02/12/2025
نشیمن فیصل آباد اور نشیمن بہاولپور، معذور افراد کی بحالی کے وہ ادارے ہیں جو 2017 میں مسلم لیگ (ن) کی حکومت کے دور میں محترم میاں محمد شہباز شریف صاحب کی قیادت میں قائم ہوئے اور 2018 میں باقاعدہ طور پر کام کا آغاز کیا۔ یہ ادارے خصوصی افراد کے لیے امید کی کرن ثابت ہوئے۔ یہاں سے تربیت حاصل کرنے والے بے شمار معذور افراد نے سرکاری اور نجی اداروں میں نوکریاں حاصل کیں، کئی کو اثاثہ جات اور کاروبار شروع کرنے میں مدد دی گئی، جبکہ اداروں میں قائم Job Placement Desk خصوصی افراد کی مکمل رہنمائی کرتا اور انہیں روزگار کے حصول میں ہر ممکن مدد فراہم کرتا تھا۔
ان اداروں کی کارکردگی نہایت شاندار رہی اور انہوں نے درجنوں خاندانوں کی زندگی بدل دی۔ افسوس کہ محکمہ سوشل ویلفیئر نے صرف اس بنیاد پر کہ اداروں کی اپنی عمارت موجود نہیں تھی، انہیں اچانک بند کر دیا۔ اس فیصلے سے نہ صرف سینکڑوں معذور افراد تعلیم اور روزگار سے محروم ہوئے بلکہ 37 ملازمین اور ان کے خاندان بھی بے روزگار ہو گئے۔
یہ فیصلہ نہ صرف میاں محمد شہباز شریف صاحب کی فلاحی کاوشوں کی نفی ہے بلکہ وزیرِ اعلیٰ پنجاب محترمہ مریم نواز شریف صاحبہ کے وژن برائے خصوصی افراد کے توانائی بخش مستقبل کے بھی منافی ہے۔
ہم امید کرتے ہیں کہ وزیرِ اعلیٰ پنجاب محترمہ مریم نواز صاحبہ اور وزیر برائے سوشل ویلفیئر جناب سہیل شوکت بٹ صاحب اس معاملے کا فوری نوٹس لیں گے، ان اداروں کی بندش کی انکوائری کروائیں گے اور نشیمن فیصل آباد و بہاولپور کو دوبارہ بحال کر کے معذور افراد کو ان کا حق واپس دلوائیں گے۔
