15/09/2026
مہا جر قومی موومنٹ (پاکستان)200/2026
15-09-2026
سندھ اسمبلی میں اکثریتی آمریت کی ایک اور مثال بلدیاتی ترمیمی بل ہے: مہاجر قومی موومنٹ
کراچی: سندھ اسمبلی میں عددی اکثریت کی بنیاد پر منظور کیے جانے والے بلدیاتی ترمیمی بل نے ایک بار پھر یہ سوال اٹھا دیا ہے کہ کیا عوام کے منتخب نمائندوں کے اختیارات اور مقامی حکومتوں کے نظام کو سیاسی مفادات کے تابع کیا جا رہا ہے،پیپلزپارٹی اپنی عددی اکثریت کو جمہوری مشاورت کے بجائے اختیارات کے ارتکاز کے لیے استعمال کر رہی ہے، جو جمہوری اصولوں کے منافی ہے۔
چیئرمین آفاق احمد کی رہائش گاہ سے جاری ایک بیان میں ترجمان مہاجر قومی موومنٹ نے کہا کہ بار بار کی جانے والی ترامیم نے بلدیاتی اداروں کے اختیارات اور خودمختاری کو محدود کیا ہے۔ یہ طرزِ عمل سندھ میں بلدیاتی جمہوریت کو کمزور کرنے کے مترادف ہے۔
ترجمان نے کہا کہ بلدیاتی اداروں کو حقیقی انتظامی، مالی اور سیاسی اختیارات دیے جائیں اور آئندہ بلدیاتی انتخابات شفاف، آزادانہ اور مقررہ آئینی مدت کے اندر کرائے جائیں تاکہ عوام کو بااختیار مقامی حکومت کا حق حاصل ہوسکے۔
جاری کردہ: شعبہ نشر و اشاعت
