05/02/2026
گورنمنٹ بوائز ڈگری کالج گوادر میں یومِ یکجہتیٔ کشمیر کی مناسبت سے تقریب کا انعقاد
گوادر: 5 فروری— یومِ یکجہتیٔ کشمیر کے موقع پر گورنمنٹ بوائز ڈگری کالج گوادر میں ایک پُروقار اور بامقصد تقریب کا انعقاد کیا گیا، جس میں کالج کے اساتذہ اور طلبہ کی بڑی تعداد نے شرکت کی۔ تقریب کا مقصد کشمیری عوام کے ساتھ یکجہتی کا اظہار اور ان کی جائز جدوجہدِ آزادی کی حمایت کرنا تھا۔
تقریب کا آغاز تلاوتِ کلامِ پاک سے ہوا، جس کے بعد طلبہ نے تقاریر کے ذریعے مسئلہ کشمیر کی تاریخی، سیاسی اور انسانی اہمیت پر روشنی ڈالی۔ مقررین نے مقبوضہ جموں و کشمیر میں جاری انسانی حقوق کی سنگین خلاف ورزیوں کی مذمت کی اور کشمیری عوام کی قربانیوں کو خراجِ تحسین پیش کیا۔
تقریب سے خطاب کرتے ہوئے کالج کے پرنسپل نصیر احمد نے کہا کہ کشمیری عوام کی جدوجہد دراصل حقِ خودارادیت کی جدوجہد ہے، جس کی حمایت ہر باشعور انسان کی اخلاقی ذمہ داری ہے۔ انہوں نے طلبہ پر زور دیا کہ وہ مسئلہ کشمیر کو سمجھیں اور اسے مؤثر انداز میں قومی و عالمی سطح پر اجاگر کرنے میں اپنا کردار ادا کریں۔
وائس پرنسپل حنیف حمل نے اپنے خطاب میں کہا کہ پاکستانی قوم کشمیری بھائیوں کو کبھی تنہا نہیں چھوڑے گی اور ہر سطح پر ان کے ساتھ بھرپور یکجہتی کا اظہار جاری رکھے گی۔
تقریب کے اختتام پر کشمیری شہدا کے ایصالِ ثواب کے لیے خصوصی دعا کی گئی اور اس عزم کا اعادہ کیا گیا کہ پاکستان کے عوام بالخصوص تعلیمی ادارے کشمیری عوام کے ساتھ اپنی اخلاقی، سیاسی اور سفارتی حمایت جاری رکھیں گے۔
