07/07/2023
کسی بھی قوم کی تعمیر میں بنیادی اقدار ہی اہم کردار ادا کرتی ہیں۔ عروج و زوال کے اسباب بھی بنیادی اقدار ہی میں ہوتے ہیں۔ چونکہ علم ہمیشہ عمل کا امام ہوتا ہے، لہٰذا بنیادی اقدار صحیح علم سے ہی آتی ہیں اور درست علم مطالعۂ کتب سے حاصل ہوتا ہے جس سے سوچ وسیع اور انسان کا ذہہن اس سطح تک رسائی پاسکتا ہے جہاں سے اعلی و ادنی کا فرق جان سکے۔ اچھی اور مفید کتابوں کے مطالعہ سے ہی انسان کی زندگی میں سکون اور اطمینان جیسی اعلیٰ اور مطلوبہ صفات پیدا ہوسکتی ہیں اور سب سے ضروری یہ کہ علم و طلب کو اپنے لگن اور شوق سے پورا کرنا ہوتا ہے۔
مطالعہ کتب کا ذوق بڑھانے کے سلسلے میں سب سے زیادہ رول اساتذہ اور اسکول انتظامیہ ادا کر سکتی ہے۔ اپنے اسکولوں میں اچھی لائبریری قائم کرنے کے بعد طلبہ کو کتابوں کامطالعہ اور بعد میں حاصل مطالعہ کو بیان کرنے کا رواج اگر قائم کیا جائے تو بچپن ہی سے ایک بچے کے اندر یہ عادت گھرکر جائے گی۔ ساتھ ہی والدین کوچاہیے کہ اپنے بچوں کو نئی نئی کتابیں خرید نے پر اُن کی ستائش کریں۔
