20/08/2026
*تقريب سیرت النبی ﷺ*
آج صوبائی حکومت کے احکامات کی روشنی میں ٹیکسٹ بک بورڈ میں ایک سادہ مگر انتہائی پُروقار *سیرت النبی ﷺ کانفرنس* کا انعقاد کیا گیا۔
اس بابرکت تقریب میں بورڈ کے تمام ملازمین نے جوش و خروش سے شرکت کی۔ تقریب کا آغاز میڈم رومانہ زرین نے تلاوت کلام پاک سے کیا۔ سٹیج سیکرٹری کے فرائض ڈاکٹر یاسین خان ماہر مضمون اردو نے ادا کئے۔ میڈم بلقیس ثانی، ناہید انجم اور رومانہ زرین نے بارگاہِ رسالت ﷺ میں خوبصورت نعتوں کے نذرانے پیش کیے اور مقررین نے سیرتِ طیبہ کے مختلف پہلوؤں پر روشنی ڈالی۔
*مقررین:*
- ماہر مضمون اسلامیات: *شاہدہ رحیم صاحبہ*
- ماہر مضمون سوشل سائنس: *ڈاکٹر طارق ازاد صاحب*
- ممبر ای اینڈ پی: *جناب مشرف خان صاحب*
- ممبر پی ایس پی: *جناب گلزار حسین صاحب*
سبھی مقررین نے اس بات پر زور دیا کہ آج امتِ مسلمہ کو درپیش مسائل کا حل صرف اور صرف سیرتِ نبوی ﷺ کی تعلیمات میں مضمر ہے۔ انہوں نے بھائی چارے، امن، رواداری اور مذہبی ہم آہنگی کی اہمیت کو بھی اجاگر کیا۔
تقریب کے مہمانِ خصوصی *چیئرمین جناب عابداللہ کاکاخیل صاحب* نے اپنے خطاب میں کہا کہ
*"حضور اکرم ﷺ پوری کائنات کے لیے رحمت ہیں۔ اللہ تعالیٰ نے قرآن میں خود فرمایا: وَمَا أَرْسَلْنَاكَ إِلَّا رَحْمَةً لِّلْعَالَمِينَ"*
آپ ﷺ کی سیرت ہمیں درس دیتی ہے کہ طاقت کے ساتھ نرمی، غصے کے ساتھ معافی، اور اختلاف کے ساتھ رواداری اپنائی جائے۔
آج ہمیں سب سے زیادہ ضرورت سیرت النبی ﷺ کے اس پیغام کی ہے کہ ہم اپنے اداروں، اپنے گھروں اور معاشرے میں عدل، ایمانداری اور خدمتِ خلق کو اپنائیں۔
نبی کریم ﷺ نے اپنی پوری زندگی دوسروں کے لیے رحمت بن کر گزاری۔ اگر ہم بھی اپنے رویوں میں وہ رحمت لے آئیں تو ہمارے تمام مسائل حل ہو سکتے ہیں۔"
چیئرمین صاحب نے ملازمین کی اس مشترکہ کاوش کو بے حد سراہا اور کہا کہ اتنے کم وقت اور شارٹ نوٹس میں اتنی پُروقار تقریب کا انعقاد قابلِ تحسین ہے۔
آخر میں ملک و قوم اور ادارے کی ترقی و سلامتی کے لیے اجتماعی دعا کی گئی۔
اللہ تعالیٰ ہمیں سیرتِ نبوی ﷺ پر عمل پیرا ہونے کی توفیق عطا فرمائے۔ آمین 🤲
* *
