23/04/2026
کالم: "یتیمی، بیماری اور بے حس نظام"
تحریر: شہباز
ملتان کارڈیالوجی ہسپتال کی راہداریوں میں آج انسانیت کو اس وقت سسکتے دیکھا جب ایک 15 سالہ یتیم بچے کی زندگی "ایک کلو وزن" کی بھینٹ چڑھ گئی۔ جس بچے کے سر پر باپ کا سایہ نہیں اور جس کے دل کا سوراخ اور سانس کی نالی کی پیچیدگی کا آپریشن برسوں پہلے ہو جانا چاہیے تھا، وہ آج بھی صرف اس لیے زندہ ہے کہ موت نے شاید ابھی مہلت دے رکھی ہے، مگر ہمارا نظامِ صحت اسے جیتے جی مارنے پر تلا ہوا ہے۔
آج ڈاکٹرز کا یہ سرد جواب کہ "ہمارے پاس 38 کلو سے کم وزن کے بچوں کے لیے آلات نہیں ہیں، لہٰذا یا تو 15 دن میں اس کا وزن ایک کلو بڑھا کر لائیں یا پھر دوبارہ چکر لگائیں"، کسی تازیانے سے کم نہ تھا۔ سوال یہ پیدا ہوتا ہے کہ کیا چوہدری پرویز الٰہی انسٹی ٹیوٹ آف کارڈیالوجی ملتان (CPEIC) جیسے عظیم الشان ادارے میں ان یتیم اور بے سہارا جانوں کو بچانے کے لیے ضروری آلات کا نہ ہونا انتظامیہ کی نااہلی ہے یا غریبوں کو ٹرخانے کا ایک نیا بہانہ؟ کیا ایک کلو وزن کا فرق زندگی اور موت کے درمیان کی لکیر بن سکتا ہے؟
یہ صرف ایک بچے کی کہانی نہیں، بلکہ اس بیوہ ماں کی مامتا کا نوحہ ہے جو اپنے یتیم بچے کو گود میں لیے دور دراز دیہاتوں سے کرائے مانگ کر شہر آتی ہے، مگر اسے صرف نئی تاریخیں ملتی ہیں۔ ہم وزیراعلیٰ پنجاب مریم نواز صاحبہ اور حکومتِ پنجاب سے التجا کرتے ہیں کہ ملتان کارڈیالوجی کے اس نظام کا نوٹس لیں، اس سے پہلے کہ آلات کی کمی اور تاریخوں کے گورکھ دھندے میں کسی بیوہ کا سہارا چھن جائے۔
_Multan_CPEIC Health Department Punjab
@حکومتِ_پنجاب
Maryam Nawaz Sharif
