Govt. Elementary School Bega

14/04/2026

14/04/2026

ہیڈ ماسٹر ظفر اقبال اعوان نے اپنی زندگی کے قیمتی 39 سال شعبۂ تدریس کے لیے وقف کیے۔ آپ کی یہ طویل اور مثالی خدمات ستمبر 1987 سے فروری 2026 تک جاری رہیں، جس دوران آپ نے نہ صرف تعلیم کے فروغ میں اہم کردار ادا کیا بلکہ اپنی محنت، دیانت اور خلوص سے ایک مثالی استاد اور منتظم کی حیثیت بھی قائم کی۔

آپ کی ریٹائرمنٹ کے موقع پر ایک شاندار الوداعی تقریب بعنوان "اعترافِ خدمت" خاور مارکی، گلیانہ میں منعقد ہوئی۔ اس پروقار تقریب میں ریٹائرڈ اساتذہ، سرکاری افسران اور اہلِ علاقہ کی کثیر تعداد نے شرکت کی۔ مقررین نے ظفر اقبال اعوان کی تعلیمی خدمات کو زبردست خراجِ تحسین پیش کیا اور ان کی شخصیت کے مختلف پہلوؤں پر روشنی ڈالی۔ شرکاء نے انہیں تحائف پیش کیے اور نیک تمناؤں کا اظہار کیا۔

اپنے دورِ ملازمت میں ظفر اقبال اعوان نے بیگہ سکول کی ترقی میں نمایاں کردار ادا کیا۔ سکول کمیونٹی کے تعاون سے دو نئے کمرہ جماعت تعمیر کروائے، سولر سسٹم نصب کروایا، سکیورٹی کے لیے کیمرے لگوائے اور سکول کے برآمدے سمیت صفائی ستھرائی کے نظام کو بہتر بنایا۔

آپ کی مہمان نوازی، شرافت، صبر و استقامت اور بہترین انتظامی صلاحیتیں ہمیشہ یاد رکھی جائیں گی۔ ان کی یہ خدمات نہ صرف تعلیمی ادارے بلکہ پورے علاقے کے لیے ایک روشن مثال ہیں۔

10/04/2026

جوائنٹ پروونشل الیکشن کمیشن جناب عبد الحفیظ( BPS-20) نے اپنے مادرِ علمی گورنمنٹ ایلیمنٹری اسکول بیگہ مہروجپور میں نتائج کے دن خطاب کرتے ہوئے کہا کہ بچے روزانہ تقریباً چھ گھنٹے اسکول میں گزارتے ہیں، جبکہ باقی وقت وہ اپنے والدین کے ساتھ ہوتے ہیں، اس لیے والدین کی ذمہ داری ہے کہ وہ بچوں کی مناسب توجہ اور بہترین تربیت کو یقینی بنائیں۔

انہوں نے کہا کہ محض تعلیمی ادارہ ہی نہیں بلکہ گھر کا ماحول بھی بچوں کی شخصیت سازی میں اہم کردار ادا کرتا ہے۔ ان کا کہنا تھا کہ اسی اسکول سے تعلیم حاصل کرنے والے کئی طلبہ آج بڑے افسران کے عہدوں پر فائز ہیں، جو اس ادارے کی معیاری تعلیم اور اساتذہ کی محنت کا منہ بولتا ثبوت ہے۔

عبد الحفیظ نے طلبہ کو محنت، نظم و ضبط اور اعلیٰ اخلاق اپنانے کی تلقین کی، جبکہ والدین اور اساتذہ پر زور دیا کہ وہ مل کر بچوں کے روشن مستقبل کے لیے اپنا کردار ادا کریں۔

10/04/2026

داخلے جاری ہیں۔

09/04/2026

گورنمنٹ ایلیمنٹری اسکول بیگہ مہروجپور میں داخلہ جاری ہے

04/04/2026

گورنمنٹ ایلیمنٹری سکول بیگہ مہروجپور میں 2 اپریل 2026 بروز جمعرات، ریسکیو 1122 کے تعاون سے ایک اہم تربیتی پروگرام کا انعقاد کیا گیا۔ اس موقع پر آفیسر محمد حنیف نے اساتذہ اور طلباء کو ہنگامی حالات میں ابتدائی طبی امداد فراہم کرنے کی بنیادی مہارتیں سکھائیں، خصوصاً بے ہوش مریضوں کو CPR دینے کا طریقہ عملی طور پر سمجھایا۔
ہیڈ ماسٹر، اساتذہ اور طلباء نے اس مفید تربیت پر ریسکیو 1122 ٹیم کا شکریہ ادا کیا۔

02/04/2026

گورنمنٹ ایلیمنٹری سکول بیگہ مہروجپور کے سالانہ رزلٹ ڈے کی تقریب میں سابقہ کونسلر چوہدری وسیم احمد جاوید نے بھی اپنے خیالات کا اظہار کیا۔ انہوں نے طلبہ سے خطاب کرتے ہوئے کہا کہ آپ کے والدین آپ کی تعلیم اور بہتر مستقبل کے لیے دن رات محنت کرتے ہیں، اس لیے آپ پر لازم ہے کہ آپ دل لگا کر تعلیم حاصل کریں اور اپنی زندگی میں ایک اعلیٰ مقام حاصل کریں۔

انہوں نے بچوں کو محنت، لگن اور والدین کی قدر کرنے کا درس دیا اور کہا کہ کامیابی انہی کو ملتی ہے جو اپنی ذمہ داریوں کو سمجھتے ہوئے آگے بڑھتے ہیں۔ آخر میں انہوں نے کامیاب ہونے والے طلبہ کو مبارکباد پیش کی اور ان کے روشن مستقبل کے لیے نیک خواہشات کا اظہار کیا۔

02/04/2026

گورنمنٹ ایلیمنٹری سکول بیگہ مہروجپور میں منعقدہ سالانہ رزلٹ ڈے کے موقع پر صدر بیگا ویلفیئر فاؤنڈیشن، چوہدری ندیم منظور بیگا نے اپنے اظہارِ خیال میں کامیاب ہونے والے تمام طلبہ کو دلی مبارکباد پیش کی اور اساتذہ کرام کی محنت کو سراہا۔

انہوں نے والدین پر زور دیا کہ وہ اپنے بچوں کی تعلیم پر بھرپور توجہ دیں اور سکول کے ساتھ مکمل تعاون جاری رکھیں۔ ان کا کہنا تھا کہ ایسے پروگرام بچوں کی حوصلہ افزائی کا سبب بنتے ہیں اور انہیں آگے بڑھنے کا جذبہ دیتے ہیں۔

آخر میں انہوں نے سکول انتظامیہ کی کاوشوں کو خراجِ تحسین پیش کرتے ہوئے اس عزم کا اظہار کیا کہ بیگہ ویلفیئر فاؤنڈیشن تعلیم کے فروغ کے لیے اپنا کردار ادا کرتی رہے گی۔

31/03/2026

گورنمنٹ ایلیمنٹری سکول بیگہ مہروجپور میں آج 31-مارچ-2026 کو سالانہ رزلٹ ڈے نہایت جوش و خروش اور شاندار انداز میں منایا گیا۔ اس موقع پر کثیر تعداد میں والدین اور اہلِ علاقہ نے شرکت کی اور بچوں کی کامیابیوں کو سراہا۔

تقریب میں نمایاں کارکردگی دکھانے والے طلبہ کو انعامات اور اسناد سے نوازا گیا جس سے بچوں کے حوصلے مزید بلند ہوئے۔ اساتذہ کرام نے طلبہ کی محنت اور والدین کے تعاون کو سراہتے ہوئے تعلیمی ترقی کے عزم کا اظہار کیا۔

سکول انتظامیہ تمام کامیاب طلبہ اور ان کے والدین کو دل کی گہرائیوں سے مبارکباد پیش کرتی ہے اور امید ظاہر کرتی ہے کہ یہ بچے مستقبل میں بھی اسی طرح کامیابیوں کے جھنڈے گاڑتے رہیں گے۔

05/04/2025

سالانہ تقریبِ تقسیمِ انعامات - 2025
مورخہ: 5 اپریل 2025، بروز ہفتہ
مقام: گورنمنٹ ایلیمنٹری سکول بیگا مہروج پور

الحمدللہ، گورنمنٹ ایلیمنٹری سکول بیگا مہروج پور کی سالانہ تقریبِ تقسیمِ انعامات 2025 بخیروخوبی اور انتہائی شاندار انداز میں منعقد ہوئی۔ اس باوقار موقع پر والدین کی بھرپور شرکت نے تقریب کو مزید خوش رنگ، متاثر کن اور یادگار بنا دیا۔

اس تقریب کا بنیادی مقصد اُن طلباء کی حوصلہ افزائی تھا جنہوں نے تعلیمی و ہم نصابی سرگرمیوں میں نمایاں کارکردگی کا مظاہرہ کیا۔ کامیاب طلباء کو شیلڈز، میڈلز اور تعریفی اسناد سے نوازا گیا—جو ادارے میں دی جانے والی معیاری تعلیم اور بہترین تربیتی ماحول کا عملی مظہر ہے۔

ادارہ ہٰذا جدید سہولیات سے مزین ہے، جن میں شامل ہیں:

سرسبز و شاداب لان

CCTV کیمروں پر مشتمل حفاظتی نظام

سولر سسٹم

کشادہ اور روشن کلاس رومز

فلٹر شدہ صاف پانی

صفائی ستھرائی کا مثالی انتظام

مفت نصابی کتب

اور ایک باصلاحیت، اعلیٰ تعلیم یافتہ، مخلص اور محنتی حضرات پر مشتمل تدریسی عملہ

ان تمام عوامل نے والدین کے اعتماد کو مزید مضبوط کیا ہے اور یہ ادارہ علاقے میں تعلیمی ترقی کی ایک روشن مثال بن کر ابھرا ہے۔

تقریب کے کامیاب انعقاد پر ہیڈ ماسٹر جناب ملک ظفر اقبال اعوان صاحب اور ان کی قابلِ فخر ٹیم کو دل کی اتھاہ گہرائیوں سے مبارکباد پیش کی جاتی ہے۔
اس مثالی ٹیم میں شامل ہیں:
جناب اللہ دتہ صاحب، علامہ ذوالفقار علی، محمد نوید اسلم، حسنین مصطفی درگاہی، محمد اسحاق، محمد یونس، میڈم رمیسہ فاضل، محمد اویس، محمد شہزاد، مس ردا طارق، لالہ محمد اکرم (چوکیدار) اور محمد امین (مالی)۔

تمام اساتذہ کرام کو ان کی شاندار تعلیمی خدمات پر اچیومنٹ ایوارڈز سے نوازا گیا، جبکہ تمام اسٹاف نے اپنے قابلِ احترام قائد ہیڈ ماسٹر ظفر اقبال اعوان صاحب کو اعزازی شیلڈ پیش کی، جو ان کی بہترین قیادت، اخلاص، اور مسلسل کاوشوں کا اعتراف تھا۔

اسٹیج سیکرٹری کے فرائض نہایت خوش اسلوبی سے سر حسنین مصطفی نے سرانجام دیے، جن کی میزبانی نے تقریب کو مزید جاندار اور مؤثر بنایا۔

خصوصی شکریہ جناب محمد نوید اسلم صاحب کا، جنہوں نے اس خوبصورت تقریب کی تیاریوں میں مرکزی کردار ادا کیا۔

آخر میں ان تمام والدین کا تہہ دل سے شکریہ جنہوں نے اپنی مصروفیات سے وقت نکال کر شرکت فرمائی اور بچوں کی حوصلہ افزائی کی۔

اللہ تعالیٰ کا لاکھوں شکر ہے کہ یہ تقریب کامیابی سے ہم کنار ہوئی، اور ادارہ ہذا کے ہر فرد—خصوصاً محترم ہیڈ ماسٹر اور اُن کی ٹیم—اس کامیابی پر بجا طور پر مبارکباد کے مستحق ہیں۔

تعلیم، تربیت اور اعتماد کا روشن چراغ — گورنمنٹ ایلیمنٹری سکول بیگا مہروج پور