26/03/2026
تیزگام حادثے کے ہیرو — غازی محبوب حسین
بہاولپور کے قریب پیش آنے والے تیزگام ایکسپریس کے افسوسناک حادثے میں جہاں خوف، بے بسی اور چیخ و پکار کے مناظر دیکھنے کو ملے، وہیں ایک حوصلہ اور قدرتی کرم کی داستان بھی سامنے آئی۔
ہیڈ پرسنل برانچ کراچی محبوب حسین اپنے اہلِ خانہ کے ہمراہ راولپنڈی سے کراچی 8DN تیزگام میں سفر کر رہے تھے کہ اچانک بوگی میں شدید جھٹکے شروع ہو گئے۔ چند ہی لمحوں میں صورتحال قابو سے باہر ہو گئی، بوگی پٹری سے اتر کر الٹ گئی اور چاروں طرف گھپ اندھیرا چھا گیا۔ مسافروں کی چیخیں، بچوں کا رونا اور ہر طرف پھیلا خوف ایک قیامت صغریٰ کا منظر پیش کر رہا تھا۔
ان نازک لمحات میں محبوب حسین نے ہمت اور حوصلے کا مظاہرہ کرتے ہوئے نہ صرف اپنے اہلِ خانہ کو سنبھالا بلکہ دیگر مسافروں کی مدد کے لیے بھی آگے بڑھے۔ ہر طرف ملبہ، الٹی بوگیاں اور سہمے ہوئے چہرے تھے، مگر وہ ثابت قدم رہے۔
قدرت کا خاص کرم یہ ہوا کہ وہ اور ان کا خاندان اس خوفناک حادثے میں محفوظ رہے، یوں وہ حقیقی معنوں میں “غازی محبوب حسین” بن کر سامنے آئے۔
حادثے کے فوری بعد مقامی افراد اور ریسکیو ٹیمیں حرکت میں آئیں اور امدادی کارروائیاں شروع کر دیں۔ لودھراں انتظامیہ کے مطابق تاحال کسی جانی نقصان کی اطلاع نہیں ملی، جو اس سانحے میں ایک بڑی راحت کی بات ہے۔
یہ واقعہ جہاں ایک طرف ایک دل دہلا دینے والی یاد بن گیا، وہیں دوسری جانب حوصلے، انسانیت اور اللہ تعالیٰ کے خاص فضل کی ایک زندہ مثال بھی ہے.
