26/06/2026
جيڪب آباد: قابل احترام رڪن قومي اسيمبلي ۽ چيف وِپ قومي اسيمبلي مير اعجاز حسين خان جکراڻي ڊپٽي ڪمشنر جيڪب آباد، چيئرمين ميونسپل ڪميٽي، چيئرمين ضلع ڪائونسل، الحاج مير غضنفر خان جکراڻي ۽ ٻين معززن سان گڏ جيڪب آباد انسٽيٽيوٽ آف ميڊيڪل سائنسز “جمس” جو دورو ڪيو.
دوري دوران وفد محرم الحرام، خاص طور تي 9 ۽ 10 محرم الحرام جي حوالي سان ڪيل طبي، ايمرجنسي ۽ انتظامي انتظامن جو تفصيلي جائزو ورتو.
بعد ۾ مير اعجاز حسين خان جکراڻي ۽ ٻين معززن سي سي ٽي وي ڪنٽرول روم جو پڻ دورو ڪيو، جتي کين محرم الحرام جي جلوسن، مجلسن ۽ مرڪزي روٽن جي سيڪيورٽي مانيٽرنگ لاءِ لڳايل ڪئميرائن، نگراني واري نظام ۽ پوليس توڙي ضلعي انتظاميه جي گڏيل قدمن بابت بريفنگ ڏني وئي. وفد ڪنٽرول روم جي عملي جي ڪارڪردگي ۽ سيڪيورٽي انتظامن جو پڻ جائزو ورتو.
ان کان علاوه وفد بخاري روٽ سميت مختلف هنڌن تي قائم ميڊيڪل ڪئمپن ۽ عزادارن لاءِ لڳايل پاڻي جي سبيلن جو به دورو ڪيو. ان موقعي تي مير اعجاز حسين خان جکراڻي عزادارن کي پاڻي پياري امام حسين عليه السلام ۽ شهداءِ ڪربلا جي عظيم قربانين جي ياد تازہ ڪئي ۽ چيو ته سبيلِ حسينؑ خدمتِ انسانيت، محبتِ اهلِ بيتؑ ۽ حق جي پيغام جي روشن علامت آهي.
ان موقعي تي مير اعجاز حسين خان جکراڻي جمس انتظاميه، ڊاڪٽرن، نرسنگ اسٽاف، پوليس، ضلعي انتظاميه، ميونسپل عملي ۽ ٻين لاڳاپيل ادارن جي ڪوششن کي ساراهيندي چيو ته محرم الحرام دوران عزادارن کي هر ممڪن سهولت، طبي امداد، پيئڻ جو پاڻي، صفائي، روشني ۽ سيڪيورٽي فراهم ڪرڻ اسان سڀني جي گڏيل ذميواري آهي.
هن چيو ته ضلعي انتظاميه، پوليس، جمس انتظاميه ۽ ٻين لاڳاپيل کاتن طرفان ڪيل انتظام اطمينان بخش آهن، تنهن هوندي به سڀئي آفيسر ۽ عملو محرم الحرام جي پڄاڻي تائين مڪمل الرٽ رهي ته جيئن عزادارن ۽ شهرين کي ڪنهن به قسم جي پريشاني کي منهن نه ڏيڻو پوي.
Agha Siraj
