10/12/2025
پشاور: ادبیاتِ اطفال خیبر پختونخوا کے زیر اہتمام ایک روزہ ادبی میلہ اختتام پذیر
پشاور میں ادبیاتِ اطفال خیبر پختونخوا کی جانب سے منعقدہ ایک روزہ ادبی میلہ بھرپور کامیابی اور ایک نئی امید کے ساتھ اختتام پذیر ہوگیا۔ پروگرام میں پشاور، درہ آدم خیل اور کوہاٹ کے مختلف سکولوں کے بچوں نے شرکت کرکے یہ ثابت کردیا کہ آج کے بچے ہی کل کا روشن مستقبل ہیں اور یہ مستقبل نئے لکھاریوں اور تربیت یافتہ نوجوان ذہنوں کے ہاتھوں میں ہے۔
تقریب میں معروف شخصیات اور ادب اطفال سے وابستہ نامور لکھاریوں ڈاکٹر سیما شفیع، ڈاکٹر راج آفریدی، شاہ محمود مہمند، اے وسیم خٹک، نازیہ نزی، ارشد سلیم، شاہد شیزاری، فواد شیرازی، گل ارباب، کلثوم زیب اور سدرۃ المنتہی سمیت متعدد شخصیات نے شرکت کرکے تقریب کو چار چاند لگائے جبکہ 2025 میں شائع ہونے والی بچوں کی کتابوں کی رونمائی بھی کی گئی۔
یہ اپنی نوعیت کا پہلا ادب اطفال میلہ تھا جس میں روایتی تقریروں کی بجائے بچوں کو بھرپور موقع فراہم کیا گیا کہ وہ اسٹیج پر اپنی صلاحیتوں کا اظہار کریں۔
تقریب میں بشریٰ فرخ اور اے آئی جی نائلہ کی خصوصی شرکت بھی قابل ذکر رہی۔ شرکاء نے اسے خیبر پختونخوا کے لئے "ایک روشن صبح" سے تعبیر کیا کیونکہ بچوں کے نام سے اس نوعیت کا کوئی ایونٹ اس سے قبل منعقد نہیں کیا گیا تھا، جو اب کامیابی سے ہمکنار ہوا۔ اس محفل کی بڑی خوبی یہ تھی کہ درہ آدم خیل لائبریری کے ہونہار بچوں نے مختلف ایونٹس میں بڑھ چڑھ کر حصہ لیا ۔
لائبریری منتظم نجات حسین صاحب اور مختلف ایونٹس کے رہبر شیر کریم صاحب نے بچوں کی خاطر اپنی مصروفیات ترک کیں اور بچوں کو پشاور کے اس میلے میں شرکت کرنے لے آئے ۔
اس کے ساتھ درہ آدم خیل لائبریری نے مختلف سیشن میں انعامات کو سپانسر کرکے علاقے کا نام روشن کیا۔
