21/05/2026
ریسکیو ڈیرہ غازیخان اور ضلعی انتظامیہ کے اشتراک سے دریائے سندھ غازی گھاٹ کے مقام پر ممکنہ سیلاب کے پیش نظر موک ایکسرسائز کا انتقاد کیا گیا
ریسکیو ڈیرہ غازیخان نے ڈسٹرکٹ ایمرجنسی آفیسر انجینئر احمد کمال کی زیر قیادت ضلعی انتظامیہ کے باہمی تعاون سے دریائے سندھ غازی گھاٹ کے مقام پر ممکنہ سیلابی صورتحال سے نمٹنے کے لیے ایک جامع مشترکہ پری فلڈ موک ایکسرسائز کا انعقاد کیا۔جس کے مہمان خصوصی ڈپٹی کمشنر ڈیرہ غازیخان عثمان خالد تھے۔اے ڈی سی آر عثمان بخاری اور اسسٹنٹ کمشنر تیمور عثمان نے بھی شرکت کی۔
اس موک ایکسرسائز کا بنیادی مقصد ممکنہ سیلابی ہنگامی صورتحال کے دوران ریسکیو ٹیموں کی پیشہ ورانہ تیاری، بروقت ردِعمل، فلڈ ریسکیو آپریشنز، عوام کے محفوظ انخلاء اور ایمرجنسی صورتحال سے نمٹنے کی عملی صلاحیتوں کا جائزہ لینا تھا تاکہ کسی بھی قدرتی آفت کی صورت میں فوری اور مؤثر امدادی کارروائیوں کو یقینی بنایا جا سکے۔
دریائے سندھ غازی گھاٹ کے مقام پر ہونے والی اس موک ایکسرسائز کے دوران مختلف فرضی ہنگامی صورتحال پیدا کر کے فلڈ ریسکیو آپریشنز، متاثرہ افراد کی منتقلی، ابتدائی طبی امداد اور محفوظ مقامات تک انخلاء کے عملی مراحل کا مظاہرہ کیا گیا۔ اس مشق کے ذریعے تمام متعلقہ اداروں کے درمیان باہمی ہم آہنگی، مشترکہ حکمتِ عملی اور فوری ردِعمل کی صلاحیت کو مزید مؤثر بنانے پر خصوصی توجہ دی گئی۔
اس مشترکہ مشق میں ریسکیو کی ٹیموں کے ساتھ لائیو اسٹاک ڈیپارٹمنٹ ،محکمہ صحت، سول ڈیفنس ،محکمہ انہار، پنجاب سیف سٹی اتھارٹی نے بھی بھرپور شرکت کی۔ مختلف اداروں کی مشترکہ شمولیت نے اس امر کو یقینی بنایا کہ کسی بھی ممکنہ سیلابی یا قدرتی آفت کی صورت میں عوام کی جان و مال کے تحفظ کے لیے تمام ادارے مکمل طور پر تیار اور متحرک ہیں۔
اس موقع پر ڈپٹی کمشنر ڈیرہ غازیخان عثمان خالد نے موک ایکسرسائز اور مختلف ریسکیو مشقوں کا تفصیلی معائنہ کیا اور ریسکیورز کی پیشہ ورانہ صلاحیتوں، نظم و ضبط اور بروقت ردِعمل کو سراہتے ہوئے ان کی حوصلہ افزائی کی۔
ڈسٹرکٹ ایمرجنسی آفیسر انجینئر احمد کمال نے اس موقع پر کہا کہ ریسکیو ہر قسم کی ہنگامی صورتحال سے نمٹنے کے لیے ہمہ وقت تیار ہے اور اس نوعیت کی مشقوں کا مقصد اداروں کے درمیان رابطوں کو مضبوط بنا کر عوام کو بروقت اور معیاری امداد فراہم کرنا ہے۔
