03/06/2026
INFO SERYE EPISODE 1 | Kabalo ba ka unsa ang Highly Urbanized City o HUC?"
Ang Highly Urbanized City usa ka espesyal nga status sa usa ka siyudad nga dako na ang populasyon, lig-on ang kita, ug paspas ang kalamboan. Sama niini ang Naga City sa Camarines Sur nga bag-ohay lang nahimong HUC, ug dinhi sa Northern Mindanao, ang Cagayan de Oro City ug Iligan City.
Sumala sa Local Government Code, kinahanglan adunay kapin 200,000 ka populasyon ug igo nga income (dili moubos sa ₱50 million) aron mahimong kwalipikado isip Highly Urbanized City.
Karon, kwalipikado na ang Valencia City tungod kay aduna na kini populasyon nga kapin 223,000 ug kapin ₱2 bilyon nga income matag tuig, nga mas labaw pa sa gikinahanglan sa balaod!
Ngano man nga gusto mahimong Highly Urbanized City ang Valencia?
Tungod kay nagkadako na ang siyudad. Daghan na og negosyo, sakyanan, ug mga tawo nga nagasalig sa serbisyo sa Valencia. Samtang nagkadako ang dakbayan, mas nagkinahanglan usab kini og dagkong proyekto ug mas lig-on nga serbisyo.
Pinaagi sa Highly Urbanized City status, mas adunay kagawasan ang Valencia sa pagplano sa kaugalingong kalamboan. Kung mahimong Highly Urbanized City ang Valencia, mas dali usab kini makadawat og pondo ug mga proyekto gikan sa national government alang sa dugang kalamboan sama sa imprastraktura, transportasyon, educational, medical, ug financial assistance, ug uban pang serbisyo para sa katawhan.
Mas mudako usab ang mahimong bahin sa Valencia sa National Tax Allotment o NTA, nga mao ang bahin sa kita sa national government nga ginahatag sa mga lokal nga panggamhanan.
Para mas masabtan, hunahunaa nga adunay usa ka dako nga cake nga pagabahinbahinon. Karon, ang component cities sa tibuok Pilipinas kapin sa usa ka gatos ang magbahinbahin sa ilang pondo. Kung daghan ang magkatunga sa usa ka cake, mas nipis ang matag hiwa.
Apan sa mga Highly Urbanized Cities, 34 lamang ka siyudad sa tibuok nasud ang magbahinbahin sa ilang bahin sa pondo. Busa mahimong mas dako usab ang madawat nga parte sa matag HUC.
Pinaagi niini, mas mapadako usab ang pondo sa dakbayan alang sa mga programa, proyekto, ug serbisyo nga direktang makabenepisyo sa mga Valenciano.
Apan kung mahimong HUC ang Valencia, dili na ba kini mahimong bahin sa Bukidnon?
Ang tubag mao: bahin gihapon sa Bukidnon ang Valencia sa LOKASYON UG IDENTIDAD niini. Apan sa aspeto sa administrasyon ug pagdumala, dili na kini ubos sa Provincial Government. Ang dakbayan mahimong mas INDEPENDENT sa pagplano ug pagdumala sa kaugalingong mga programa, proyekto, ug prayoridad samtang nagpadayon gihapon ang pakig-uban niini sa probinsya ug mga silingang munisipalidad.
Sa structure sa pagdumala sa siyudad, magpabilin gihapon ang City Mayor, Vice Mayor, mga Konsehal, ug mga Barangay Officials nga maoy magdumala ug maghatag serbisyo sa mga Valenciano. Magpabilin usab ang representasyon sa dakbayan sa Kongreso.
Ang kausaban mao nga ang Valencia mahimong mas direktang makig-coordinate sa national government alang sa mga programa ug proyekto nga may kalabutan sa siyudad, samtang nagpadayon gihapon ang pakigtambayayong niini sa probinsya ug ubang mga ahensya sa gobyerno.
Ang tumong sa Highly Urbanized City dili lang para sa titulo, kundili aron mas mapalambo pa ang serbisyo ug kalidad sa kinabuhi sa matag Valenciano.
Atangi ang sunod nga episode alang sa dugang pagpambit kabahin sa tinguha sa Dakbayan sa Valencia nga mahimong Highly Urbanized City!
