01/11/2022
نامياتي زراعت ORGANIC AGRICULTURE
زراعت جو مطلب ڇا آهي؟
نامياتي زراعت ماحول کي خراب اثرن کي گهٽائڻ، غير قابل تجديد Non-renewable مواد جي استعمال کان بچڻ، جتي ممڪن هجي اتي Recycling ڪجي، گهٽ ۾ گهٽ دوائن جو استعمال، آلودگي جو سبب بڻجن وارن موادن جي استعمال کان بچڻ، فصلن جو ڦير ڦار ڪرڻ، فصلن جو باقيات وسيلن ۽ جانورن جي وٽاڻ جو استعمال، نقصانده ڪيڙن ۽ جيوڙن جو حياتياتي ڪنٽرول ڪرڻ، هَر ۽ گُڏ جو گهٽ ۾ گهٽ استعمال ته جيئن زمين جي پيداواري صلاحيت برقرار رهي ۽ توانائي جي استعمال کي پڻ گهٽائي سگهجي، زمين وڌيڪ زرخيز رهي.
نامياتي طريقي سان زمين جي صحت بهتر ٿئي ٿي، فائديمند ڪِيڙن جهڙوڪ سَانپا Early worms، مَنگس ۽ ٻيا مٽيء جا جيوڙا بهتر واڌ ويجهه ڪن ٿا.نامياتي زراعت زمين جي زرخيزي کي ضايع ۽ خراب ٿيڻ کان بچائي ٿي.
زمين جي زرخيزي بهتر ٿئي ٿي ۽ پاڻي کي دير تائين باقي رکڻ جي صلاحيت Water holding capacity پڻ بهتر ٿئي ٿي.
نامياتي زراعت ۾ (Inputs) گهٽ استعمال ٿين ٿا، جهڙوڪ هَر، ڀاڻ ۽ دوائون وغيره، نامياتي زراعت ذريعي حاصل ڪيل پيداوار کي ماحولياتي ۽ سماجي ۽ صحت خدشن سبب مارڪيٽ ۾ بهتر قيمت (Premium Price ) ملي ٿي. گهڻو ڪري نامياتي زراعت مقامي وسيلن ۽ ٽيڪنالاجي ذريعي ڪئي ويندي آهي جنهن جي ڪري زميندار کي ڪا خاص ڏکيائي يا مشڪل پيش ناهي ايندي.
نامياتي زراعت جا ماحول تي اثر
1- زمين جي حياتياتي سرگرمي جي بهتري.
2- زمين جي physical خاصيتن جي بهتري.
3- نائٽريٽ جي ضايع ٿيڻ (leaching) کي گهٽائڻ.
4- جهنگلي جيوت کي وڌائڻ.
نامياتي زراعت جا مقصد
1- زرعي خرچ گهٽائڻ.
2- مزدورن جو گهٽ استعمال ۽ گهٽ محنت.
3- وڌيڪ پيداوار.
4- بهتر ڪوالٽي.
5- صحتمند پيداوار زراعت.
6- نائٽريٽ جي ڪري آلودگي کي روڪڻ.
نامياتي زراعت شروع ۾ روايتي فصلن جي ڀيٽ ۾ گهٽ پيداوار ڏئي ٿي پر نامياتي زراعت ۾ روايتي زراعت جي مقابلي ۾ (Inputs) گهٽ استعمال ڪيا ويا آهن ان ڪري پيداوار ۾ گهٽائي ڏسڻ ۾ اچي ٿي. البته آهستي آهستي جيئن نامياتي طريقا وڌنڌا رهندا، زمين جي صحت بهتر ٿيندي ، زميني جيوت (worms) جي سرگرمي بهتر ٿيندي تيئن پيداوار ۾ پڻ بهتري ايندي ۽ ايستائين جو روايتي طريقن کان وڌيڪ پيداوار حاصل ڪري سگهجي. هن وقت پاڪستان توانائي جي شديد بحران ۽ ڪيميائي ڀاڻن جي بلند ترين قيمتن کي منهن ڏئي رهيو آهي، خام مال جهڙوڪ راڪ فاسفيٽ (Rock Phosphate) تيزي سان ختم ٿي رهيو آهي ۽ دنيا ۾ سياسي مسئلن ۽ تبديلي سبب ڪيميائي ڀاڻن جون قيمتون تمام گهڻو مٿي هليون ويون آهن ۽ عام زميندار جي قوت خريد کان ٻاهر آهي. ۽ اها صورتحال مستقل خراب ٿي رهي آهي تنهنڪري اها وقت جي ضرورت آهي ته نامياتي زراعت کي وقت ِسر اپنائجي ته جيئن گهڻي خرچ، بهتر ڪوالٽي، ماحول دوست ۽ گهڻي پيداوار حاصل ڪري ملڪ ۽ دنيا جي وڌندڙ آبادي جي خوراڪ جي ضرورت جو پوراءُ ڪجي.
شعبه ڳوٺ محله سڌار
اصغريه علم و عمل تحريڪ پاڪستان
