10/08/2024
وزیر اعلیٰ خیبر پختونخوا سردار علی امین خان گنڈاپور نے رائٹ ٹو پبلک سرویسز کمیشن کو مزید فعال اورمستحکم بنانے کے لیے متعلقہ قوانین میں ترامیم تجویز کرنے کی ہدایت کی ہے اور کہا ہے کہ کمیشن میں خدمات کی فراہمی کو عوامی توقعات کے مطابق بنانے کیلئے متعلقہ قوانین کو مزید بہتر بنانے کی ضرورت ہے تاکہ جس مقصد کے لیے ادارے بنے ہیں ان کے سو فیصد نتائج حاصل ہوں۔
یہ ہدایت انہوں نے جمعہ کے روز رائٹ ٹو پبلک سرویسز کمیشن کے اجلاس کی صدارت کرتے ہوئے جاری کیں۔ وزیر اعلیٰ کے پرنسپل سیکرٹری امجد علی خان کے علاوہ رائٹ ٹو پبلک سرویسز کمیشن کے کمیشنرز ذاکر حسین، محمد عاصم امام اور دیگر اجلاس میں شریک ہوئے۔
اس موقع پر متعلقہ حکام کی جانب سے رائٹ ٹو پبلک سرویسز کمیشن کے پس منظر ، مینڈیٹ ، لیگل فریم ورک، کارکردگی اور دیگر امور بارے تفصیلی بریفنگ دی گئی۔
وزیر اعلیٰ نے رائٹ ٹو پبلک سرویسز کمیشن میں چیف کمیشنر کی فوری تعیناتی کیلئے اقدامات اٹھانے کی ہدایت کی ہے۔ اس کے علاوہ وزیر اعلیٰ نے عوام کوموثر انداز میں خدمات کی فراہمی یقینی بنانے کیلئے سرکاری افسران کی ترقی کے سلسلے میں کمیشن سے سرٹیفکیٹ کی شرط شامل کرنے کی ہدایت کی ہے۔ مزید برآں وزیر اعلیٰ نے ادارے کو وسیع پیمانے پر عوامی آگہی کے لیے اقدامات اٹھانے کی ہدایت کی ہے اور کہا ہے کہ یہ ادارہ عوام کو مینڈیٹ اور خدمات بارے آگاہی دینے کےلئے پرخصوصی مہم چلائیں تاکہ عوام کو ان آر ٹی ایس کمیشن کے بارے میں علم ہو اور وہ اپنی شکایات کی دادرسی کے لیے رجوع کریں۔
وزیر اعلیٰ نے ڈپٹی کمشنرز کے زیر اہتمام کھلی کچہریوں میں رائٹ ٹو پبلک سرویسز کمیشن کے نمائندوں کو بھی شرکت کرنے اور لوگوں کو اپنے ادارے کے بارے معلومات فراہم کرنے کی ہدایت کی ہے۔
اجلاس کی صدارت کرتے ہوئے وزیر اعلیٰ خیبر پختونخوا کا کہنا تھا کہ عوام کے اداروں پر اعتماد کا انحصار شکایات کے بر وقت ازالے پر ہے، عوام شکایت ہی تب لاتے ہیں جب ان کا اعتماد ہو کہ ادارے موجود ہیں جو کہ ازالہ کریں گے.
