنا چاہیے کہ ہم اسوہ حسنہﷺ کی روشنی میں اپنے کردار و عمل کی اصلاح کے ساتھ ساتھ پاکستان میں ظلم و جبر کے خاتمے، عدل و انصاف کے فروغ، قانون کی بالادستی اور ایک حقیقی اسلامی فلاحی معاشرے کے قیام کے لیے اپنا بھرپور کردار ادا کریں گے۔

26/08/2026

26/08/2026

‎وزیراعلیٰ خیبرپختونخوا کا عید میلادالنبی ﷺ کے حوالے سے پیغام

26/08/2026

25/08/2026

# # # عشرۃ رحمۃ للعالمین ﷺ کے سلسلے میں روح پرور صوبائی مقابلۂ حسنِ قرأت و نعت خوانی

محکمہ اوقاف و مذہبی امور، خیبرپختونخوا کے زیرِ نگرانی عشرۃ رحمۃ للعالمین ﷺ کے بابرکت سلسلے میں صوبائی سطح پر حسنِ قرأت اور نعت خوانی کے شاندار مقابلے کا انعقاد کیا گیا۔

اس روح پرور اور ایمان افروز تقریب میں وزیر اوقاف، حج، مذہبی و اقلیتی امور، علامہ عدنان محمد قادری، سیکرٹری اوقاف، حج، مذہبی و اقلیتی امور، عطاء الرحمن، ایڈیشنل سیکرٹری اوقاف، حج، مذہبی و اقلیتی امور، حبیب آفریدی سمیت جید علماء کرام، محکمہ اوقاف کے افسران، منتظمین، قراء حضرات، نعت خواں اور دیگر معززین نے شرکت کی۔

تقریب کا مقصد حضور نبی کریم حضرت محمد مصطفیٰ ﷺ کی سیرتِ طیبہ، اسوۂ حسنہ اور تعلیماتِ مبارکہ کو عام کرنا، نئی نسل میں عشقِ رسول ﷺ کو فروغ دینا اور قرآنِ کریم کی تلاوت و نعتِ رسولِ مقبول ﷺ سے وابستگی کو مزید مضبوط بنانا تھا۔

صوبہ بھر سے آنے والے باصلاحیت قراء اور نعت خواں حضرات نے اپنی خوبصورت آواز، بہترین ادائیگی اور دلنشیں انداز میں تلاوتِ کلامِ پاک اور نعتِ رسولِ مقبول ﷺ پیش کرکے محفل کو روحانی کیفیت سے سرشار کردیا۔

مقررین نے عشرۃ رحمۃ للعالمین ﷺ کی اہمیت پر روشنی ڈالتے ہوئے کہا کہ نبی کریم ﷺ کی سیرتِ مبارکہ ہمارے لیے مکمل ضابطۂ حیات ہے۔ ہمیں چاہیے کہ آپ ﷺ کی تعلیماتِ رحمت، اخوت، برداشت، عدل، امن اور محبت کو اپنی عملی زندگی کا حصہ بنائیں۔

محکمہ اوقاف و مذہبی امور، خیبرپختونخوا کی جانب سے ایسی بابرکت اور مثبت سرگرمیوں کا انعقاد قرآن و سنت سے وابستگی، دینی اقدار کے فروغ اور نوجوان نسل کی اخلاقی و روحانی تربیت کے لیے ایک قابلِ تحسین اقدام ہے۔

اللہ تعالیٰ ہمیں قرآنِ کریم سے سچی محبت، حضور اکرم ﷺ کی سیرتِ طیبہ پر عمل اور آپ ﷺ کی تعلیمات کو عام کرنے کی توفیق عطا فرمائے۔

آمین یا رب العالمین 🤲

25/08/2026

25/08/2026