17/08/2026
مورخہ: 17 اگست 2026
خیبر پختونخوا کی پہلی ڈیزاسٹر رسک ریڈکشن پالیسی 2026 کا باقاعدہ اجراء
(پشاور): خیبر پختونخوا حکومت نے صوبے کی تاریخ میں پہلی مرتبہ ڈیزاسٹر رسک ریڈکشن (DRR) پالیسی 2026 باقاعدہ طور پر لانچ کر دی، جسے صوبے میں قدرتی آفات سے نمٹنے، نقصانات کم کرنے، پیشگی تیاری اور عوام کے تحفظ کے حوالے سے ایک اہم سنگ میل قرار دیا گیا ہے۔
ڈیزاسٹر رسک ریڈکشن پالیسی 2026 صوبائی ڈیزاسٹر مینجمنٹ اتھارٹی (PDMA) خیبر پختونخوا نے جرمن حکومت اور GIZ پاکستان کے تعاون سے تیار کی ہے۔
اس سلسلے میں پشاور میں ایک خصوصی تقریب کا انعقاد کیا گیا۔ جس کے مہمان خصوصی صوبائی وزیر اطلاعات شفیع اللہ جان تھے۔ تقریب میں سیکرٹری ریلیف، بحالی و آبادکاری خیبر پختونخوا سہیل خان، ڈائریکٹر جنرل پی ڈی ایم اے خیبر پختونخوا عارف اللہ اعوان، جرمن حکومت کی نمائندہ ڈاکٹر ماریا بوڈن بین ڈر اور ایڈاپٹو سوشل پروٹیکشن GIZ پاکستان کی پراجیکٹ ہیڈ مس یوہانا کونوس سمیت دیگر معزز شخصیات نے شرکت کی۔
تقریب سے خطاب کرتے ہوئے مقررین نے قدرتی اور موسمیاتی تبدیلیوں سے پیدا ہونے والے خطرات میں اضافے پر روشنی ڈالی اور آفات سے نمٹنے کے لیے پیشگی تیاری، خطرات میں کمی اور اداروں کے درمیان بہتر رابطہ کاری کی ضرورت پر زور دیا۔
ڈائریکٹر جنرل پی ڈی ایم اے خیبر پختونخوا عارف اللہ اعوان نے تقریب میں DRR پالیسی 2026 کے حوالے سے تفصیلی پریزنٹیشن دی۔ انہوں نے پالیسی کے مقاصد، اہم نکات اور اس کی ضرورت پر روشنی ڈالتے ہوئے کہا کہ اس پالیسی کے ذریعے آفات کے بعد صرف امدادی کارروائیوں تک محدود رہنے کے بجائے آفات کے خطرات کی روک تھام، پیشگی تیاری، نقصانات میں کمی اور بہتر منصوبہ بندی پر خصوصی توجہ دی جائے گی۔
انہوں نے بتایا کہ DRR پالیسی 2026 کے تحت متعلقہ سرکاری محکموں، اداروں، ترقیاتی شراکت داروں اور مقامی آبادی کے درمیان رابطہ کاری کو مزید مؤثر بنایا جائے گا۔ اس کے علاوہ خطرات کی نشاندہی، ابتدائی وارننگ سسٹم، عوامی آگاہی، ہنگامی تیاری اور ڈیزاسٹر ریزیلینٹ ترقی کو مزید بہتر بنانے میں مدد ملے گی۔
تقریب سے خطاب کرتے ہوئے دیگر معزز مہمانوں نے DRR پالیسی کی تیاری اور اجراء کو سراہا اور کہا کہ موجودہ دور میں موسمیاتی تبدیلی اور قدرتی آفات کے بڑھتے ہوئے خطرات کے پیش نظر اس طرح کی جامع پالیسی وقت کی اہم ضرورت ہے۔
مہمان خصوصی صوبائی وزیر اطلاعات میاں شفیع اللہ جان نے DRR پالیسی 2026 کی تیاری اور اجراء پر PDMA، ریلیف، بحالی و آبادکاری محکمہ، جرمن حکومت اور GIZ پاکستان کی کاوشوں کو سراہا۔
انہوں نے کہا کہ موسمیاتی تبدیلی کے باعث قدرتی آفات کے خطرات میں اضافہ ہو رہا ہے، اس لیے آفات سے پہلے تیاری، خطرات میں کمی اور عوام کو محفوظ بنانے کے لیے مربوط اقدامات ناگزیر ہیں۔
صوبائی وزیر اطلاعات نے خیبر پختونخوا کی پہلی DRR پالیسی 2026 کی تیاری کو ایک اہم کامیابی قرار دیتے ہوئے اس عزم کا اظہار کیا کہ پالیسی پر مؤثر عملدرآمد کے ذریعے صوبے میں آفات سے نمٹنے کی صلاحیت کو مزید مضبوط بنایا جائے گا۔
تقریب کے دوران مقررین نے اس بات پر بھی زور دیا کہ پالیسی کی کامیابی کے لیے اس پر مؤثر عملدرآمد، اداروں کے درمیان مضبوط رابطہ کاری اور عوام کی بھرپور شمولیت ضروری ہے۔
تقریب کے اختتام پر صوبائی وزیر اطلاعات شفیع اللہ جان نے DRR پالیسی 2026 کی تیاری اور حتمی شکل دینے میں اہم کردار ادا کرنے والے افسران، ماہرین اور شراکت دار اداروں کے نمائندوں میں خصوصی شیلڈز تقسیم کیں۔
تقریب کا اختتام خیبر پختونخوا کو ایک محفوظ، بہتر طور پر تیار اور آفات کے مقابلے میں مضبوط صوبہ بنانے کے عزم کے ساتھ ہوا۔
Relief Rehabilitation & Settlement Department KPAqib Ullah Khan Government of Khyber Pakhtunkhwa NDMA GIZ,German International CooperationDirectorate General Information & PRs, KPChief Secretary Khyber PakhtunkhwaChief Minister Khyber Pakhtunkhwa
