11/06/2026
پولیس ٹریننگ کالج ہنگو میں سی ٹی ڈی افسران کے لیے "اسلامی تعلیمات کی روشنی میں پیشہ ورانہ اخلاقیات" پر آن لائن لیکچر کا انعقاد
آج مورخہ 11 جون 2026 کو پولیس ٹریننگ کالج ہنگو میں جاری کاؤنٹر ٹیررازم ڈیپارٹمنٹ (CTD) ایڈوانس کورس کے افسران کی پیشہ ورانہ تربیت کے سلسلے میں جناب رضوان منظور، کمانڈنٹ پولیس ٹریننگ کالج ہنگو کی خصوصی ہدایات پر ایک آن لائن لیکچر کا انعقاد کیا گیا۔
محترمہ پروفیسر ڈاکٹر شازیہ رمضان، ڈین فیکلٹی آف آرٹس اینڈ ہیومینیٹیز، یونیورسٹی آف ایگریکلچر فیصل آباد نے "Observance of Ethics at Workplace in the Light of Teachings of Islam" کے موضوع پر تفصیلی اور فکر انگیز لیکچر دیا۔
محترمہ پروفیسر ڈاکٹر شازیہ رمضان نے لیکچر دیتے ہوئے کہا کہ اسلام ایک مکمل ضابطۂ حیات ہے جو زندگی کے ہر شعبے میں اخلاقیات، دیانت داری اور ذمہ داری کا درس دیتا ہے۔ انہوں نے اس بات پر زور دیا کہ کسی بھی ادارے کی کامیابی اور عوامی اعتماد کے حصول کے لیے پیشہ ورانہ مہارت کے ساتھ ساتھ اعلیٰ اخلاقی اقدار کا ہونا بھی ناگزیر ہے۔ انہوں نے کہا کہ سرکاری ملازمین خصوصاً قانون نافذ کرنے والے اداروں کے افسران کو اپنے فرائض کی انجام دہی میں دیانت داری، انصاف، امانت، وقت کی پابندی، باہمی احترام اور عوامی خدمت کے جذبے کو ہمیشہ مقدم رکھنا چاہیے۔
انہوں نے مزید کہا کہ اسلامی تعلیمات ہمیں اختیارات کے درست استعمال، احتسابِ ذات، وعدوں کی پاسداری اور ہر قسم کی بدعنوانی سے اجتناب کا درس دیتی ہیں۔ ایک بااخلاق اور ذمہ دار افسر نہ صرف اپنے ادارے کی ساکھ کو بہتر بناتا ہے بلکہ معاشرے میں امن، انصاف اور اعتماد کے فروغ میں بھی اہم کردار ادا کرتا ہے۔
لیکچر کے دوران شرکاء کو اسلامی نقطۂ نظر سے پیشہ ورانہ اخلاقیات کی اہمیت، عملی زندگی میں ان کے اطلاق اور موجودہ دور کے تقاضوں کے مطابق ان کی افادیت سے آگاہ کیا گیا۔
لیکچر کے اختتام پر سوال و جواب کی نشست منعقد ہوئی جس میں شرکاء نے موضوع سے متعلق مختلف سوالات کیے جن کے محترمہ پروفیسر ڈاکٹر شازیہ رمضان نے جامع اور تسلی بخش جوابات دیے۔ شرکاء نے لیکچر کو نہایت مفید، معلوماتی اور پیشہ ورانہ زندگی کے لیے موزوں قرار دیتے ہوئے کمانڈنٹ پولیس ٹریننگ کالج ہنگو جناب رضوان منظور کا شکریہ ادا کیا کہ ان کی خصوصی ہدایات پر اس اہم اور بامقصد لیکچر کا انعقاد ممکن ہوا۔
