24/01/2026
گورنرخیبر پختونخوا فیصل کریم خان کنڈی نے کہا ہے کہ صوبائی حکومت نے نوجوانوں سے جھوٹے وعدے کئے، 13 سالہ حکومت نے صوبے کو برباد کیاایک سٹیڈیم نہیں بنایا، پی ٹی آئی دکھائے کہاں گھر،ڈیم اور دیگر منصوبے شروع ہوئے, عمران خان کے رشتہ دار کے آگے وزیر اعلی بے بس ہے، پاک فوج نے ہندوستان کو تاریخی شکست دی، ہندوستان کو شکست کے بعد گرین پاسپورٹ کی عزت میں اضافہ ہواہے، بینظیر انکم سپورٹ پروگرام ہر غریب کیلئے ہے، 2008 میں ہم نے امن قائم کیاتھاہم نے پاکستانی پرچم کو بلند کیا تھا۔
ان خیالات کا اظہار انہوں نے تحصیل درگئی میں ورکرز کنونشن سے خطاب کرتے ہوئے کیا،اس موقع پر پیپلز پارٹی کے صوبائی صدر سید محمد علی شاہ باچہ،رکن صوبائی اسمبلی احمد کریم کنڈی، سابقہ صوبائی صدر نجم الدین،ضلعی صدر احمد علی شاہ باچہ،سابقہ ناظم عتتق خان اور دیگر قائدین نے بھی خطاب کیا
گورنر خیبر پختونخوا فیصل کریم خان کنڈی نے کہا کہ گالم گلوچ سے نہیں مقدمہ لڑنے سے صوبے کے حقوق ملتے ہیں ،امپورٹڈ اپوزیشن لیڈر لایاگیا، پیپلز پارٹی صوبے میں نوجوانوں کو حقوق دے گی، خیبر پختونخوا کی یونیورسٹیوں میں بھی لیپ ٹاپ تقسیم ہونے چاہیں، پنجاب حکومت صوبے کو آٹے بحران سے نکالنے کیلئے اقدامات کرے،ہم کم قیمت بجلی،تمباکو، معدنیات ریاست کودے رہے ہیں
انہوں نے کہا کہ خیبر پختونخوا میں آٹے کے بحران کے حوالے سے وزیراعظم نوٹس لیں، ہم پارٹی میں سزا جزا کرکے آگے جائیں گے، صوبہ کا اگلا وزیر اعلی جیالا ہو گا-
